Read Ranglong JOHONIN 16 Bible Online

JOHONIN 16 - Ranglong bible

JOHONIN 16

¹“Nei iam u na sok ei cha nokna ranga hiva chong ngai hi keina ril u.

²Min anchuna in ata na la masuak untia hava tika ana that u ngaiin chu Pathian koma dali dar anga mandon untia, hava ang hun ahong keng ani zei.

³Min na chung u na hiva ngai ang hi la tho unti, asik chu Pa nokam Naipasal ten ngal ei riat rit u nok sika han.

⁴Tenchu amanin hiva ngai ang athona hun ahonga suak tik le keina lei ril u ngai nei anthei tit u na ranga hiva chong hi keina lei manthei u ani. Aphut ata hiva ngai hi na ril u makung asik chu na bil u na kei la om sika.

⁵Atun chu ana honga tirpu koma ase rang ka ni zei; hanum nisela nangni bila tuten honmo nei se rang ati na angkhat ngalin anan rakel om u mak che.

⁶Tenchu hiva ngai keina ril u sika ni zei ni na malung ei duk u ani zei.

⁷Hanum nisela atak keina ril ani u zei, kei se rang hi na rang u na asa. Asik chu ka se nok ten ana Sanpu na kom u na hong no ni. Tenchu ka se tikle ama ha na kom u na hongtir ka ting.

⁸Hatuka ama ahong tikle chu asia ruia, dikna ruia hanuk ruirilna ruia ramual mi chunga asia la hong manlo inti.

⁹Amani ngaiin koi ei na iam u nok sika ei masial u tak chunga asia la hong manlo inti.

¹⁰Pa koma ase rang ka ni zei hasik han hava pang neina mu u lai nok rang sika han dikna ruia asia la manlo inti.

¹¹Ruirilna ruia asia manlo inti asik chu hi ramual aruai ngai chunga rui anril sua keng ani zei.

¹²“Na kom u na aril rua chong atampa ka la don, hanum nisela atun hin chu hava ngai ha la diar thei u no ta ni.

¹³Hanum nisela Pathian ruia atak anlangpu Ratha dik tak ahong tik le chu atak zita na ruai unti. Ama ata ei ril ite om no ni, tenchu ei riat sua ngai keng ei ril rang, hatuka rui ala honga om rang um na la manriat unti.

¹⁴Aman koi na la mansang intia, asik chu na kom u na kei ril le kei ti ngai dora atak zita na la manthei kiar ret unti.

¹⁵Ka Pan ei don ngai dora hi ka ta kiar keng, hasik han ka ta kei ti ngai dora Ratha han la zit intia hatuka na kom u na ril kiar inti keina ti u.

¹⁶“Koi neina mu u lai nokna ranga hin sot zet lai no ni, hatuka neina mu ret u na rang um sot zet ret no ni.”

¹⁷Hasik han a zolai ngai senkhatin chu ankel ansiat u na, “I ei ti na mo? Aman koini rang, ama nei mu lai nokna ranga hin sot lai no ni hanuk ret chu ama nei mu retna rang um sot zet ret no ni ei na ti hi; hatuka ei la sapsa chu, ‘Pa koma ase rang ka ni zei ati.’

¹⁸Hasik han amani ngai han hong ei ti na mo sot zet lai no ni? Achong ril hi riat thei lai mak me!” ati u na.

¹⁹Amani han ama ei rakel u rang ei zot u ha Isuan alei riat le chu akom u na, “Nei na mu u lai nokna ranga hin sot zet lai no ni, hanuk nei na mu ret u na rangam sot zet ret no ni kei ti ruia hamo nei ankel ansiat u?

²⁰Ataka keina ril ani u zei, chapa le charcha laka la om un na ti, tenchu ramual min chu arai lei man san intia; lan, ngui un na tia tenchu nei anngui u na dora raisanna la chang inti.

²¹Nupang a naiha apuang lai tak chu aduk ei na asik chu dukna hun ei hong suak pe sika han, tenchu nai a mazir suale chu ramuala naite khat ei hong anzir a rai ei san tuara aduk ansak dora ei mangil.

²²Hasik han atun um na duk ei la na u, atun hin annguia nei om u tenchu nan mu pui ret u ka ting, hatika na rai san ret unti, hatuka ha na raisan u na chu tuten na kom u ata na pot thei u lai no ni.

²³“Hava nikhua tika chu nangnin itena ankelrua nei u lai no ta ni, ataka kei na ti ani u zei, hatuka ama kom ka raminga nei zong u tak Pa han na pek unti.

²⁴Atun ten hin ka raminga nangin ite la zong u mak che, zong u ro lei man un na ti, na raisan u na ei kip theina ranga han.

²⁵“Hiva ngai ruia hin na kom u na ankhina le chong kei la ril, tenchu hun la hong inti hava tika chu na kom u na ankhina le chong ril lai no ning, anthiang vanga Pa rui chu na la ril u ka ting.

²⁶Hava nikhua tika chu nangnin ka raminga ama kom zong un na ti, hatuka koiin Pa koma na rathul u na na zong pe u ka ti na ti u makung.

²⁷Asik chu, Pa han aning lena ngal han nangni ei na dit u ngal, Pa han ei na dit u asik chu koi nei na dit u le Pathian kom ata ahong ka ni ti nei na iam u sika han.

²⁸Koi hi Pa kom ata ramuala ahong ka ni zei, hatuka ramual amaka Pa koma ase ret rang um ka ni zei,” ati na.

²⁹Hatuka a zolai ngaiin a koma, “Atun hin chu ankhina mang luia anthiang vanga chong nei na ril ani.

³⁰Aloma ariat kiar ati na nana riat zei, nei na rakel kher rang hi anang khita riat lai mak che, havan tin han nang hi Pathian ata ahong na ni ti nei na iam thei na ani zei.”

³¹Isuan akom u na, “Atun lam chu nei na iam u mo ani zei? ati na a masanga.

³²En u ro, hun ahonga suak keng ani zei haneka atun ahonga suak sua keng ani zei, hava tika chu lan thek kiara na in u chipa la pan un na ti, hatuka ka thei daka na mak un na tia, tenchu ka thei dak ni makung ka bila hin Pa a om keng ati pe na.

³³Koia hin nei om tit u na phukdaina nei manthei u na ranga hiva chong ngai hi keina ril u ani, ramuala duk ansaka nei om u ani zeia, tenchu angam chaka om u ro, asik chu koiin ramual ka zui zei!” ati na.