Read Ranglong KUITIR 10 Bible Online

KUITIR 10 - Ranglong bible

KUITIR 10

¹Kaisari na Kornelia atia mi khat a om ama hi, “Itali sipai ngai bila mi khat raza ruaipu.”

²Ama hi Pathian abiak khat ei ni a inkote u Pathian ei achi u. Mi achan ei pek hanuk Pathian kom bor azonga anzom mi ani.

³Nikhat chu chonuk tiang dar anthum dama ama ha ramang anga anthiang vanga ei mu Pathian vanpalai khat a kom asunga, “Kornelia,” ahong ti.

⁴Hanke aman a matiang a ena a chi, “Puma imo nei zong?” ati. Vanpalaiin ama rang, “Na borzong le nei pek ngai a riattitrua anga chunga Pathian makunga a tung zei ati pe.

⁵Hatuka atun Joppa na mi tir tan Simon, Pitor anti ha ama ha va man kui ro.

⁶Ama ha Simon atia angkhat mevun sin a tho ina a om ama in tipuilian kola a om.”

⁷Kornelia le chong vanpalai ha ase suale Kornelia ina suak ngai bila anni hanuk a dorbondom babang ngai bila angkhat hetel sipai,

⁸a paia hatuka hangai ha chong ngai dora arila Joppa na aman se.

⁹Hanuk zing khuavar nikhuana amani ha lampuia ase tir u na kho kola ava suak u na hava han Pitor sunchim dama bor azong ranga inchung tadana han a kala.

¹⁰A von anchama a sak lak rang a zot zei. Tenchu min bu an a tho lai tak hava han ama ha mongkophila a oma.

¹¹Hatuka ei mu anvan anlonga hanke puan alian khat anga kok ahonga chum hava ha kil manlina a sura phila ansuma.

¹²Hatuka hava han phil chunga sakemanli tin le khaisuk khaiphar hanuk anvana va a om.

¹³Nuka ama ranga hiva chong hi ei riat, “Anthui ro Pitor that tan sa ro.”

¹⁴Tenchu Pitorin, “Puma hantin han ni no rase, koi hi anthiang nok annim neinun la sa ngai makung,” ei ti.

¹⁵Hanke voi annina ama chunga hiva hi he ei om ret, “Pathianin ei manthiang ha chu nangin hava ha anthiang mak ti no ro.”

¹⁶Hantin han voi anthum ei ni nuka han len han hava kok ha anvana a doma a choi.

¹⁷Pitor ha anralna ei mu ha imo a omzia ei ni rang hava ruia a malunga amandon lai tak en ta, Kornelia ei tir mi ngaiin Simon a in a roka suakkhar makota a honga anding u.

¹⁸Hatuka apai u na arakel u, “Simon Pitor anti ha ama ha hivanmo ei om?” ati u na.

¹⁹Pitor ha anralna ei mu rui a mandon lai tak, Rathan ei ti, “En ta, mi anthumin nang ana rok.

²⁰Tenchu anthui tan thuaia va chum ro abil u na se ro. Alak te ngal malung manring no ro asik chu koi ke hangai ha a honga tir.”

²¹Hanke Pitor ha mi ngai kom achuma asena ei va ti, “En ta, neia rok u ha koi hi ka ni zei, ati pe hong rang mo nei hong u,” ati.

²²Amanin a ti u, “Raza ruaipu Kornelia ha mi dik khat Pathian anchi hanuk Juda nam laia raming anthang ama ha vanpalai anthiang lehan chong ei man, nang hi vakuia, hong tuanga, nang na mura chong ariat ranga.”

²³Hanke Pitorin amani ha a sunga aman kui khual aman chang, hanuk nikhua anthuia ama ha amani bila ase hatuka Joppa na a unai ngai bilam hozetmo chu ama bila ase.

²⁴Hanuk nikhua hangai ha Kaisari na a lut u hava han Kornelia atianga mi le unai le amal ngai ha a paia a manchuna amani ha ei maruang u.

²⁵Nuka Pitor a lut le hava han Kornelia ama le anmuna ake kunga anboka amok.

²⁶Tenchu Pitor ama ha a mathuia ei ti, “Anthui ro, nang um mi koi um mi.”

²⁷Nuka aman ama lehan a chong tira a luta mi tampa anchun ava mu.

²⁸Hava han aman hangai ei ti, “Nangnin na riat u nam atei mi le anlop le ase Juda mi ranga itukmo achuk nok tenchu Pathianin ei na manmu mi khat pei ha anthiang lui ati mo annim mo ati sa lui.

²⁹Hava sika koi hi ei na paia ei na hong tir, koiin nial luia kei hong atun keina rakel u ni zei nangni isikmo nei na man kui u?”

³⁰Hanke Kornelian ei ti, “Avian ni manli ani zei atun ang hin ka ina dar anthum dama bor kei zong hava lai tak han enta, ra-ang a nei puan ansila pasal khat ka makunga anding.

³¹Aman ei ti, ‘Kornelia na borzong an pom zei hanuk nei pek ngai dora Pathian matona anriat zei.’

³²Hantin han Joppa na mi tir tan Simon Pitor anti ha ama ha va manpaia hong mantuang ro ama ha tipuilian kola Simon mevun a sin ina a om, atia.

³³Hasik han anrapa na kom mi kei hong tir, na honga a asa sabak nei tho, hasik han atun koinin na loma Pathian matona nei hong suaka nei om. Puman nang ha chong ei na pek dora ha rangai inti.”

³⁴Hanke Pitor abai a malonga ei ril, “Ata taka ka riat zei Pathianin mit mai lek mak.

³⁵Tenchu nam tina ama anchi tak chu om adik a tho ha aman a pom.

³⁶Aman Isarel nai ngai kom chong khat a mathuana Isua Krista lehan anngoina thangahui ei hong ril ama hi loko Puma.

³⁷Nangnin ha chong ha na riat u Johonin ei ril baptisma, nuka Galili ata anphuta Judai ram dora a bit.

³⁸Hantin han Nazaret Isua chong hontinmo Pathianin ama ha Ratha Anthianga le sinthotheina le ei phun ama ha sin asa thona ei chei hanke Diabolin ei pheneng mi ngai dora ei mandam asik chu Pathian ama kom ei om.

³⁹Hatuka aman Juda ngai lampuia le Jerusalema ei tho ngai dora ha koinin na riat zit hanuk min ama ha thinga ei mathoi u na ei that u.

⁴⁰Ama tak ha Pathianin nin thuma ei mathui hanuk ei manlanga ei man en.

⁴¹Mi dora kom ei anlang ni mak. Tenchu mana Pathian ata anphun le ariat ngai ha koini kom ei anlang hatuka koinin athi ngai bil ata anthuiret suale ama bila nek sak nei tho.

⁴²Hatuka aman chong ei na pek koinin mi ngai kom nei ril rang le anriat ranga ama ha Pathianin a dam le athi ngai rui rila ei phun.

⁴³Ama rang ha deari ngai doran ei ril ama a iam tak chu ama raming le asia saina ei man.”

⁴⁴Pitorin hiva chong aril lai tak han chong anngai ngai dora chunga Ratha Anthiang achul.

⁴⁵Hava han Pitor abila a hong a iam vun at mi ngai dora anlai u asik chu Jentail ngai chunga Ratha Anthiang pek ha a hong anthek.

⁴⁶Asik chu amanin, hangai ha chong tina ei chonga Pathian lianna anpak ei riat u.

⁴⁷Hanke Pitorin ei masanga, “Hiva mi ngai hi koini anga Ratha Anthiang aman u zei, tumo akhara hiva ngai baptisma chang rang anthei mak om ni mo?”

⁴⁸Hava suale aman Isua Krista raminga amani ha baptisma achang ranga chong a pek hanke amani ha ni hotukmo chu a om rang a mathem u.