Read Ranglong JOHONIN 15 Bible Online

JOHONIN 15 - Ranglong bible

JOHONIN 15

¹“Koi hi gerep akung ka ni, ka Pa hi rahuan a thopu ani.

²Ka baka anra nok chu aman ei pei ani. Hatuka abaka anra tak chu aman ei rathial sa ani atampa mara ei kur sa theina ranga.

³Nangni keina manchu u na lehan anthial sua keng na ni u zei.

⁴Nan zompui tit u ro, hatuka Koiin um nan zompui tit u ka ting. Akungpuia abak akop nok ten atheia anra thei ni mak. Hava anga han nangnim ka koma na om u nok ten anra thei u no ta ni.

⁵“Koi hi gerep kung nangni ha abak na ni u zei. Ka koma a om tak chu hanuk koi um akoma kei omna tak chu amara kur sabak inti. Asik chu koi nok anten nangnin ite nei tho thei u om mak.

⁶Hatuka koia a om nok tak chu abak anga anvora ei chara ei anpei. Hatuka hava ang thingbak chu min ei rakhoma ei buma moi thonana ei hal ani.

⁷Nangni ngai ka koma na om u na, ka chong ham na kom u na a om ten nei zot u tak zong u ro hava ha na mansua u zei.

⁸Mara akura nei om u na lehan ka Pa ei anlianna nei manlang thei u na ani. Hatuka havan tin han ka zolai um nei chang u ani.

⁹Pa han koi ei na dit anga koiin um nangni ngai kei na dit u. Kei na dit u na hin om u ro.

¹⁰Nangnin ka chongmak ngai dora na tel u ten keina madit u na na om un na ti, Koi um ka Pa chongmak ngai dora kei tel tuara aman ei na ditna na kei om anga.

¹¹“Ka raisanna na kom u na ei om theina rang le na raisan u na ei kip theina ranga hiva chong ngai hi keina ril u.

¹²Ka chongmak chu hiva hi ani; koiin keina dit u anga, nangni ngai um andit ansiat u ro.

¹³Min a mal ngai ranga ei damna aphal diai thei khop anditna lian khit chu omlai mak.

¹⁴Ka chongmak ngai dora na tel zit u ten ka mal na ti u ka ting.

¹⁵Hava pang suak na ti u lai no ning, asik chu apumapa han imo ei tho suakin riat ngai maka; atun chu hava rathula ka mal keng kei na ti ani u zei asik chu ka Pa kom ata kei riat ngai dora nangni koma keina ril zit sua u keng na ni u zei.

¹⁶Nangnin neina thang u ni makung haneka koi keng anan thang u ka ni. Asik chu nei van ra thei u na ranga le mara nei don babang thei u na ranga keina phun u ani. Ka raminga Pa koma nei zong u tak aman ei na pek thei u na ranga han.

¹⁷Nangni ngai nei andit ansiat thei u na rang ngala hiva chong keina mak pe u ani.

¹⁸“Ramual min ana mumak u ten nangni ana mumak u mana koi keng ei na mumak mansa ti riat u ro.

¹⁹Nangni ngai hi ramual ata ni u tan la chu ramualin ata anga ei na dit u rang ani na, tenchu nangni ngai chu ramual ata ni u mak che. Haneka Koiin ramual ata keina thang u sika ramualin ei na mumak u na ani.

²⁰‘Suak hi apuma neka alian ni mak,’ ti chong keina ril u ha riat tit u ro. Min koi ana sinsak ten nangnim ei na sinsak u rang keng. Hanuk ka chong atel u ten, na chong u ngai um ei tel u rang ani.

²¹Tenchu ka mi nei ni u sika hiva ngai dora na chung u na la tho unti. Asik chu koi ana honga tirpu riat u mak.

²²Kei hong nok nisela hanuk chu akom u na chong kei ril nok nisela chu asia anlo u no ni ba. Tenchu atun ei masial u ngai rathula anon rua nei lai mak.

²³Koi anan mumak tak chu ka Pa ham ei mumak keng.

²⁴Tuten la tho ngai lui sin akar u na tho ving non lang chu asia anlo u no ni ba. Ten atun chu kei tho ngai dora amu sua u zeia hatuka koi le ka Pa ha ei na mumak rit ani u zei.

²⁵Amani Dan lekhabuna anziak anga ei hong kip nget theina ranga; ‘Amanin asik akong abui thaka ei na mumak u.’

²⁶“Tenchu, Pa kom ata ana san u rangpu nangni koma kei hong tir rang Pa kom ata Ratha dik tak ahong tik chu aman ka rui manriat inti.

²⁷Hatuka nangni lenin um manriat un na ti asik chu aphut len ata ka bila om na ni u na.