Read Ranglong JOHONIN 21 Bible Online

JOHONIN 21 - Ranglong bible

JOHONIN 21

¹Hava suale Isua chu Tiberia tindil varala a zolai ngai koma ahong anlang pe reta. Hintin hin ama chu ei van lang ani.

²Simon Pitor, Thoma “Anphir” ei ti u ha Galili ram Kana khuana Nathaniel, Zabedai a naipasal anni le Isua a zolai anni ngai alom u na avan chun u na.

³Simon Pitorin akom u na, “Koi chu nga sur ka se zei!” ati na. Hatuka amanin, “Koinim na bila hong inti,” ati u na, hatuka rakuanga ava chuang len u na tenchu hava zana han ite asur rua man u mak.

⁴Hatuka khua ahongavar le chu Isua chu ti matapa ahong andinga, tenchu a zolai ngai han ama so Isua ati na lei riat thei u mak.

⁵Hatuka Isuan amani rang, “Kalong ngai, ite asur rua man u lai mak che mo,” ati na. Amani han, “Ite man lai mak me,” ati na amasang u na.

⁶Aman akom u na, “Na rakuang u chang tiang han len deng u ro, man un na ti,” ati na. Hatuka amanin len avadeng u le chu nga atam rahai sika han a len u nuk thei u lai maka.

⁷Isuan ei madit a zolai khat han Pitor koma, “Puma keng ani zei!” ati na. Hatuka Pitorin Puma keng ani zei ti ei riat le achung choi puan rasil abui ta na tindila avan toma. Asik chu achung choi puan ei khek zita a leia om ani.

⁸Havana a zolai atei ngai han chu lena nga abit thak anuk tira rakuang le balichang ahong pan u na, Tangkol ata anla zet ni u maka, muk raza anni ten dam ni inti ei ankar.

⁹Hatuka tang ava kal u le chu moi raek an alpa chunga nga le vaipol anrahai a oma.

¹⁰Hatuka Isuan akom u na, “Atuna na nga hong choi u ata nga alakte hong choi lak u ta,” ati na.

¹¹Simon Pitor ava chuanga tang kol tiang chang len ava kaia, hava lena han nga alianpa ngai raza khat somranga anthum abit thak anbanga, hava dor pei nga anbangam nisela len chu chet thak maka.

¹²Hatuka Isuan amani kom, “Hong u ro, hong sak u ta ro,” ati na. Tenchu a zolai ngai bila angkhat ngalin, “Tumo na ni?” ati na ankel ngam om u maka, ama hi Puma ani tina ei riat u sika han.

¹³Hatuka Isua chu ahonga vaipol tap alaka akom u na apeka, hantin ang han nga ham apeka.

¹⁴Isua athi bil ata anthui suana hiva hi a zolai koma ei hong anlang voi anthum na ani.

¹⁵A nek a sak sua u le chu Isuan Simon Pitor rang, “Simon, Johon a naipasal hiva ngai neka hin na na dit bet mo?” Ama han, “O, Puma, keina ditna chu nangin na riat,” ati na amasanga. Hatuka Isuan akoma, “Ka berate ngai maruai ro,” ati na.

¹⁶Isuan voi annina na akoma, “Simon, Johon a naipasal, na na dit mo?” ati reta. Ama han, “O, Puma, keina ditna chu nangin na riat,” ati na. Isuan akoma, “Ka bera ngai vai ro,” ati reta.

¹⁷Isuan voi anthumna na, “Simon, Johon a naipasal, na na dit mo?” ati pe reta. Isuan voi anthumna, na na dit mo? ei ti sika Pitor a malung ana pena.Hatuka Isua kom, “Puma aloma nangin chu na riat kiar hale, keina dit um na riat hale,” ati na. Isuan akoma, Isuan, “Ka bera ngai rung ro, ati na.

¹⁸Atak taka keina ril ani zei, na vang lai chu na kong na khita nei zot nana na van lenga. Tenchu na tar tik le chu na kut alangin na tia, min na kong na khit pe inti, hatuka nei zot nokna tiang na ruai unti,” ati na.

¹⁹Isuan hiva chong ei rila hin, Pitor chu hontin ei thi na mo Pathian lianna ei manlang rang ti ei man riatna ani.

²⁰Hatuka Pitor chu anhoia Isuan ei madit zolai ha amani nuk ei hong zi amuna, ama ha zandui anek u laia Isua rop suama avan boia, “Puma, nang hi tumo anan sur rang?” ati pe ha ani na.

²¹Pitor chu Isua tiang anhoia akoma, “Puma hiva mi hi imo achang rang?” atia a rakela.

²²Isuan akoma, “Ka hong ret maseng ama hi a om tit ngalin havan han nang imo nei chang? Nang pei na hong zi ro,” ati na.

²³Hasik han, hava a zolai chu thi lai no ni ti chong ha a zolai ngai koma anthanga. Tenchu Isuan ama chu thi lai no ni ei ti na ni mak. Tenchu, “Ka hong ret maseng ama hi ei lei om tit rang ka zot ngalin, hava han imo nang nei nang?” ke ei ti pe.

²⁴Hiva zolai tak hi hiva ngai dora ahong anriatpu ani zei. Hanuk chu aman hiva ngai dora anziakpu ani. Ama ei manriatna chu adik ati na nei riatpui ani.

²⁵Isuan sin ei tho atei atampa ala oma. Hava ngai dora ha ang kha khata anziak zit sela lekhabun ziak atam rahaia ramualin achak sua ranga iam makung.