Read Ranglong KUITIR 11 Bible Online

KUITIR 11 - Ranglong bible

KUITIR 11

¹Hava suale kuitir ngai le Judai rama unai ngaiin alei riat u na, Jentail mi ngaiin um Pathian chong apom atia.

²Hatuka Pitor Jerusalema ase le hava han vun an at mi ngaiin ama le anrual u na ei ti u,

³“Nang hi vun an at lui ngai ina nei lut hanuk amani bila bu nei nek!” ati u na.

⁴Tenchu Pitorin a phuta amani rang ha abul ata anzom pata a rui ngai ha a manchu na aril.

⁵“Koi hi Joppa khuana borzonga kei om hava lai tak han mongkophila kei oma anralna khat kei man ka ena kei mu, Jani lian pa khat anga a honga chuma hava ha kil manli a sura anvan ata ei hong masum hanuk hava ha ka kom tenpei ahong hava tiang han ka en sadima ka mandona hatuka kei mu havana han phila sakemanli nukanei hatuka rama sa, khaisuk khaiphar le anvana va dora a om.

⁶Ka dep uala asadima ka ena aloma ina om sakemanli dora, ramsa dora le alonlim le chunga azuang va ngai dora ka mu.

⁷Hatuka chong khat um ka riat ei na ril ha, ‘Anthui ro, Pitor that ro sa ro!’

⁸Tenchu kei ti, ‘Puma hantin han ni no rase asik chu anthiang lui annim neinun ite ka bai sunga la manlut ngai makung.’

⁹Tenchu voi annina anvan ata hen ana masanga, ‘Pathianin ei manthiang ha, nangin hava ha anthiang mak ti no ro.’

¹⁰Hantin han voi anthum ei ni. Nuka hava ngai dora ha anvan tiang akal ret.

¹¹Hatuka enta anrappa pasal anthum nei omna ina han hava han ahonga anding u, amani ha Kaisari ata ka kom a hong antir ei ni u.

¹²Hatuka Rathan koi hi iam lui na bui thaka amani bila ase rang ei na ril. Hatuka hiva ka parual mi aruk um ka bila ei hong u, nuka ha mi a ina nei lut.

¹³Aman koini ei na ril hi aman vanpalai khat anralna ei mu ha vanpalai ha a ina han andinga ei ti, ‘Joppa na mi tir tan Simon anti Pitor ha ama ha kuia hong tuang u ro.

¹⁴Aman nang narang chong na ril inti hava lehan nang le na in komi dora zokna man u na ti.’

¹⁵Nuka chong aril ranga ka phut le hontinmo koini chunga ei ni ha hantin han amani chungam Ratha Anthiang ei chul.

¹⁶Hanke Puma a chong ha kei lan thei ei ril anga han: ‘Johonin tia baptisma ei pek. Tenchu Ratha Anthianga baptisma chang un na ti.’

¹⁷Hantin han amanin Puma Isua Krista a iam sua u le hontinmo koini ha, hantin den amanim Pathianin anrual chianga bor ei na pek ani tak anten havan han koi hi tu ngal mo kei ni Pathian kei khar rang?”

¹⁸Hiva chong ngai dora a riat u na a dai rek u. Hanke Pathian ei manpak u na ei ti u, “Hanoten chu Pathianin Jentail mi ngai um damna rang malung anthulna ei pek ke anga!” ei ti u.

¹⁹Hava han Stephan a ruia antak ei tong u sika anthek rak ngai ha amani ha Phoiniki Kupra le Antiokei tenpei a sir apang a chei u na anthek chit u. Juda ngai kom rong chong ei ril u.

²⁰Tenchu amani bila itukmo chu Kupra le Kurini mi ei om hiva ngai hi Antiokei a a hong u na Grik ngai komam chong ei ril u Puma Isua ruia thanga hui aril u.

²¹Hatuka Puma kut amani bila ei oma hanuk a tampa min ei iama Puma tiang ei kir.

²²Nukhona amani rui Jerusalema Kuibing ngai kuara ei van thang. Hava han hangai ha Antiokei tenpei Barnaba ha ei tir u.

²³Ama ha ava suaka Pathian a lungkham ha amuna a rai aman san. Hanuk mi dora ranga chongbe a neia amani ha malung khat a choia Pumana a ngir ranga.

²⁴Asik chu ama ha mi dik hanuk Ratha Anthiang le iamna na abit ei ni hatuka mi tampa Pumana a hong anlop u.

²⁵Hava suale aman Saul anrok ranga Tarsa tiang a pana hanke ama ha amu na Antiokeia a hong tuang.

²⁶Hatuka amani ha kum khat pei kuibinga munkhata ei om u hava han mi tampa ei manchu. Hatuka Antiokeia ruaisi ngai Kristian raming ei anphua mansa u.

²⁷Hava lai tak han Jerusalem ata Antiokei a deari hozetmo ahong.

²⁸Amani bila Agaba atia mi khat anthuia Rathana ei ril, phil chunga maitam hong inti hava ha Klaudian a op lai han ei ni.

²⁹Hava han ruaisi ngai doran ei thei ei nei u anga Juda na unai ngai sanna ranga amani kom anthuan ranga a masat u.

³⁰Hanuk hava ang han sin um ei tho u Barnaba le Saul a kut lehan a tar ngai kom sum ei mathuan u.