Read Ranglong JOHONIN 6 Bible Online

JOHONIN 6 - Ranglong bible

JOHONIN 6

¹Hava suale Isua chu Galili tindil sontiang varala, Tiberi tindil ei ti u han asena.

²Ana atampa tak chunga boidong sin ei thona ei mandam ei mu u sika mipui atampan anuk azi u na.

³Hatuka Isua chu muala ava kala hava han a zolai ngai bila avan suta.

⁵Isua anhoia, mipui atampa ama tiang ei hong pan u alei muna, aman Philip akom, “Hiva ngai ei nek u rang ei hun rak na rang bu hontiangmo rachok u ma ni” ati na.

⁶Hiva chong hi Philip ei mansinna ranga ei ti keng, ei tho rang chu aman ei riat zet sa keng.

⁷Philip han, “Alak tete ngala ei chang chip u na ranga chu siki raza anni ngala hun no ni hile,” atia a masanga.

⁸A zolai bila angkhat Simon Pitor a naipa Andria han akoma ei ti:

⁹“Hiva hin pasal sanaite khatin vaipol ranga le nga anni adon, tenchu hiva te le chu hidor mitampa ranga chu hun thak no ni,” ati na.

¹⁰Hatuka Isuan, “Mi dora man sut kiar u ro,” ati pe na. Hava mun han chiak atampa a oma, hava han aloma ansut u na ei tam u chu asang ranga tang ani.

¹¹Hatuka Isuan, vaipol alaka, raisan chong aman tung suale ansut ngai koma asena. Havantin ang den han nga ham athona ei sak thei dor pei asak u na.

¹²Hatuka abang zit sua u le a zolai ngai rang, “Ei siat nokna ranga anniang ngai dora mankhom zit u ro,” ati na.

¹³Hatuka mipuiin anek asak vang suale ava mankhom u na, ha vaipol ranga bak ata a maniang chian ha ralei somleianni ala ni.

¹⁴Havantin han Isuan boidong khap sin ei tho amu u na havana mi ngaiin, “Ramuala ala hong ranga deari ha ni nget inti!” ati u na.

¹⁵Hava suale chu havantin han ei ni rang ha Isuan alei riat zet sa chu hong untia therkhakhaka ama ha surtita reng la hong manchang zot unti. Hasik han ama rong muala ei va kal retna ani.

¹⁶Khului ahonga ni le chu Isua a zolai ngai chu tindila ava chum u na,

¹⁷rakuanga achuang u na, tindil varala Kapernaum tiang ase u na. Zan ahonga zing zeia, tenchu Isua amani kom la hong suak mak.

¹⁸Hatuka achalaka thinthin rik ei hong sika han tiduar ansok sabaka.

¹⁹A zolai ngai chu rakuanga mel ranga ata mel aruk ten ase sua u le Isua ti chunga kal ahong choia arakuang u ahonga nai u le chu aleia chi sabak u na.

²⁰Tenchu Isuan, “Achi u no ro, koi keng ka ni,” amani kom ati pe na.

²¹Hatuka ama chu rakuanga anchuang ranga azot u na, hankeng rakuang chu ei se u na rang mun chu ava suak lena.

²²Zing khua vara tindil sontiang varala mipui anding ngaiin rakuang ang khat bara atei om mak ti ariat u na, hatuka Isua chu a zolai ngai bila rakuanga chuang maka tenchu a zolai ngai rong keng ase u tina ariat u na.

²³Rakuang atei Tiberia ata, Puman raisan chong aman tung suale mipuiin vaipol ei sak u na mun kola ahonga tunga,

²⁴Mipuiin hava han Isua le a zolai ngai ei bui u ariat sua u le chu amanim hava rakuanga achuanga ama a van rok ranga Kapernauma ase u na.

²⁵Hatuka tindil varala Isua ava mu u le chu amanin, “Rabbi, hiva hin itika aleia hong mo na ni?” ati u na.

²⁶Hatuka Isuan, “Atak taka keina ti ani u zei boidong sin kei tho omzia riata neina rok ni u mak che tenchu vaipol nei saka nei khop u sika neina rok u keng.

²⁷Sak asiata anpei mei thei sika pong u no ro ba, hanek ten Miring Sapan ei pek rang taituan tenpeia damna sak ranga pong u ro, asik chu Pa Pathianin ama tak chunga han andangna le ei hem sua ani zei,” ati pe na.

²⁸Hatuka amani han akoma, “Pathian ei zot zat sin nei tho theina ranga koini le imo nei tho rang?” atia arakel u na.

²⁹Isuan akom u na, “Pathianin nei tho u rang ei na zot u chu ama ei hong tirpu tak aleia iam,” ati na a masanga.

³⁰Hatuka amanin akoma, “Hong zat boidongna sin nei tho neina mu na mo nei iam u rang? I ang sin mo nei tho? atia amasang ret u na.

³¹Koini na chipui ngaiin chu philchar rama manna ei sak u, rui marua lekhabuna anziak anga, ‘Asak rang anvan ata amani rang ei hong pek,’ ” ei ti.

³²Isuan, “Atak taka keina ti ani u zei, van ata sak nek nei man u ha Mosin ei na pek u nimak, ka Pa ha keng anvan ata sak atak tak ana pek u.

³³Pathianin sak nek ei na pek chu van ata ahonga chuma ramual mi dora ranga damna apek ha keng,” ati pe na.

³⁴“Ka pu, hanok ten hava ang sak na pek babang ro ba,” ati u na.

³⁵Isuan, “Koi hi damna bu ka ni zei, ka koma ahong tak chu avon ancham lai no ni, Koi a na iam tak chu ati anral thak lai no ni.

³⁶Atun nangni ngaiin neina mu sua u ka ni nam nisela na iam thei u mak che.

³⁷Ka Pa han ei na pek ngai dora chu ka koma hong kiar unti, hatuka ka koma ahong dora chu lei makhir lai no ning,

³⁸Asik chu kei zot atho ranga van ata ahonga chum ni makung, tenchu anatirpu ei zot atho ranga ahonga chum ka ni.

³⁹Aman ei na pek ngai dora angkhat te ngal ei anpei noka, haneka nikhua hek tika aloma kei mathui kiar rang hi ana tirpu ei zot chu ani.

⁴⁰Asik chu Naipasal amuna ama a iam tak pei chu taituan damna ei man rang ha Ka Pa ei zot ani, hanuk chu nikhua hek tika kei mathui kiar rang ala ni,” ati pe na.

⁴¹Van ata sak ahonga chum ha, “Koi ka ni zei,” ei ti sika han Juda mi ngaiin ama asiat aril u na.

⁴²Hasik han amani han, “Ama hi Joseph a naipasal Isua ha nimak mo? A nu le a pa ham nei riat ani. Hanle atun van ata ahong chum ke hontinmo ei anti thei?”

⁴³Isuan amani kom, “Nangni le nangni siat anril ha bang u ro.

⁴⁴Pa ana honga tirpu kuina nokten tute ka kom hong thei no ni hatuka nikhua hek tika la mathui kiar ret u ka ting.

⁴⁵Deari ngaiin lekhabuna, ‘Pathian ata alom u na anchuna la man unti, Pa ha ariata ama kom anchu tak pei chu ka kom hong inti.’

⁴⁶Pa hi amu zit tinam ni mak. Pathian ata ahong rong keng Pa chu amu.

⁴⁷Atak tak kei na ti ani u zei, a iam tak pei chu taituan damna achang sua zei.

⁴⁸Koi hi damna sak ka ni.

⁴⁹Nangni na chipui ngaiin philchar rama manna chu asak u tenchu athi zit u.

⁵⁰Van ata ahonga chum sak omzia tak chu mitinin sak inti tenchu thi u no ni.

⁵¹Koi hi damna sak van ata ahonga chum ka ni zei. Hiva sak anek tak chu taituana dam inti. Hatuka asak rua kei pek rang tak ha ka taksa ani, hava ha ramual mitin ei dam thei na ranga,” ati na a masanga.

⁵²Hasik han Juda mi ngai amani le amani achan ankhal u na, hatuka amanin, “Hiva mi hin hontin ngal mo a taksa asak ranga ei na pek thei rang?” anti u na.

⁵³Isuan akom u na, “Atak taka kei ti ani u zei, Miring Sapa a taksa sak lui le a thisen buang lui chu nangni na han damna om mak.

⁵⁴Ka taksa asaka ka thisen abuang ten taituan damna achang zei, hatuka nikhua hek tika la mathui kiar u ka ting.

⁵⁵Asik chu ka taksa hi sak tatak le ka thisen hi abuang rua tatak ani.

⁵⁶Ka taksa asaka, ka thisen abuang tak pei chu koia a om keng hatuka koi um abil u na kei om.

⁵⁷Pa adam han ei na hong tir, hatuka Pa zara adam kei ni anga, koi ana sak tak chu ka zara dam inti.

⁵⁸Hiva hi van ata sak ahonga chum ani. Na chipui u ngaiin ei saka ei thi u na zat ang ni mak. Hiva sak asak tak chu taituana dam inti,” ati na.

⁵⁹Kapernaum anchunna ina a manchu lai han hiva chong hi Isuan ei ril.

⁶⁰A zolai ngai bila atam riaiin ariat sua u le chu, “Hiva chong antak sabak ani, tumo apom thei rang?” ati u na.

⁶¹Amani ngai han hiva ruia ei anbuai u ha Isuan a lei riat thei le chu amani rang, “Hiva ruia hi na malung ei na manbuai u mo?

⁶²Hanle Miring Sapa hi ei omna mun dena akala ei se na mu un le imo nei ti u rang?

⁶³Damna apek thei chu Pathian Ratha ani. Taksa chu ite ei nemna om mak. Na kom u na hiva chong kei ril sua ngai hi Pathian Rathan ei pek damna ani.

⁶⁴Hanum nisela, nangni kara senkhatin chu a iam nok na la om u na,” ati na. Asik chu Isuan, man ata tutu mo a iam nok rang le ama ansur rang ha ei lei riat sua ani.

⁶⁵Hatuka Isuan ei ril sana amani rang ei ti pe chu, “Pa in thotheina apek nok ten tuten ka kom ahong thei rang om u mak che.”

⁶⁶Hiva sika hin Isua a zolai atam riaiin anuk ankei u na, hava bara chu anuk va zi u lai mak.

⁶⁷Hasik han a zolai somleianni ngai rang, “Hanle nangni ngaiin um mo nei na mak u rang?” ati na a rakela.

⁶⁸Hatuka Simon Pitorin, “Puma, koini hi tu kom mo nei se rang? Nang na koma ro taituan damna chong ei om.

⁶⁹Nang hi Pathian ata ahong anthiang khat na ni ti nei na riat le nei na iam ani zei,” ati na a masanga.

⁷⁰Hatuka Isuan, “Nangni somleianni ngai hi kei na thang ni u mak che mo? Hanum nisela na bil u nam diabol khat na la om ret u,” atia amasanga.

⁷¹Ama han Iskariot Simon a naipasal Juda aruia chong ei hong ril ani. Asik chu ama hi a zolai somleianni bila ang khat ani nam ama han laman sur inti.