Read Ranglong JOHONIN 18 Bible Online

JOHONIN 18 - Ranglong bible

JOHONIN 18

¹Isuan hiva ngai aril suale a zolai ngai lehan asuak u na hatuka Kidron phai chum ava rakan u na. Hava han rahuan khat a oma. Isuan a zolai ngai le ava lut u na.

²Hatuka Juda, ansurpu rang han hava mun ha ariata, asik chu Isua a zolai ngai le hava han ei se pui babang chachak ani na.

³Hasik han Juda han Rom sipai ngai, chaizung ulian ngai le Pharisi ngaiin ei don u Biakin angak sipai ngai aruaia moiser lem le kuttuk achoia hava rahuana han ava suak pui a.

⁴Isuan achunga ei tong rang ngai dora alei riat kiar le chu alei honga suaka, “Tumo nei ravan u?” ati na alei rakela.

⁵Amanin, “Nazareta Isua,” ati na amasang u na. Isuan, “Koi hi ama ka ni zei,” ati na. Juda, ansurpu ham abil u na anding chiana aleia om ani na.

⁶Isuan amani kom, “Ama ha koi len,” ei ti le anuk ankei beta phila anbok u na.

⁷Isuan athara akom u na, “Tumo neia rok u?” ati reta. Amani han, “Nazareta Isua,” ati u na.

⁸Isuan, “Ama ha koi len ka ni zei atia ka na manthei u zei hale,” ati na. “Nangnin nei na ravan u ka ni ten hiva ngai hi manse u ro,” ati na.

⁹“Ka Pa, nangin nei na pek ngai dora angkhatte ngal anpei mak ti aman chong ei ril ha ei hong kip ani zei.”

¹⁰Havalai tak han Simon Pitorin a khendai chu aradoka Chaizung Lian asuak khat achang kuar athem pe vinga, hava suak raming chu Malka ani.

¹¹Isuan Pitor akoma, “Na khendai chu akok dena siak ro! Ka Pa han antakna khuri ei na pek lehan buang lui ranga mo nei na mandon?”

¹²Hava suale Rom sipai ulian le a sipai ngai hanuk Juda arung ngai alom u na Isua chu ava sura akhit u na.

¹³Hatuka mansa na chu. Ana akom aruai u na, hava kuma Chaizung achangpu Kaiapha atarpu hi Ana ani na.

¹⁴Hiva Kaiapha hin Juda ulian ngai koma kurbut apeka, mipui rathula angkhat ei thi chu asa bet hale atipu anina.

¹⁵Simon Pitor hanuk a zolai angkhatin Isua anuk ava zi u na, hatuka hava a zolai khat ha chu Chaizung Lian mel riat sabak khat ani na, hatuka Chaizung Lian a in tuamaia ama ham Isua bila ava luta.

¹⁶Hintiang Pitor ha chu tual pang makota anding chiana aleia oma, hatuka a zolai khat ha apanga ahonga suaka suakkhar angak nute koma ava rila Pitor chu insunga a ruaia.

¹⁷Hatuka suakkhar angak nungakte han Pitor a koma, “Nang um hiva mi a zolai ngai bila angkhat ni mak che mo?” ati na. Pitorin akoma, “He e, ni makung,” ati na a masanga.

¹⁸Hatuka adai ei chul hun ei ni sika havana suak ngai le chaizung aruai arung ngai han moirohol le antho moi ahil tura andinga an ua u na, hava han Pitorin um abil u na moi an ema.

¹⁹Chaizung Lianin Isua rang a zolai ngai le aman mi ei manchuna ruia a rakela.

²⁰Isuan, “Vantang riat ranga mitin koma chong kei ril chachak. Hanuk chu Sinagogue anchuna ina le Pathian Biakina mitin ei anbum nana keng kei manchu chachak, maruka ite kei ril om mak.

²¹Hanle, ichangmo koi nei na rakel? Ka chong ariat ngai koma rakel u ro imo koiin kei ti; Enro, amanin kei ril ngai dora chu riat kiar unti!” ati na a masanga.

²²Isuan hiva chong aril le chu Juda ulian ngai arung bila angkhatin a leia ben khap suale, “Chaizung Lian ke nangin havan tin han nei masang ngam!” ati na.

²³Isuan akoma, “Chong asia kei ril ani ten kei siatna mandang ro; tenchu chong asa kei ril aniten hanle ichangamo nei na zem?” ati na a masanga.

²⁴Hava suale chu Ana han ankhit chunga Chaizung Lian Kaiapha koma a mathuan a.

²⁵Pitor hava han anding chunga moi ala ua na; hatuka mitei ngaiin, “Nang um hava mi a zolai khat la ni mak che mo ha?” ati u na. Tenchu Pitorin, “Riat ngal makung, koi chu ni makung,” ati na.

²⁶Chaizung Lian asuak khat Pitorin akuar ei athem pe vingpu a unai khatin, “Rahuana ama bila keina mu nok mo ani?” ati na.

²⁷Hava han um Pitorin, “Re makung,” ati reta hatuka anlaiseka ar ahonga khuanga.

²⁸Hatuka zingphit mansana Isua chu Kaiapha in ata ram avongpu reng ina aruai u na. Amani riti anga anthianga ei lei ei om u na Zokna Panta bu ei nek thei u na ranga Juda ulian ngai chu reng ina va lut u maka.

²⁹Hasika han Pilat chu amani kom apanga ava suaka akom u na, “Hiva mi atak chunga i ang asia mo nei manlo u,” ati na ahong rakela.

³⁰Hatuka amani han, “Ama hi asia tho no sela chu koinin na koma na hong betok no ma ni,” ati na amasang ret u na.

³¹Pilatin akom u na, “Havantin han aniten ama hi ruai u tan la na dan u taka rui va ril u ro,” ati na. Hatuka amani han, “Koinin mi khat pei athat ranga phalna a nei ni mak me,” ati na amasang u na.

³²Isua chong ngai ei hong kipna ranga hiva rui ngai hi ei hong suak ani zei, ama ei la thina rang ruia ei lei rila ei lei manmu keng.

³³Hava suale chu Pilat ha rui rilna mun reng ina ava lut reta Isua rang. “Nang hi Juda ngai reng mo na ni?” ati na a rakela.

³⁴Hatuka Isuan a koma, “Hiva ankelna hi nang na malung puak ata nei na ti mo ole mi tei ngaiin ka rui ei ril u nei riat ata mo?” ati na a masanga.

³⁵Pilatin, “Koi hi Juda mi mo ka ni? Nang na nam ngai le chaizung ulian ngai len hakeng ka koma nang ana hong anbetok u. Hongmo nei tho ni zei?” ati na a masanga.

³⁶Isuan, “Ka reng ram chu hi ramual ta ni mak, ka reng ram hi ramuala nisela chu ka zolai ngaiin Juda ulian ngai kuta anbetoka kei om nokna ranga anduipui u zei ni. Ten ka reng ram chu hivan hin ni mak,” ati na.

³⁷Hasik han Pilatin, “Hantin aniten nang hi reng mo na ni?” ati na. Isuan, “Reng kei ni ha nang keng a na ti. Atak rui anriat rang ngala hi ramuala kei hong anzir le kei hongna asik ani. Ataka a om tak chu ka he riat inti.” ati na.

³⁸Pilatin, “Atak hi imo?” ati na a rakela. Hatuka hiva chong aril suale apanga Juda mipui koma ava suak reta amani koma, “Koi chu ama asia ei anlo theina ranga ite asik mu makung.

³⁹Tenchu nangni nam dan anga Zokna Panta nikhua hin mi khat, pei ankhum nangni na ranga kei hong mazok chachak ani. Hantin aniten nangni ranga Juda ngai reng kei mazok rang hi na zot u mo?” ati na a rakela.

⁴⁰Hatuka amanin akoma ankheka, “Ni mak, ama ni mak, Barabba keng nei zot,” ati u na. Tenchu hiva Barabba hi mi suam khat ani na.