Read Ranglong KUITIR 14 Bible Online

KUITIR 14 - Ranglong bible

KUITIR 14

¹Nuka Ikonia na hangai ha munkhata Juda ngai anchunna ina ei lut u. Hanke chong ei ril sabaka han Juda le Grik ngai a tampan a iam u.

²Tenchu ha Juda hetel lui ngai ha amanin unai ngai a let tiang Jentail ngai malung ei mathok u na ei lei man mumak u.

³Hantin han amani hi ha muna asotpa a om u Puma a chunga a rang sabaka chong ei ril u. Hatuka amam lungkham amupu achong ei ril amani kut lehan riatna sin le tichangbui sin ei antho.

⁴Hatuka khuana mi ngai mun annina ansem u Juda tiang senkhat, kuitir ngai tiang senkhat ei chang u.

⁵Hatuka Jentail ngai le Juda ngai amani ha ulian ngai bila kuitir ngai ha maimok ei sak u hanuk lunga deng ranga ei val u le a riat u na.

⁶Lukonia na Lustra le Derbe khua na hanuk kil tina a rot u.

⁷Hatuka hava han thang ahui aril u.

⁸Lustra na mi khat ansuta ei om a ke na ranak abui ama ha a nun avong ata akhor kal reng choi mak.

⁹Hava mi ha Paul a chong ei rangai. Paulin a en sadima adamna ranga iamna ei don a muna, anring sabaka ei ti,

¹⁰“Na ke le andin phita anding ro,” ati pe. Hava han ama ha antoma anthuia kal achoi.

¹¹Hatuka Paulin ei tho ha, amu u na mi ngaiin Lukonia chonga anringa ei ti u, “Pathian ngai ha miring mel anputa koini na kom ei hong chum keng!”

¹²Hatuka Barnaba rang ha Zeus ati u. Hanuk Paul ha chong aril khitpu hasik han ama ha Harmas ati u.

¹³Hatuka kho kola Zeus a biakin a om ha ama chaizungin serat tangte le rakari a hong koia mi bila a honga dar rang atia.

¹⁴Tenchu kuitir ngai Barnaba le Paulin a riat u na a puan u ngai atheta a tana mi bil ata a suak u na anring sabaka ei ti u:

¹⁵“Pu ngai hava ngai ha i chongmo nei tho u koinim nangni anga ahui antak atong miring. Koinin nangni hi, hiva thang ahui nei na hong ril hi, hiva dora a korong nei ni u ata ha Pathian adam tiang a honga kir na nang u. Anvan le phil le tipuilian a sunga dora asin ha.

¹⁶Ama han tian ata nam tin a lampui chipa ei pan a phala.

¹⁷Hanum aman aninga a riat abuia siak mak, asik chu asa tin aman atho anvan ata roti ei anra na rang zoro le hun apeka, sak le raisana na malung u ei man ting,” ati na.

¹⁸Hia chong ngai arila amanin antak sabaka amani makunga sa thata dali dar rang ata aman bang u.

¹⁹Tenchu Antiokei le Ikonia ata Juda mi ahong phora. Hatuka amanin mi aman chang u na Paul ha lung ei deng u hanuk kho tual panga a keia atuang u athi ranga ei iam u.

²⁰Tenchu ruaisi ngai ha kil manlia anding u le ama ha kho sunga ava lut zing khua vara ama ha Barnaba bila Derbe na ase.

²¹Hatuka hava khuana thang ahui arila hava han mi tampa ruaisi asina amani ha Lustra na Ikonia le Antiokei a akir u.

²²A se tir u na amanin ruaisi ngai malung ei manngira hanuk hangai ha lungngam ei sak u, iama ei det thei u na ranga hatuka ei ti u, “Antak chu chunga keng Pathian Ram nei lut rang.”

²³Hatuka amanin kuibing tina amani ranga upa aphuna hanuk hangai chunga bor a zong u na Puma ahonga iam ngai ha ama kuta hangai ha ei betok u.

²⁴Hava suale amani ha Pisidia amalai taka ase u na Pamphulia na ava tung u.

²⁵Hatuka amani ha Perga na chong aril u na Attalia na ase u.

²⁶Hanuk havan ata rakuang le Antiokei ase u. Asin tho u ngai ha hiva muna hava sika Pathian lungkham ei chang u.

²⁷Ava tung u le kuibing ngai ha ei manchun u.Hava han Pathian amani bibila ei oma a sintho dik u ngai le aman Jentail ngai ranga iamna makot ei malong pe ha hava dora ei ril u.

²⁸Nuka amani ha ruaisi ngai bila nikhua sotpa a om u.