Read Ranglong JOHONIN 8 Bible Online

JOHONIN 8 - Ranglong bible

JOHONIN 8

¹Hava suale chu mi ngai chu a in chipa ase u na, ten Isua chu Oliv muala ava kala.

²Hanuk nikhua zing sabaka ama chu Biakina ahong reta, hatuka mi tampan ahong pan u na hankeng aman alei manchuna.

³Hatuka mi Dan anchu ngai le Pharisi ngaiin uiare lai taka ei va sur u nupang khat chu ahong ruai u na mi matona amanding u na.

⁴Hatuka amani han Isua koma, “Minchupu, hiva nupang hi uiare lai taka ei sur u ani.

⁵Dan lekhabuna chu Mosin, hiva ang uiare nupang chu lung adenga athat ranga chong ei na pek chachak, atun nang le imo na ti?” ati u na.

⁶Amani han Isua asia ei manlo thei u na ranga ansinna chong ei ril u ani, tenchu Isua anbuna a kutchal le phila a maziaka.

⁷Hantin han amani han ei rakel ret u sika ama chu chung atanga akom u na, “Hano ten nangni bila masial don lui khitin lung deng mansa rase,” ati pe na.

⁸Hatuka ama chu anbutita a kutchal le phil amaziak reta.

⁹Havantin han chong ariat u le chu ang kha khata ase u na, ulian khit len ata ahek tenpei ase zit u na, hatuka Isua chu athei daka le alai u na ei manding u nupang lehan amak u na.

¹⁰Hankeng Isua chung atang reta nupang rang ati pena, “Honmo ei pan un zei? Tute asia anan lo thei om u lai mak mo?”

¹¹“Puma, tute asia anan lo om lai mak,” tina a masanga. Hatuka Isuan, “Koi um asia na man lo lai makung, se ta ro, tenchu asia va tho lai no ro,” ati pe na.

¹²Isuan Pharisi ngai koma chong aril reta, “Koi hi maniapur ra-ang ka ni, koi ana zi tak chu azing kara leng no ni, tenchu damna ra-ang man inti,” atipena.

¹³Hava chonga han Pharisi ngaiin akoma, “Nang na ning rui keng nei man riat, nei man riat ha adik ni mak,” ati u na.

¹⁴Isuan akom u na amasang reta atina, “Ni mak, ka ning rui kei man riat ani ngalam kei man riatna hi adik keng. Asik chu kei hongna le kei se retna rang ka riat. Tenchu hovan ata ahong mo nangnin chu riat u mak che.

¹⁵Nangnin chu taksa ruirila nei ril u chachak, koi chu tute rui ril makung.

¹⁶Tenchu ruiril ngal inlang, ka rui ril chu adik keng, asik chu ka thei dak ni makung, Pa ana honga tirpu ka bila a om keng.

¹⁷Hanuk nangni Dan lekhabu nam, mi annin ei man riat chu adik atia anziak keng.

¹⁸Ka ninga rui anriatpu ka nina, Pa ana honga tirpu hanin um ka rui ei hong man riat,” ati na.

¹⁹“Na pa chu honmo ei om?” ati na arakel u na. “Koi um na riat u mak che ka Pa ham riat u mak che,” ati na Isuan a masanga. “Koi neina riat u ani ten ka Pa ham nei riat u ranga chong ani na.”

²⁰Isuan Biakina a manchu lai han hiva chong ngai hi neinun antet ansiakna muna ei ril ani. Ahun ei la suak nok sika ama chu tuten asur om mak.

²¹Isuan akom u na ati reta, “A se rang ka ni zei, na la rok un na ti, hatuka na pap u sika thi u na ti. Kei se nana hong thei u no ta ni.”

²²Hatuka Juda ulian ngaiin, “Kei se na taka hong thei u no ta ni ei ti hi aninga anthat ranga ei ti na mo tak,” ati u na.

²³Hataka Isuan akom u na, “Nangni chu thuai tiang ata anthok keng na ni u, koi chu chung tiang ata ahong keng ka ni. Nangni chu ramual ata na ni u, ten koi chu hi ramual ata anthok ni makung.

²⁴Hasik han na pap u sika la thi un na ti, hatuka koi hi Ama ka ni zei, atia na iam u nok ten na pap u ngai sika la thi un na ti atia hiva chong hi keina ril u ani zei,” atia a masanga.

²⁵“Nang hi tumo na ni?” atina arakel u na. Isuan, “Hasik han ro aphut ata kei na ril u.

²⁶Nangni ngai ruia aril rua le adem rua atampa ka don, Hanum nisela koi ana honga tirpu chu atak ani, hatuka ama ata kei riat lim keng ramual komam kei ril,” ati na a masanga.

²⁷Isuan Pa ruia ei ril pe ha amanin lei riat pe thei u lai mak.

²⁸Hasik han aman akom u na, “Miring Sapa na mansang utik le chu, ‘Koi hi ama,’ atia la riat un na ti. Hatuka ka ninga kei tho ite om mak, tenchu Pa han ei na manchu ngai lehan keng keina ril atia la riat un na ti.

²⁹Koi ana honga tirpu chu ka bibila aom keng, aman ka bil na man vang mak, ama ei zot zat sin kei tho sika.”

³⁰Hiva chong ngai aril suale chu mi tampa han ahong iam u na.

³¹Hasik han, Isuan ama a iam ngai rang, “Nangnin ka chong anga na om uten ka ruaisi na ni u.

³²Atak chu la riat un na ti hatuka atakin na la mazok unti,” ati na.

³³Amani han, “Koini hi Abraham achi keng na ni, tute suak la hong chang ngai mak me, hanle nangin hontinmo la zok un na ti nei na ti?” atia amasang u na.

³⁴Isuan amani rang, “Ataka keina ril ani u zei, pap atho tak chu pap suaka a om keng.

³⁵Hatuka suak hi a in sungkua mi changa om len ngai mak tenchu a naipasal ha keng a om len.

³⁶Hasik han naipasalin ana mazok u ten atak taka azok la ni un na ti.

³⁷Abraham achi nei ni u ka na riat u, tenchu ana thatna neina val u, asik chu ka chong ha na malung tatakin ei pom ni u mak.

³⁸Ka Pa han ei na manmu ngai rong ha keng keina ril u, tenchu nangnin chu na Pa ngai koma nei riat ha keng nei tho u,” ati na.

³⁹Amanin, “Koini na pa chu Abraham keng do,” ati na amasang u na. Hatuka Isuan, “Abraham a nai na ni uten ama ei tho ang keng nei tho u rang ni inti hale.

⁴⁰Pathian kom ata atak ariat chunga nangni ngai keina ti ani u zei, athatna neina val nget u chu ka ni, tenchu Abrahamin chu hantin han tho mak!

⁴¹Nangnin chu na pa u ngai ei tho keng nei tho u hile,” ati pe na. Amani han a koma, “Koinin Pa khat dak na nei ama ha Pathian hatuka koini hi ama asanai ngai na ni zei,” ati u na.

⁴²Isuan akom u na, “Pathian hi atak taka na Pa u ani ten neina dit nget u rang ni inti, asik chu Pathian ata ahong ka ni, atun um ka la om, tenchu ka ning barchana ahong ni makung ama keng anan hong.

⁴³Ichangamo ka chong nei riat thei u nok? Hava asik chu ka chong ril ha na kom u na omzia nei ranga nei rangai ni u mak.

⁴⁴Nangni ngai hi chu na pa u Diabol a nai keng na ni u hatuka na pa u ei zot ha keng azi ranga nei anphal u. Ama chu man ata mi that anina, atak chungam atak reng ei bui sika atak tiang om ngai mak, asik chu ama chu milak athei le milak pa ei ni sika milak ei ril dora ama aninga ei ril ani.

⁴⁵Chong atak kei na ril u sika neina iam u nok.

⁴⁶Tumo koi hi mi salui atia asia anan lo thei rang na ni u? Chong hi atak ka na ril u nam mo neina iam u thei lai nok?

⁴⁷Pathian ata ahong chu Pathian chong ngai dora ariata, tenchu nangni chu Pathian ata neini u nok sika nei rangai zot u nok,” ati na.

⁴⁸Juda mi ngaiin akoma, “Nang hi Samari le kachai adon khat na ni nei na ti hi dik mak mo?” atina amasang u na.

⁴⁹Isuan, “Kachai ni makung,” ati na amasang reta. “Ka Pa lalchi atho mi ka ni, tenchu nangnin chu lalchi neina manruai u nok.

⁵⁰Hasik han ka ninga anlianna anrok ni makung, tenchu anrokpu le rui arilpu khat chu a om.

⁵¹Isuan ataka keina ril ani u zei, ka chong atel tak chu thina mulai no ni,” ati na.

⁵²Hatuka amani han, “Atun lam chu kachai adon tatak na ni ti na na riat zei. Abraham athi zeia, deari ngai um athi sua u zei, atun nangin nang na chong atel tak chu thina tem lai no ni nei la ti ret na.

⁵³Na chipui koini na pa Abraham athi sua neka alian mo na ni? Deari ngai um thi sua u zeia, hanle nang hi tu ang ngala mo nei anbe?” ati u na.

⁵⁴Isuan, “Ka ninga kei anpak ani ten, Kei anpakna ite alam lua no ni. Nangnin na Pathian atina arui nei ril khit u ha ka Pa, ama ha keng anan lal.

⁵⁵Ama ha nangnin chu la riat u ngai mak che tenchu koiin chu ka riat. Ama hi riat makung ka ti ten nangni ang milak atheia anlo ka ti. Tenchu ama hi ka riata hatuka achong atel mi ka ni.

⁵⁶Na chipui u Abrahamin anikhua amu ranga raisan ei lei ansak, hatuka hava nikhua ha amuna arai asana,” ati na a masanga.

⁵⁷Juda mi ngai akoma, “Na kum kum somranga ngal nei la kei noka nangin Abraham amu nei lei chang?” ati u na.

⁵⁸Isuan, “Atak taka keina ti ani u zei, ‘Abraham anzir mana aleia om sua ka ni.’ ”

⁵⁹Hatuka lung le adeng ranga lung arut u le chu Isua chu Biakin amaka aninga anpei vata.