Read Ranglong JOHONIN 9 Bible Online

JOHONIN 9 - Ranglong bible

JOHONIN 9

¹Isua kal achoia ei se tir na na anzir ata acho khat ava muna.

²Hatuka a zolai ngaiin, “Minchupu tu ei masiala mo hiva mi hi achona ei hong anzir, ama aninga masiala mo ole a nu le a pa masiala mo?” ati na arakel u na.

³Isuan, “Aman ei masial um ni mak, a nu le a pan ei masial atam ni mak, tenchu ama na han Pathian sinthotheina ranak ei anlang theina ranga keng.

⁴Sun ani kar pei chu ana honga tirpu asin nei tho pe nget rang ani, zan ahonga zing ten tuten sin atho thei om mak.

⁵Ramuala kei la om, hasik han ramual ra-ang kei la ni,” atina a masanga.

⁶Hiva chong aril suale Isuan amachil le phil a manpoka, hatuka aman philpok amit apele pe ziaka,

⁷hatuka, “Siloam tindila se tan na mai va phia ro,” ati pe na. Siloam ti na chu “Atir” ti na ani. Hatuka hava mi ha asena a mai ava phia suale chu a mit avar chunga a honga kira.

⁸Hava suale chu a unai ngai hanuk akut ei dona ei zong ahonga mu ngai doran, “Hiva mi hi ansuta kutado chachak ha ni mak mo?” ati na arakel u na.

⁹Senkhatin, “Ani ama ha keng,” ati a oma, hanuk senkhat retin, “Ama ni mak ama anga chu aphua viai,” ati ham a om u na. Tenchu hava mi lenin, “Ama ha koi ka ni zei,” ati na.

¹⁰Amani han, “Hanle atun hontinmo nei mu thei?” ati na arakel u na.

¹¹Hatuka ama han, “Isua atina mi khat a oma, ama han phil a manpoka hava ha ka mita ana pele pe na hatuka Siloama asena ka mai ava phia ranga ana tira. Hatuka ka sena kei va phia le kei hong mu len thei ani zei,” ati na.

¹²“Hanle ama ha hovanmo ei om?” ati na arakel u na. “Riat lai makung,” ati na a masanga.

¹³Hatuka amit acho ha chu Pharisi ngai koma atuang u na;

¹⁴Isuan philpok le a mit acho a mandam ni ha Pongansana nikhua anthiang ani.

¹⁵Pharisi ngaiin athara, hontinmo mit varna nei chang? atina arakel ret u na. Ama han, “Philpok alak laka ka mita apele na, hatuka mai ka va phiana atun chu kei hong mu ani zei,” ati na.

¹⁶Pharisi senkhatin, “Hiva sin a tho mi hi Pathian ata ni no ni, asik chu Pathian nikhua anthiang riti tel mak,” ati u na. Hanuk senkhat ret in, “Hanle hontinmo, mi salui khatin hiva zat boidong sin ei tho thei?” ati u na. Hantin han amani ngai kara ansenna a suaka.

¹⁷Hava suale Pharisi ngaiin, “Ama han ka mit acho a na man dam pe nei ti adik, hanle nangin ama rui a nang le imo na ti?” a tina arakel sir u na. Hatuka ama han, “Ama chu deari khat a ni,” ati na a masanga.

¹⁸Hanum nisela Juda ulian ngaiin ama a nu le a pa a vapai u maseng chu a mit acho ata atun ei var pe ti ha la iam zot u mak.

¹⁹Hatuka, “Ama hi na naipasal u mo? ati na arakel u na ama hi anzir ata acho nei ti u, hanle hontinmo aman atun ei mu thei?”

²⁰Hatuka a nu le a pa han, “Na riat, koini na naipasal ani hatuka anzir ata a mit ei cho ham na riat.

²¹Hontinmo ei hong mu thei hanuk tumo a mit ei cho anvar pe koinin ti thei no ma ni. Ama lam rakel u ro. A kum ham ahong atam zeia hatuka aman ei nang chu ti bo ni!” ti na amasang u na.

²²Hasik han ama a nu le a pa han Juda ulian ngai ei achi u sika hava chong ei ril u. Asik chu Juda ngaiin Isua Messia atina a iam tak pei chu ei suak rang rui aleia chat ani na.

²³Havasika ama a nu le a pa han, “A kum um a hong atam zei ama lam rakel u ro,” ei ti u na ani.

²⁴Amani han, a voi annina na a mit acho ha a pai ret u na, “Pathian makunga khomak ansam banga atak taka na ril ro, koinin chu a nan dampu ha mi salui atina na riat,” ati na arakel ret u na.

²⁵Ama han, “Hanle mi salui ei ni le ei ni nok koiin ite riat makung tenchu kei riat khat chu mit acho kei ni tenchu atun kei hong muthei ani zei,” ati na a masanga.

²⁶Ama han, “Hanle imo ei na tho pe? Hatuka hontinmo nei cho ata ei na man dam pe,” ati na arakel u na.

²⁷Hatuka aman, “Ka na ril zit u zei tenchu ariat rang nei zot u nok. Hanle atun ariat ret ranga ichangamo nei zot u? Nangni ngai um mo ama a ruaisi achang ranga nei zot u ani zei?” ati na a masanga.

²⁸Hatuka amani han ango u na, “Nang chu ama a ruaisi, koini chu Mosi a ruaisi keng na ni.

²⁹Koinin chu nei riat Pathianin Mosi ei chong pui tenchu ama ha hovan ata a hongmo riat mak me!” ati pe u na.

³⁰“Hava mi ha, hovan ata a hong mo hava ha nangnin nei riat u nok tenchu ama han ka mit ei na man var pe boidong khapna chu ani.

³¹Pathianin mi salui ngai he rangai mak ati na nei riat tenchu Pathian lalchi a tho tak le ama ei zot dan a tho ngai he keng ei rangai.

³²Ramuala tuten anzir ata a mit acho aman var thei ati hi la riat ngai mak me.

³³Pathian ata a hong a ni nok anten aman hintin hin tho thei no ni,” ati na a masanga.

³⁴Amani han, “Mi salui nei ni chunga nei hong anzir nei lian um hantin han hava sunga nangin koini ngai ha keng nei na la manchu ret?” ati u na. Hava suale ama ha Sinagogue ata arahok u na.

³⁵Hatuka Isuan, ama ei tong rui ariat hatuka ama ha ava muna, “Hanle Miring Sapa hi na iam mo?” ati na a rakela.

³⁶Hatuka ama han, “Ka pu, ama ha kei iam theina ranga ama ha tumo na ril di ro ba?” ati na a masanga.

³⁷Isuan a koma, “Ama ha na mu sua zei hatuka atuna nang ana chong pui ha ama ani zei,” ati na.

³⁸Hatuka ama han, “Puma, ka iam zei,” ati na Isua ke kunga avan boka.

³⁹Hava lai taka Isuan, “Hi ramual rui aril ranga a hong keng ka ni, mu thei lui ngai ei mu theina ranga ani hanuk amu ngai amit ei zing thei u na ranga,” ati na.

⁴⁰Ama bila Pharisi senkhat a om ngai han hava chong ngai dora ariat u na hatuka ama rang, “Hanle atak taka koini ngai um mitacho mo na ni zei?” ati u na.

⁴¹Isuan, “Mitacho na ni uten masial nei u no ta ni ba, tenchu koini chu na mit avar keng nei ti u hava sika han masial nei nei u na,” ati na amasang.