Read Ranglong JOHONIN 3 Bible Online

JOHONIN 3 - Ranglong bible

JOHONIN 3

¹Pharisi bila mi khat a oma a raming chu Nikodem. Ama ha Juda ngai ruaipu khat ani.

²Ama ha zana Isua kom ahonga: “Rabbi, Pathian kom ata ahong minchupu nei ni ti koinin nana riata, Pathian na bila a om ani nok anten hiva boidong sin nei tho ngai hi tuten tho thei no ni,” ati na.

³Hava suale Isuan akoma, “Atak taka kei na ril ani zei, mi anzirret nok anten Pathian reng changna ram mu thei no ni,” atia a masanga.

⁴Nikodemin akoma, “Mi atar sua nuka hontinmo ei anzir ret thei rang? A nu von sunga voi anni changna ei luta ei anzir ret rang mo?” ati na.

⁵Isuan, “Atak taka kei na ril ani zei, tia le Ratha ata anzir nok ten Pathian reng changna rama lut thei no ni.

⁶Taksan ei mazir chu taksa hanuk Rathan ei mazir chu ratha ani.

⁷Anzir thar ret u ro kei na ti u hi na chang mandong u no ro.

⁸Thinthi hi ei zot na tiang keng ei se, ten arasa chu na riat u, hovan ata ahong mo hovan tiang mo ei se rang riat u mak che. Mitin Rathana anzir chu hantin anga ei om rang,” atina a masanga.

⁹Nikodemin, “Hiva ngai hi hontinmo ei ni thei rang?” ati na a masanga.

¹⁰Isuan, “Nang ro Israel ngai anchu bila ansangkhit nei ni, hiva ngai hi nei riat nok mo?

¹¹Atak taka keina ril ani u zei, koinin chu nei riat hakeng nei ril, nei mu sua rui keng nei man riat, hanum nisela koinin nei riatna tuten apom zot om u mak che.

¹²Ramual rui kei na ril u na lua iam u mak che, vanram rui vang chu ril ngal ila hontin nei iam u rang?

¹³Vanram ata ahonga chum Miring Sapa rong nok anten tute vanrama akal la om ngai mak,” atina a masanga.

¹⁴Mosin philchar rama thir len sin marul ei tar ang han, Miring Sapa ham lan tar nget inti.

¹⁵Hasik han ama a iam tak pei chu taituan damna chang inti.

¹⁶Asik chu Pathianin ramual adit rahaia a Naipasal selep ei hong phal, Ama a iam tak pei chu pei anchang no ni a, tenchu taituan damna keng ei chang.

¹⁷Pathianin ramual tak chunga rui aril ranga a Naipasal ei hong tir nimak, tenchu Ama zara ramualin sandam ei lei chang thei na ranga.

¹⁸A Naipasal a iam tak chu a rui anril lai no ni tenchu Ama a iam thei nok tak chu a rui anril sua keng ani zei, asik chu Pathian Naipasal selep raming ei iam nok sika han.

¹⁹Ruirilna chu hiva hi ani zei, ramuala ra-ang ahonga mi ngaiin ra-ang neka azing kar aliak adit u, asik chu asin tho u ngai dora asiat sua keng ani zei.

²⁰Asia atho doran chu ra-ang a mumaka, hatuka ra-ang tiangam hong u no ni, asik chu asin tho salui ngai lam anlang ving ngai.

²¹Adik atho ngaiin chu ra-ang tiang ahonga, Pathian he tel chunga asin tho u ngai ha ra-anga ei anlang thei na ranga.

²²Hava suale chu Isua a zolai ngai le Judai rama ase u na, hatuka amani bila a om lena hanuk baptisma a peka.

²³Johon ham Salim khua kola Ainona baptisma, alei hong peka, hava muna han ti ei tam sika, mipui ngai chu akoma ase u na hatuka aman baptisma alei peka.

²⁴Asik chu hava lai han Johon lungina lan khum maka.

²⁵Hatuka Johon a zolai ngai lehan Juda mi khat anthiangna dan ruia ankhal u na.

²⁶Hava suale Johon koma ahong u na, “Rabbi, Jordon varala na bila a om, arui nei rilpu han, enta, sova son baptisma a peka, mi dora ama kom ase zit zei,” ava ti u na.

²⁷Hataka Johonin, “Van ata Pathian pek ani nok anten, miringin ite ei nei om mak.

²⁸‘Koi chu Krista ni makung, ama a matona aleia hong ranga alei hong antir keng ka ni, atina kei na ril u ha nangni ngai len ha ariat na la ni u.’

²⁹Muisa ava ruai chu makpa anina, makpa amal han akola anding chiana makpa chong ei rangaia achan arai ei lei man san; havan tin anga han ka raisanna ei tung ani zei.

³⁰Ama chu lan son riam intia, ten koi chu lan kei tir ka tinga.” atina a masanga.

³¹Chung tiang ata ahongpu chu alom reng chunga alian khit ani na ramual ata ahonga suak aniten, ama chu ramual mi anina, hanuk ramual rui um ei ril. Van ata ahong chu alom reng chunga alian khit ani.

³²Aman chu ei mu le ei riat ngai keng ei na manriat; tenchu ei riat ngai tute apom pe om mak.

³³Ama ei ril ngai apom tak chu Pathian chu atak ani ati na, mor azema.

³⁴Asik chu Pathianin ei hong tir tak chu Pathian chong keng ei ril, asik chu Pathianin Ratha hi amai chaka ei pek ni mak.

³⁵Pa han Naipasal adita, ama kuta aloma apek zita.

³⁶Naipasal a iam tak pei chu taituan damna aman sua zei, tenchu Naipasal atel nok tak chu damna mu thei lai no ni, haneka Pathian taksitna achunga a om keng ani zei.