Read Ranglong JOHONIN 19 Bible Online

JOHONIN 19 - Ranglong bible

JOHONIN 19

¹Hatuka Pilatin Isua atuanga nganu ramoi le ava man zema.

²Hankeng sipai ngaiin raling lukhu aphiar u na aluna a mankhu u na; hanuk puan sen aduk um a mansil u na;

³Hatuka akom ahong u na, “Juda reng chu adam sot rase!” ati u na. Hatuka chunga ava kala ava ben u na.

⁴Hava suale Pilat chu apanga ava suak reta mipui koma, “En u ta, ama ei siatna ite anon rua kei mu nok ti nei riat u na ranga na kom u na kei hong masuak ani zei.” ati na.

⁵Hatuka Isua chu raling lukhu ankhu chunga le puan sen aduk ansila ahonga suaka; Pilatin akom u na, “Hi hile hava miring ha en u ta ro,” ati na.

⁶Chaizung ulian ngai le Biakin arung ngaiin amu u le chu, “Krosa tar ro! Krosa tar ro,” ati na ankhek u na. Pilatin akom u na, “Nangni han ruai u tan, Krosa va tar u ro; koiin chu ite ei siat anon rua mu makung,” ati na.

⁷Mipuiin akoma, “Koinin dan khat na dona hava dan anga chu Pathian Sapa ka ni ei anti sika ei thi nget rang anang,” ati na amasang thap u na.

⁸Pilatin hava chong vang ariat sua ata chu ei achi anrik sana.

⁹Ama chu a reng ina a kir reta ava luta Isua rang, “Hovan ata hong mo na ni?” ava tina. Tenchu Isuan ite masang maka.

¹⁰Pilatin akoma, “Ka kom chong non mo? Nang anan zokna ranga ningneina adon le Krosa ana tar theina ningneina adon ti riat ro,” ati na.

¹¹Isuan, “Pathian kom ata hiva hi anpek nei ni ving sika ka chunga ningneina nei don thei ani. Hasika han na koma anan betokpu masial ha chu a la lian sa.” ati na a masanga.

¹²Hava sik ual han Pilatin ariat sua ata chu Isua anzokna rang avala. Tenchu mipui ngai ankhek ret u na, “Ama hi na mazok ten hava omzia chu Kaisar a mal ni mak che. Reng akai rang ati dora chu Kaisar adui ani,” ati u na.

¹³Pilatin hava chong ariat le Isua chu asuak puia hatuka ruirilna chomphang “Lung annil” ei ti u muna avan suta. Hebrai chonga a raming chu “Gabbatha” ani na.

¹⁴Zokna Panta mana nikhua ani anding phit phaman beta Pilatin mipui koma, “Hi hile na reng u,” ati pe na.

¹⁵Hatuka amani ngai ha ankhek ret u na, “That ro! that ro! Krosa tar ro!” ati u na. Pilatin akom u na, “Na reng u Krosa keina tar pe u rang nei zot u mo?” ati na a rakela. Hatuka chaizung ulian ngaiin, “Kaisar rong nok chu reng atei don mak me,” ati na amasang u na.

¹⁶Hatuka Krosa antar ranga Pilatin Isua chu amani kom a betoka.

¹⁷Ama chu ahonga suaka a Kros anput chunga “Luru Mun” ei ti u Hebrai chonga “Golgotha” han ava suakpui u na.

¹⁸Hava han ama chu Krosa avatar u na hatuka a bila atei mi anni hintiang khat sontiang khat Isua a lai taka atar u na.

¹⁹Pilatin apuang rua lekha a maziaka Kros a rela atara. Ama han ei maziak chu, “Nazareta Isua, Juda ngai Reng” ani.

²⁰Mi tampa han hava ha apore u na asik chu Isua Krosa ei tar u na mun ha khopui ata anla rahai ni maka. Hava apuang rua lekha ha Hebrai, Latin le Grik chonga anziak ani na.

²¹Chaizung ulian ngaiin Pilat koma, “Juda ngai Reng man ti no ro, hanek ten Juda ngai Reng ka ni ei anti ati na maziak ro,” ava ti u na.

²²Pilatin, “Kei maziak sua chu kei maziak len ani zei,” ati na a masanga.

²³Sipai ngaiin Isua Krosa atar sua u le chu apuan rasil ha alak pe na phel manli aman chang u na, phel khat senga sipai ngaiin achang chip u na hava rong la ni mak, a kultai um alak pe u na; hava kultai ha anchi lui tana atuan pumpuia ankhong anina.

²⁴Hasik han sipai ngai amani le amani anril u na, “Thet u no rei, tenchu tun mo achang, ravan en u na rei anti u na,” ati u na. Pathian lekhana, “Ka chung choi chu amani le amani han ansem u zei, ka chung choi lehan ravan an en u na na ti anziak ei hong kip theina ranga,” Hava tak ha sipai ngaiin ei tho u ani na.

²⁵Hava han Isua Kros akola a nu, a nu zuarpui Mari Klopa a nungak hanuk chu Mari Magdalini andinga aom ani u na.

²⁶Hankeng Isuan a nu le a zolai madit ha a kola anding a muna, a nu koma, “Ama ha na naipasal ani zei,” ati na.

²⁷Hava suale a zolai rang, “Ama so na nu ani zei,” ati na, hatuka havan ata hava zolai han ama chu a ina a ruaia.

²⁸Hava suale Isuan atun chu aloma akip zit ti ariata Pathian lekhabuna anziak ei kip theina ranga “Ka ti anral,” ati na.

²⁹Hava han bel khat pei zu thur sabak ansiak a oma. Hatuka isponz khat zu thur sabaka anchia ha husop kuang le amakhop u na a mura ava re pe u na.

³⁰Hatuka Isuan zu thur sabak abuang suale chu, “Ahek zei,” ati na. Hava suale alu amakhaia a ratha abetoka.

³¹Hava nikhua ha Pongansana nikhua ranga alei ansinna ani na. Pongansana nikhua ha anthiang khit ei ni sika han Krosa antar ruak ngai ei om chian thei nokna ranga Juda ulian ngaiin Pilat koma, Krosa antar ngai ke ava khiaka akhai ranga ava zong u na.

³²Hasik han sipai chu ahong u na Isua bila Krosa antar mansana ake akhiak pe u na, hava suale angkhat ret ke ham akhiak pe u na.

³³Tenchu Isua kola ahong u le chu aleia thi sua sa amu u na ake khiak pe ulai maka.

³⁴Hanum nisela sipai khatin saiper le akang mer a vit pe na thisen le ti ahonga suak zut lena.

³⁵A mupu han riatpuina a neia, hatuka ama riatpuina ha adik; ama han atak keng ei ti ati na ariata, nangnim nei iam thei u na ranga tina arila.

³⁶Pathian lekhana anziak anga, “Ama chu a ru angkhat ngal kiak no ni,” ti chong ei hong kip theina ranga hiva ngai hi ei hong chuk ani zei.

³⁷Hanuk chu Pathian lekha khat reta anziak, “Amanin ei vit u ha lokon la en unti,” ti ani na.

³⁸Hava suale Arimathai khuana mi Joseph han Isua ruak ei choi theina ranga Pilat koma ava zonga. Joseph hi Isua a zolai khat ani, tenchu Juda ulian ngai anchi tuara maruka a om ani. Pilatin ruak achoi ei phal sika Joseph chu asena ruak chu achoia.

³⁹Hatuka Nikodem, ama hi zana Isua koma ahong mansa ani; ama ham Joseph a bila asena. Ama han mura le alo le anpol marim ahui ser somanthum ang a hong choia a honga.

⁴⁰Hatuka Isua ruak chu apasal anni u han achoi u na; hatuka Juda ngai anphum dan anga marim ahui le puan annal lehan athuam u na.

⁴¹Krosa ei tara ei that u na kola han rahuan khat a oma; hava han tute lanphumna ngai lui thankhur athar khat a oma.

⁴²Hava nikhua ha Pongansana nikhua ranga ansinna nikhua ei ni le than um akol taka ei ni sika Isua chu hava han a manzal u na.