Read Ranglong JOHONIN 2 Bible Online

JOHONIN 2 - Ranglong bible

JOHONIN 2

¹Hatuka ninthum changna nikhua han, Galili rama Kana khopuia mui ruaina khat a oma. Hava han Isua a nu anchela.

²Hanuk chu Isua le a zolai ngai um hava mui ruaina na han ankui ani u na.

³Hatuka nukhona zu ansam u le chu Isua a nu han akoma, “Gerep zu hi ansam keng ani u zei,” ava ti na.

⁴Isuan akom, “Nupang, hiva ruia nang le koi hi imo nei anphana, ka hun la hong tung mak,” ati na.

⁵Hatuka a nu han mi dorbondom ngai rang, “Aman ei na ti u dora tho u ro,” ati na.

⁶Hava han Juda ngai anthiangna dan anga lung tikola aruk ansut a oma, angkhakhatin atampa ngai litar razakhat seng achak thei ani na.

⁷Hatuka Isuan, “Tikola ngai dora ti manbit zit u ro,” ati na. Hankeng hava ngai dora chu ti aliama aman bit u na.

⁸Hatuka aman, “Atun chu havan ata luak lak u tan nek sak ansukpu koma choi u ro,” atina. Hankeng achoi u na.

⁹Nek sak ansukpu han ti gerep zu ei man chang sua ha atem beta ten ei suakna riat thei maka. Ti avaluak ngai han chu ariat u na. Nek sak ansukpa han makpa chu akuia

¹⁰akom, “Min gerep zu ati keng ei rasua mansa, hankeng atam ual min a nek suale ati nok ual ei rasua chachak. Tenchu nangin atun tenpei gerep zu ati nei la don,” ati na.

¹¹Hantin han Isuan boidong sin ei phutna chu Galili rama Kana khopuia anina, hivan tin hin ei lianna ei man langa a zolai ngaiin ei iam thei un zei.

¹²Hava suale chu ama le a nu, a naipa ngai hanuk chu a zolai ngai lehan Kapernaum khuana ase u na, tenchu nikhua sot va om u maka.

¹³Havalai tak han Juda ngai Zokna Panta ahonga nai zeia hankeng Isua Jerusalema ei se.

¹⁴Hatuka Pathian Biakina serat, bera, pharvali azuar ngai le sumru athul ngai chu ava muna.

¹⁵Hatuka, rirual le nganu ramoi asina serat le bera aloma Pathian Biakin ata a rasuana, sumru athul ngai sum abun pena, ei siak u na ngai dora ei malet pe zit.

¹⁶Hanuk chu pharvali azuar ngai koma, “Hiva neinun ngai dora hiva mun ata khai u ro, ka Pa in hi azuarna le anchokna in manchang u no ro,” ati na.

¹⁷Hatuka, “Na in sika ka tepannel na han moi anga achuang ka ni zei,” ti anziak ha a zolai ngai malunga ei hong chui ret ani na.

¹⁸Hatuka Juda ngai han, “Hiva boidongna sin nei thona nei na man mu dora hi hovan tina nei tho thei mo?” atia arakel u na.

¹⁹Isuan akom u na, “Hiva Biakin masiam u ro, koiin ninthum sunga manding ret ka ting,” ati na a masanga.

²⁰Hatuka Juda ngai han, “Hiva Biakin hi kum sommanli le kum aruka ansin anina, nangin ninthum sunga nei manding rang mo?” ati u na.

²¹Tenchu ama aninga ataksa anga Biakin rui keng ei ril.

²²Hasik han ei thi ata anthuiret suale chu hiva chong hi aman ei la ril nget keng atina a zolai ngai malunga ei la chui pe ret u ani na. Hava suale keng Pathian Lekhabuna chong le Isua chong ngai ei la iam u.

²³Isuan Zokna Panta laia changdong sin ei tho ngai amu u na mitampa han ama raminga a iam u na.

²⁴Tenchu Isuan aning len ngala han amani chunga angamna don maka, asik chu aman mi dora ei riat zit ani na.

²⁵Miring ruia ariatpui ranga aman tute ei nang ommak asik chu aman miring sunga a om dora ariat zita.