Read Ranglong KUITIR 15 Bible Online

KUITIR 15 - Ranglong bible

KUITIR 15

¹Nuka Judai ram ata mi hozetmo a hong u na unai ngai ha ei manchu u na, “Nangni hi Mosi dan anga vun nan at u nok anten zokna manthei u no ta ni,” ati u.

²Hatuka amani lehan Paul le Barnaba achan ankhal u na chong andui sua u le unai ngaiin ei masat u chu, hava ankhalna ansat ranga Paul le Barnaba lehan amani hanuk mitei Jerusalema kuitir ngai le atar ngai kom se u rase.

³Hava han kuibingin amani ha a mathoka a manse u le hangai ha Phoiniki le Samari ram tiang ata ase tir u na Jentail ngai akira ei hong u ruia ei ril u. Hanke unai ngai dora a rai ei mansan sabak.

⁴Hanuk amani ha Jerusalema ava suak u na kuibinga kuitir ngai le a tar ngai ata ei masat u hanuk Pathianin amani bibila ei oma a sintho ngai dora ha aloma ei ril kiar u.

⁵Tenchu Pharisi bila a iam hozetinmo anthuia aril u na, “Ha mi ngai ranga vun at le Mosi Dan azom ranga chong a pek a nang,” ati u.

⁶Nuka hava rui anril ranga kuitir ngai, upa ngai, le a tar ngai anchun u.

⁷Hatuka ankhal sabak u le Pitor anthuia amani ha ei ti pe, “O unai ngai, na riat u, hava man ata Pathianin nangni bila koi hi ei na phun. Ka mur ata Jentail ngaiin thang ahui chong ei rangaia ei iam u na rang.

⁸Hatuka Pathian malung ril a riat han, aman hangai ranga ei manriat koini hontinmo ei ni hantin den amaniam Ratha Anthiangin ei pek.

⁹Hanuk koini le amani laia na man tei mak. Iamna lehan a malung u ei manthiang u ni zei.

¹⁰Hantin han atun nangnin ichangmo Pathian nei man sin u na a ruaisi ngai tubuka namri nei bang u hava suak ha koini na chipui le koinin na pel mo thei zei?

¹¹Tenchu koinin nei iam hangai hontinmo koinim hantin den Puma Isua a lungkhamna lehan zokna man inti.”

¹²Hava han mi dora adai chuta a om u. Hatuka Barnaba le Paul lehan Jentail ngai bila Pathianin andangna sin le tichangbui ei manlang amani kom hava rachi ei rangai u.

¹³Achong u ahek le, Jakobin a masanga ei ril, “O unai ngai ka chong rangai u ro!

¹⁴Pathianin ama raming ranga Jentail ngai bil ata ami ei pomna ranga senkhat ha mansana amani rui ei thun hava ha Simonin ei ril.

¹⁵Hatuka deari ngai chong hava le anrual. Hintin hin anziak:

¹⁶‘Hiva suale hong kir ka ting David a in achiam phun ret ka ting. Hava asiat mun ngai dora phun ret ka ting. Hatuka hava ha sin ret ka ti.

¹⁷Mi anniang ngai doran Puma eia rokna rang. Hatuka nam ngai chunga ka raming ei anpakna ha amanim tho u rase.

¹⁸Puman hiva chong hi ei ti aman man lai ata hiva rui dora ei manthei.’

¹⁹“Hasik han koi kei masat hintin hin Jentail ngai bila Pathian tianga kir ngai ha amani ha koinin mantak pe u no rei.

²⁰Tenchu amani rang ha maziaka mathuan u rei amani han doi thona ruia annim, uiare, mo-ol andena a thi ame le athi sak ata ankhai u rase.

²¹Asik chu kho tina man sabaka Mosi mi a om ama aril ngai Pongansana nikhua kipa anchunna in tina ama Lekha ei an pore.”

²²Hava hanke kuitir ngai, upa ngai, dora kuibing len sana amani bil ata anphun, hohomo mi Barsaba anti Juda le Sila unai ngai bila anlang hiva anni Paul le Barnaba bila Antiokei khuana antir rang a masuk u.

²³Hanke amani kuta hintin hin anziaka ama thuan u: “Suria Antiokei le Kilikina Jentail unai ngai kom kuitir ngai le upa ngai unai ngai chibai.

²⁴Koinin nei lei riat hi koinin chong nei pek nok ngaiin mi tu lekin mo koini bil ata asena chong lehan na malung u omna chang ei manriat noka ei na manzing u.

²⁵Hasik han malung munkhata koinin mi nei phuna.

²⁶Koini neia dit ha Barnaba le Paul koini na Puma Isua Krista raminga tak ei sat u amani bila hangai ha na kom u na a honga tir nei masuk.

²⁷Hantin han Juda le Sila ha na hong tir amani nin um nei masat ngai dora na manthei unti.

²⁸Asik chu Ratha Anthiang lehan koinin nei masuk ha hiva angkhat anni ngai hi anang baka chu na chung u na hanuk atei ite puak na pe no rei.

²⁹Ramil dali le thi hanuk mo-ol andena athi me le uiare ata ankhai na nang u, hiva ngai ata na ninga asa zata nan rung uten dama sapui un na ti. Dam u ro.”

³⁰Hanke anthan u na Antiokei a ahong u. Hanke mi ngai dora anbum u na lekha ha aman lon u.

³¹Hava ha apore u na amani ha, ha lungngamna chong sika arai asan u.

³²Hatuka Juda le Sila amanim deari ei ni u atia chong atam lehan unai ngai ha lungngam ei sak u na a manngir u.

³³Ni hozetmo ase sua le nuka antir ngai ha.

³⁴Amani tiang ase ret ranga amani ha unai ngai kom ata anngoi riama anthan u.

³⁵Tenchu Paul le Barnaba Antiokei khuana a om u, amanin mi tatei atampa le Puma chong le ei manchu u hanuk thang ahui ei ril u.

³⁶Ni itukmo suale Paulin Barnaba ha ei ti, “Tho! Koinin Puma chong nei rilna khua ngai athun kiara se na unai ngai va en rei hontinmo om u.”

³⁷Hatuka Barnaba ei zot chu Johon Mark anti ha amam abil u na tuang rang.

³⁸Tenchu Paulin ei mandon chu Pamphuliana amani amak mi ha abil u na sina se lui, ha ang miring, abil u na atuang rua ni mak, atia.

³⁹Hava han a chalaka ankhal u na amani le amani ansen u. Barnaban Mark ha abila rakuang le Kupra na ase u.

⁴⁰Tenchu Paulin Sila ha aphuna unai ngai lehan Puma a lungkham anpek suana aman se.

⁴¹Hatuka ama ha Suria le Kilikia tiang ase tira kuibing a mandet tir.