Read Ranglong JOHONIN 17 Bible Online

JOHONIN 17 - Ranglong bible

JOHONIN 17

¹Isuan hiva chong ngai aril sua le anvan tiang atanga, “Ka Pa, ahun chu ahonga suak zei. Na Naipasal chu na manlian ro, hatuka Naipasalin um ei na manlian theina ranga.

²Asik chu miring dora tak chunga ningneina nei pek anga ka koma nei na pek ngai dora chunga umor damna kei pek theina ranga.

³Hatuka umor damna chu hiva hi ani zei, amanin nang rong hi Pathian atak ti le nangin nei hong tir Isua Krista ariat hi ani.

⁴Nangin sin atho rua nei na pek ngai dora ka zui suana ramuala keina manlian ani zei.

⁵Ka Pa! ramuala a om mana na bila anlianna kei chang ang tak lehan na bil ngeta atun na manlian ro ati na.

⁶“Nangin ramual ata mi nei na pek ngai koma na raming ka manlang zei. Amani ngai ha nang ata, hava ngai ha nangin ka koma nei na pek.

⁷Nangin aloma nei na pek ngai dora hi nang na koma ahong keng ti atun chu ariat u zei.

⁸Nangin chong nei na pek ngai dora amani koma ka mantunga hatuka amanin alei pom u na; na kom ata ahong kei ni le koi um nangin nei na hong tir kei ni ti adik taka ariata a iam u zei.

⁹“Amani rang ngal keng kei zong, ramual ranga zong makung. Asik chu nangin amani ngai nei na pek hatuka amani ngai nang ata kiar ani.

¹⁰Ka ta kei ti ngai dora hi na ta kiar keng hatuka na ta dora ham ka ta kiar keng. Asik chu amani ata keng kei anlianna kei manlang.

¹¹Koi chu ramuala omlai no ning, amani ngai chu ramuala la om unti, koi chu na koma ahong rang ka ni zeia. Ka Pa anthiang, nangin nei na pek ngai ha na raming le rung ro. Nang le koi pumkhat nei ni ang amanim pumkhat ei ni thei u na ranga.

¹²Amani bila ka om sung chu nei na pek ngai na raming le kei rung u, angkhat ngal ei anpei u nokna ranga keia hual, anpei ranga andang sua mi rong nok chu Pathian Lekhabuna anziak ei kip theina ranga.

¹³Atun chu na koma ahong rang ka ni zeia, amani malung sunga ka raisanna ei chang u na ei bit theina ranga.

¹⁴Na chong ngai akom u na ka peka tenchu ramualin amani chu amumak u na, asik chu hi ramual mi kei ni nok anga amanim hi ramual mi ni u mak.

¹⁵Nangin amani ngai hi ramual ata atuang ranga na zong makung tenchu asia ata anzok ranga keng keina zong.

¹⁶Hiva ramual mi kei ni nok anga amanim hi ramual mi ni u mak.

¹⁷Amani ngai hi atak le na koma andar u rase; na chong chu atak ani.

¹⁸Nangin hi ramuala nei na hongtir anga koi um amani ngai hi ramuala kei tir u.

¹⁹Hatuka amani sika han koi ka ning len ha na koma kei hong andar anga amani ngai ham atak taka na kom ei hong andar thei u na ranga.

²⁰“Amani rong kei zong ni mak, tenchu amani ngai chong ril ata koi ana iam ngai rang um kei zong.

²¹Amani ngai ha alom u na pumkhat ei ni thei u na ranga. Ka Pa, nang ka koma nei oma koi um na koma kei om anga amani ngai um koinia ei om u na pumkhat ei ni thei u na ranga. Nangin nei na tir ti ramualin ei iam theina ranga.

²²Hanuk chu nangin anlianna nei na pek anga amani kom um kei pek; nang le koi pumkhat nei ni anga amanim pumkhat ei ni thei u na ranga.

²³Koi hi amania hatuka nang ha koia, pumkhata ei om u na ei anzui thei u na ranga. Hanuk chu nangin nei na hongtir le koi nei na madit anga amani ham nangin nei madit ti ramual min ei riat theina ranga.

²⁴“Ka Pa! Nangin nei na pek ngai hi kei omna taka Ka bila ei om u rang hi kei zot. Nangin anlianna nei na pek ang tak kei anlianna ei mu thei u na ranga. Asik chu ramual ansiang man ata nei na madit ani.

²⁵Ka Pa adik! Ramual min ei na riat nok, ten koiin chu ka na riat lak: Hatuka hiva ngaiin um nei na hong tir chu ariat u.

²⁶Hatuka koiin amani ngai ha nang keina manriat hatuka la man riat bang um ka ti, hanuk ret chu nangin nei na ditna ha amani koma ei om theina ranga le koi um amani koma kei om theina ranga han.”