Read Ranglong JOHONIN 20 Bible Online

JOHONIN 20 - Ranglong bible

JOHONIN 20

¹Pathian nikhua zingphit mansana azing miaka Mari Magdalini chu thana ase na hatuka than lung chu ankhai vinga ava muna.

²Hasik han atan chiana Simon Pitor le a zolai khat ret Isuan ei madit koma asena, “Than ata Puma chu min alak viaka achoi u zei. Hatuka hontiangmo ei siak ani u zei. Koinin chu riat mak me” ava ti u na.

³Hatuka Pitor le a zolai khat ret ha asuaka than tiang ase u na.

⁴Anin u atan rita ase u na. Hava a zolai angkhat han Pitor chu akhel vinga mansana thana a lei va suaka.

⁵Hatuka anbuna asung ava venga puan annal ngai chu a om chita ava muna tenchu asunga va lut maka.

⁶Simon Pitor chu ama anuka ava suaka, than sunga ava lut lena puan annal ngai chu anbuk chita ava muna.

⁷Isua alu tianga puantuidui a om ha puan annal ngai bila om maka, abinga anzual rapa alei oma ava muna.

⁸Hatuka hava zolai mansana thana alei va suak ham asunga ava luta hankeng ava mu le chu ei iam ani zei.

⁹Asik chu athi ngai bil ata ei lan thui rang ti Pathian lekhana chong ha ei la riat thei u nok a la ni na.

¹⁰Hava suale chu a zolai ngai ha a in dena akir ret u na.

¹¹Mari chu than kola anding chiana achapa a oma, hatuka ei chap chuchunga than sung ava venga;

¹²hatuka vanpalai anni puan ngui ansil chu Isua ruak ei zalna han angkhat a lu sip tiang atei khat ha ake thuan tiang ansut u na ava muna.

¹³Amani han, “Nupang ichangmo nei chap?” ati u na. Ama han akom u na, “Ka Puma chu ana choi pe viak u zei, hontiangmo ei na va re pe u ani zei! Kei riat lai nok,” ati na a masanga.

¹⁴Hatuka anuk tiang anhoi le chu Isua anding chu a muna; tenchu ama ha Isua keng ati na riat thei lai maka.

¹⁵Isuan, “Nupang, ichangmo nei chap?” Tumo nei ravan atina a rakela. Aman chu rahuan a en pu khat ni inti, ti mandon achoia hatuka a koma, “Ka pu, nangin nei khai viak aniten nei va siakna mun na ril ro ba hatuka koi ngal sena va lak ka ting,” ati na.

¹⁶Isuan ama ha, “Mari!” ati na. Ama chu amaton tiang anhoia akom, Hebrai chonga “Rabboni!” ati na. A omzia chu “Minchupu” tina ani.

¹⁷Isuan akoma, “Na la ton di no ro, asik chu atun ten hin Pa koma ase rang la kal makung. Tenchu ka parual ngai kom se tan la akom u na, Ka Pa, na Pa u, ka Pathian hanuk na Pathian u koma akal rang ka ni zei ati, ati na na va ril pe ro,” ati na.

¹⁸Hasik han Mari Magdalini chu a zolai ngai koma asena, ama han Puma ei mu le akoma chong ei ril ngai dora ava mantheia.

¹⁹Hava nikhua ha hapta ei anphutna mansa nikhua azing bupa Juda ulian ngai anchi tuara a zolai ngai chu in suakkhar akal tita ankhom u na; hava han Isua chu akar u na ahong andinga, “Na chung u na phukdaina om rase,” ati na.

²⁰Hava ati suale akom u na a kut le a kang aman muna. A zolai ngai chu Puma ei mu u na arai amansan sabak u na.

²¹Isuan akom u na, “Na chung u na phukdaina leng rase, ati reta. Ka Pa han koi ei na hongtir anga nangnim keina tir u,” ati na.

²²Hava ati suale achung u na a thinthi a sema hatuka, “Ratha Anthiang chang u ro.

²³Mi masial ngai nei madual u tak pei anduala om inti, hatuka mi masial ngai nei madual u nok tak pei chu andual luia om inti,” ati pe na.

²⁴Isua akom u na ahong lai han a zolai somleianni ngai bila Thoma, “Anphir” ei ti u ha chu abil u na lei om maka.

²⁵Hasik han a zolai atei ngaiin, “Koini chu Puma na mu sua zei,” ati pe u na. Thoma han akom u na, “A kuta khorka anhemna anuk ka muna ka kut maria nget le ka tona hanuk akang mer ka kut le ka matuai nok maseng iam no ning,” ati na.

²⁶Hapta khat suale a zolai ngai chu in sunga avan chun ret u na hava han Thoma ham a oma. Suakkhar dora ankhar zitam nisela hava han Isua chu abil u na a hong andinga hatuka, “Na chung u na phukdaina om rase,” ati na.

²⁷Hava suale aman Thoma koma, “Hiva hin na kut maria le hong matuai tan ka kut anni hong en ta; Hanuk chu na kut hong son tan la ka kang mer hong matuai tan na malung songankhar chu manbang tan iam ta ro,” ati na.

²⁸Thoman akoma, “Ka Puma, ka Pathian!” ati na a masanga.

²⁹Isuan akoma, “Nei na mu sika nei na iam? Mu lui ta na koi a na iam ngai chu itukmo borsang ei tung u rang ani na,” ati na.

³⁰Isuan a zolai ngai mit muna boidong sin atei atampa ei man lang pe ani na, tenchu hava ngai ha hiva lekhabuna anziak sua lai maka.

³¹Tenchu Isua hi Krista, Pathian Naipasal ani ti nei iam thei u na ranga hiva ngai, ei anziak ani, hanuk chu nangnin nei iam tir u na lehan ama na han damna nei manthei u na ranga.