Read Ranglong KUITIR 13 Bible Online

KUITIR 13 - Ranglong bible

KUITIR 13

¹Hava han Antiokei khuana kuibinga Barnaba, Simon Negera anti Kurini khuana mi Lukia ngai, le reng Herod a unai Manaen ngai, Saul ngai ani u hoho mo, chu Deari le minchu ei ni u.

²Amani ha Puma dorbondom le bu ngoia ei om u hava han Ratha Anthiangin ei ti, “Barnaba le Saul ha a sin ei tho u na ranga kei pai hava a tho ranga ka ranga atun amani ha nakhai pe u ro.”

³Hanke angoia le borazonga a chung u na kut adap u na hangai ha amathan u.

⁴Hantin han hangai ha Ratha Anthiang le kuitir ei nia Selukia na ase u havan ata rakuang a khek u na Kupra na ase u.

⁵Amani ha Salami na asuak u na Juda ngai anchunna in tina Pathian chong ei ril u hanuk Johon um asan rang a ruai u.

⁶Hatuka hangai ha mualanlan dora na a chei u na Papho khua na asuak u le Juda mi khat mitpialdoi a thei le deari rathol amu u, a raming Bar Isua.

⁷Ama ha ram a oppu Serjia Paul a bila ei om ama hi mi hian khat aman Barnaba le Saul ha a kom a paia Pathian chong anngai rang ati.

⁸Tenchu Eluma ha mitpialdoi a thei, na malet ten hiva hi len hi ama raming omzia, ha ram ruaipu ha iamna ata ankhirna ei vala amani ha ei dui.

⁹Tenchu Saul ama ha Paul um anti Ratha Anthiang abita ama tiang anhoia ei ti,

¹⁰“O zetin le asa nok tin a bit diabol a nai dikna tin anmumak. Puma lampui anlap a leta nei tho mong non mo?

¹¹Atun enta, Puma kut na chunga a om. Na mit chon ti, ra-ang mu tot no ta ni.” Hatuka han len rodo le azingin ama ha a manliana hanke akut asura anruai rang mi arok ti tira a om.

¹²Hava han hava rui ha ram aruaipun a muna Puma rui anchuna chonga ariata anlaia a iam.

¹³Hava suale Paul le ama alom ngai Paphos ata rakuang, akhek u na Pamphulia Porga khuana ava tung u. Hava han Johonin amani ha amaka Jerusalema akir.

¹⁴Tenchu amani ha Perga ata anthok u na Pisidia Antiokei a ava suak u. Hanke Pongansani nikhuana anchunna ina a lut u.

¹⁵Dan le Deari Lekhana a pore suale anchunna ulian ngai han amani ha chong aman se u unai ngai mi ngai bila chong aril rua na don uten ril u ro.

¹⁶Hanke Paul andinga a kut a zapa chong a rila, “O Isarel mi ngai, o Pathian anchi ngai, rangai u ro!

¹⁷Hi Isarel nam hi Pathianin koini na chipui ngai hi ei phuna ei lak hanuk hi nam Aigupta na om lai han hava han amani ha ei mansanga akut arat le havan ata ei masuaka ei hong tuang.

¹⁸Hatuka aman philchar rama kum sommanli amani bibila ei diar.

¹⁹Hanuk aman Kanan rama nam sari eia thoka alu ranga ha nam ngai ram dora amani ha ei pek. Hantin han kum raza manli kum somranga ni inti ase sua.

²⁰Hava hun sung ha kum raza manli kum somranga ani. “Hava suale aman Samuel deari tenpei ruiaril ngai kom ei pek.

²¹Hava suale amanin reng khat ei zong u hava han Pathianin amani ha kum sommanli rang Benjamin achi Kis a naipasal Saul ha ei pek.

²²Nuka aman ama ha akhai a a reng u ranga David ei man piang ama ranga han ei ti: ‘Jessi naipasal David ka man zei. Ama hi ka malung anga mi, aman kei zot dora zi inti.’

²³Ama achi ata Pathian a chongtin anga Israel ranga anzokpu khat ha Isua ha a hong ma suak.

²⁴Ama ahong man ha Johon Israel nam dora koma malung thulna Baptisma ei ril.

²⁵Hatuka Johon a lampui mandang ahek tenpei ei tan ti tira hiva chong hi ei ril. ‘Koi hi tumo na na ti u? Koi ama ni making tenchu enro! Ka nuka mi khat a hong zei, a kekok khitna ri asut rua ngal ni makung.’

²⁶“O unai ngai Abraham akhuka nai ngai. Nangni Pathian anchi dora koini na kom hi zokna chong ei hong antir!

²⁷Asik chu Jerusalema ngai hanuk a ulian u ngai ama ha ei riat u noka hanuk deari chong ngai dora ha, Pongansana nikhua kip ei anpore hava ngai doram ei riat u noka. Ama ha asia ei manlo u na hava ngai dora ei makhip.

²⁸Hatuka thina khop masial aman u nokam, amanin Pilat akom ei zong u ei anthat na rang.

²⁹Hatuka aruia ha chong ngai dora anziak ha hava akip suale ama ha thing ata amasum u na thana a phum u.

³⁰Tenchu Pathianin athi ngai bil ata ama a mathui.

³¹Hatuka ama bila Galili ata Jerusalema a hong ngai ha, amani ha aman nikhua tampa ei anmupui amani hi atun mipui kom ama ariat ei chang.

³²Hatuka mana achipui koma chongtin rui ha koinin nangni hi, hi thang ahui nei ril hi,

³³Pathianin Isua a mathuia koini a nai ngai ranga ha chongtin ha ahong makhip. Sam annina han anziak a om, hintin hin: ‘Nang hi ka Naipasal avian kei na mazir.’

³⁴Hatuka ha athi ata ei mathui ha hatuka ama ha heka se lai no ni hia ruia Pathianin hintin hin ei ti: ‘Nangni rang David chong antin adet anthiang ngai dora na pe u ka ti.’

³⁵Asik chu aman Sam ateiam ei ti, ‘Nangin na mi anthiang ei hek man mu no ta ni.’

³⁶Hantin han David in a rual tak mi ngai bila Pathian ei zek anga sin atho suale ei in, hanke a pa ngai bila ei zala ei la hek.

³⁷Tenchu Pathianin ei mathui tak ha ama ha hekna mumak.

³⁸Hasik han, ‘O unai ngai re u ro hiva mi le hin asia saina nei manthei.

³⁹Hatuka Mosi dana nangnin rui tina ha dikna na nei anchel thei u nok ha, a iam takin ha rui ngai ata hiva mi na dika ei pom.

⁴⁰Hantin han deari lekhabu na ei ril hava ha na chung u na chul lam ni.’

⁴¹‘Eelsel anei ngai, En u ta! anlai u ro hanuk anmoi u ro! Na dam sung u hin sin khat tho ka ti hava sin rui mi aril a om ten lei iam thak u no ta ni!’ “

⁴²A suak ule min a mathem u ha nuka Pongansana nikhuana hava chong ngai dora anril ret ranga.

⁴³Hatuka ei anchun u achin u le Juda le Juda Pathian a biak mi tampan Paul le Barnaba a nu nuka a zi u na amani a chongpui u na Pathian a lungkhamna na adet tit ranga amani ha aril u.

⁴⁴Hanuk Pongansana nikhua na khua na mi dora Pathian chong anngai ranga anchun u.

⁴⁵Tenchu Juda ngaiin mi atampa anchun a mu u na mumaka aleia bit u, hanuk asiat aril chu chunga Paul a chong ei dui u.

⁴⁶Hatuka Paul le Barnaba a ngam sabaka chong ei rila ei ti u, “Na kom u na Pathian chong aril mansa ruia ei ni hava ha ei nang hava ha na henga na pei u tak anten hanuk na ning ringanlon aman nok ruana nan sabei u na en u ro Jentail ngai tiang nan hoi.

⁴⁷Asik chu Puman koini ranga hintin hin ei na ti, ‘Kei na ti ni zei Jentail ngai ra-anga keina manchang. Nang hi ramual rikung tenpei azokna ni ro.’ “

⁴⁸Hava ha ariat u na Jentail ngai arai asan u na Puma chong ha a manpak u na hanuk ringanlon ranga ani ngai ha amanin a iam u.

⁴⁹Hatuka Puma chong hava rama aloma abit zit.

⁵⁰Tenchu Juda ngaiin nupang a hian Pathian andon nupang ngai le ulian ngai rang ha ei malum u na Paul le Barnaba ha anzula ama suak u hanke a rikung u ata hangai ha ei masuak u.

⁵¹Hanke amanin amani ranga ake philvut eia thing u na Ikonia na ei se u.

⁵²Hatuka ruaisi ngai ha raisana le Ratha Anthiang ei bita ei om u.