Read Ranglong JOHONIN 14 Bible Online

JOHONIN 14 - Ranglong bible

JOHONIN 14

¹“Andon le ninghala lei om u ta ni,” Isuan ati pe na. “Pathian iam u ro hanuk koi um na iam u ro.

²Ka Pa ina mun atampa a om; a om nok anten keina ril u rang anina, nangni rang mun asin Ka leia se zei.

³Hatuka ka sena na rang u mun ka va sin suale hong kir reta ka bila om ranga na hong la u ka ting, asik chu kei omna taka nei om thei u na ranga.

⁴Kei se na rang mun chu na riat kiar u hale,” ati na.

⁵Hatuka Thoman akoma, “Puma, Koinin chu nei se na rang riat mak me, hasik han hava lampui ha hontinmo riat thei ma ni?” ati na.

⁶Isuan akoma, “Koi hi keng lampui, atak le damna keinin zei, koi noka ase chu tuten Pa koma vatung thei no ni,” ati na a masanga.

⁷Ama han akom u na, “Koi ana riat mi na ni u tenchu ka Pa ariat um na ni len u zei, hatuka atun len hin ama ariat phit le a mu sua nei ni un zei,” ati na.

⁸Philipin akoma, “Puma, Pa na manmu di ro ba, hava tak ha ro koinin nei nang,” ati na.

⁹Isuan akoma, “Philip, hi dora asotpa na bibil u na kei hong omam mo neina la riat thei nok? Koi ana mu tak chu Pa ham amu len keng ani zei. Nangin hontinmo ‘Pa na manmu ro nei la ti?’ ati pe na.

¹⁰Koi Pa na kei om le Pa koia ei om ti hi iam mak che mo Philip?” ati pe na. Isuan a zolai ngai koma, “na kom u na chong kei ril ngai hi ka ninga kei ti ni mak, koia a om chian Pa han asin ei tho chachak.

¹¹Koi Pa na kei om le Pa koia ei om ti hi na iam u ro. Hantin ani nok anten, ka sin tho ngai sika luana chu na iam u ro.

¹²Atak taka keina ti ani u zei, koi ana iam tak chu ka sin tho ngai anga amam la thon ti. Hava rong la nimak, hiva ngai neka sin alian pangai la thon ti, asik chu, Pa koma ase ka ni zei.

¹³Hatuka nangnin ka raminga nei zong u tak pei chu na tho pe u ka ting, asik chu Pa ei anliana Naipasal tak chunga ei anlang theina ranga.

¹⁴Ka raminga angkhat pei nei zong u tak chu na tho pe u ka ting.

¹⁵“Nangnin neina dit u ka ni ten ka chongmak ngai nei tel u rang ani na.

¹⁶Hatuka Pa koma zong ka tinga aman hanuk angkhat ret anasan rang na pe unti umor tenpeia na bil u na a om ranga.

¹⁷Ama ha Pathian ei nina tak anlangpu Ratha diktak ani. Ama ha ramualin pom thei maka, asik chu ama ha aleia mu le aleia riat um om mak. Tenchu nangnin chu na riat u asik chu na bil u na om le na sung rila a om rangum ani.

¹⁸“Ka se tikam lonanvai ang khopa na ma u no ning; Na bil u na hong kir ret ka ting.

¹⁹Hanuk chu ramualin ei na mu lai nokna ranga hin sot zet lai no ning; tenchu nangnin chu na lamu ret un na ti; asik chu adam kei ni sika nangnim dam un na ti.

²⁰Hava nikhua tika chu koi hi Pa na kei om hanuk nangni bila kei om anga nangnim koia nei om u ha la riat un na ti.

²¹“Ka chongmak ngai apom le a tel ngai chu koi ananditpu ani zei; Hanuk koi anandit tak chu ka Pa ninum adit inti hankeng koi um ladit u ka tia akom u na anlang ka ting.”

²²Hankeng, Iskariot nok Juda han akoma, “Puma, koini na koma chu anlang ka ti nei ti tenchu ramual kom chu anlang pe u no ning i nei ti na mo?” ati na.

²³Isuan akoma, “Koi ana madit ten ka chong atel mi ei ni nget rang, hatuka ka Pa ninum amani ngai madit inti, hanuk ka Pa le koi akom u na a ompui ranga hong inti.

²⁴Koi anadit nok ten ka chong um tel no ni, hatuka nangnin, chong nei riat u ngai hi koi ka chong ni maka tenchu ana honga tirpu Pa achong keng,” ati na a masanga.

²⁵“Na bil u na kei la om sunga hiva chong ngai hi Kei na ril u.

²⁶Tenchu Pa han ka raminga ei hong tir rang nangni ana san rang, Ratha Anthiang han alompeia na manchu zit unti. Hatuka na kom u na kei na ril u ngai dora ha na manriat zit unti.

²⁷“Phukdaina ka na mak pe u. Ka koma phukdaina keng keina pek u. Ramualin ei na pek anga na pe u makung, na malung manbuia na ning manhal u no ro, hanuk rathatak ansak u no ro.

²⁸‘A se rang ka ni zei atina nangnin nei riat u ha hong kir ret ka ting.’ Nangnin nei na dit u ka ni ten, Pa koma ase rang ka ni zei kei ti hin na rai nei mansan u rang ani na. Asik chu ama chu ka neka alian keng.

²⁹Hiva ngai dora rui ahonga suak man atun hin keina lei ril u ani zei, asik chu nangkan hava rui tak ha ahong suak le nei iam thei u na ranga.

³⁰Na kom u na atam chong ril lai no ning asik chu hi ramual rui arilpu ahong rang a nai zei. Aman ka chunga ite ningneina don mak.

³¹Hanum nisela Pa kei maditna chu ramualin ei riat nget theina ranga achongmak ngai anga kei tho zit ani na. “Hong u ro, hivan ata suak u rei.