Read Ranglong KUITIR 16 Bible Online

KUITIR 16 - Ranglong bible

KUITIR 16

¹Nuka ama ha Derbe na le Lustra na ava suak u hatuka enta, hava han Timothi atia ruaisi khat a om ama hi a iam nupang khat Juda mi a naipasal. Tenchu apa Grik mi ani.

²Lustra le Ikonia na unai ngaiin ama ha ei manpak u.

³Paulin ama ha abila ruai ranga ei zota hatuka ama ha, hava mun a Juda mi ngai sika vun a at pe na asik chu apa Grik atia ei riat kiar u.

⁴Hatuka amani ha kho tina ase titir u na Jerusalema kuitir ngai le upa ngai ei masat adan u azi ranga unai ngai kuta ei manlon u.

⁵Hantin han kuibing ngai iamna ei det ani zei hanke anikhuan tina anson chian u zei.

⁶Amani ha Phrugia le Galatia ram tiang ase u. Asik chu Asia rama chong anril ranga Ratha Anthiang ata ei ankhar.

⁷Hatuka Musia ram kola ava suak u na amani ha Bithunia na ase rang ei val u tenchu Isua Rathan man se u mak.

⁸Hanke amani ha Musia ram amaka Troas a ase u.

⁹Hatuka zana Paulin anralna amana Makedonia mi pasal khat andinga anthem chunga ama rang ei ti, “Hong ankan u tan Makedoniana hong tan koini na hong san ro.”

¹⁰Aman ha anralna aman le koinin anrappa sot luia Makedonia rama ase rang nei val. Asik chu na riat zei sovana mi ngai kom thang ahui aril ranga Pathianin ei na pai ken zei.

¹¹Koini hi Troas ata ti lam tiang lam anlapa Samortharki na hanuk hava nikhua zing khua vara Neopoli na nei va suak.

¹²Havan ata Philipi na na sena hava ha Makedonia biala khua angkhatna Romin ei hong del hava khua na ni hozetmo chu na om.

¹³Hatuka Pongansana nikhua na kho makot tual panga tidung kola nei se hava han borzongna mun om inti nei ti hatuka nan suta nupang ahong anchun ngai kom chong na rila.

¹⁴Hatuka Thuatira khuana Ludi Pathian a biak mi nupang khat senduk puan a zuar koini chong ahong rangai hatuka Puman a malung a malong pe Paul achong a malung ei pek theina ranga.

¹⁵Ama le a in sungmi baptisma a chang sua u le. Aman a mathema ei ti, “Nangnin koi hi Puma na a iam nu atia na na mandon u nan ten ka ina hong u tan hong om u ro ba,” ei ti. Hatuka aman koini na rang anan loppuia ana tuang.

¹⁶Nikhat chu ha borzongna muna na se na hava lai tak han doi en thei ratha sanokin ei sur nupang khat koini na matona ahong. Mi borat a ena apumapa sum a tampa ei sua pui chachak.

¹⁷Ama ha Paul le hanuk koini na nuka ankheka, “Hiva mi ngai hi chung Pathian a suak u keng hi ngaiin nangni rang zokna lampui ei na manthei u!”

¹⁸Aman nikhua sotpa hantin han ei tho. Tenchu Paul atak asina anhoia ha ratha ha ei ti pe, “Isua Krista raminga kei na ti ni zei havan ata suak tan se ro.” Hanke hava han len a suaka ase.

¹⁹Tenchu ama apuma ngai ei man rang ei sabei u ha a suaka ei se amu u na Paul le Sila ha asur u na bazara ulian ngai kom a keia a tuang u.

²⁰Hanke rui aril ngai kom hangai ha ahong tuang u na ei ril u, “Hiva mi ngai hin koini na khua achan aman pon u amani hi Juda ei ni u.

²¹Hatuka koini hi Rom mi koini na dan ite poma tel u no ro,” ati na ei ril u.

²²Hava han mi ngai amani chunga atak ei mansi u na hanuk rui aril ngaiin a puan a khek pe u na, hanuk azem ranga chong apek u.

²³Hanke hangai ha a manzem sabak sua u le lungina a khum u na lungin a otpu ha asadima a rung ranga chong apek u.

²⁴Havan tin han chong amana hangai ha lungin sunga a khum u na a ke na athung u.

²⁵Tenchu zan chim ripa Paul le Sila bor azong chu chunga Pathian biakna la ei tho u. Hava han ankhum ngaiin ala tho u ha a kuar ei dona ei rangai u.

²⁶Hava han anlaiseka ninu anrik sabak ahonga lungin abul annika han len suakkhar anlonga ei ankhit u ankhek zit.

²⁷Hava han a rungpu a in ata in sang alaka anthuia makot ngai anlong zit a mu na. Khendai a radoka aninga anvit rang athona ei mandon chu ankhum ngai a rot kiar u zei ati na.

²⁸Tenchu Paul in anringpa na apai a, “Hei, na ninga anmumak no ro, koini hi hin na la om!” ati na.

²⁹Hanke ra-ang hong ko u ta ati na a sunga a tana ase annok chu chunga Paul le Sila akom ase na avan bok.

³⁰Hatuka hangai ha apanga ahong tuanga, “Pu ngai sandam manna ranga imo kei tho rang?” ati na.

³¹Amanin, “Puma Isua iam ro nang le na in ko mi sandam om u na ti.” a ti pe u.

³²Nuka amanin ama le a ina a om dora ha Pathian chong aril pe u.

³³Hatuka zan len han aman hangai ha atuanga ei pop u na anuk ngai dora a rasuk pe. Hanuk ama le a mi dora sot luia baptisma a lak u.

³⁴Nuka aman hangai ha a in tadana atuanga, amani makunga sak rua asiak pe hanke a in komi dora le Pathian ei iam han achan arai ei san u.

³⁵Sun ani le ruiril ngaiin raimol anlek ngai arila ei tir, “Ha mi ngai ha mazok u ro,” atia.

³⁶Hava hanke lungin a ngakpu han Paul ha a manthei, “Rui aril ngaiin nangni rang ha mazok u ro ati na chong a hong mathuan u hasik han atun phukdaia suak tan se u ta ro,” ati.

³⁷Tenchu Paulin hangai rang ha, “Amanin koini hi ruirilna na nei siatna buia mitin makunga azem sabaka lungina ei na khum u, koini hi Rom mi hivan maruka mo ei na mazok rang! Hava ha ni thei no ni! Amani apum honga koini hi apanga na tuang rase.”

³⁸Hanke raimol asur ngai ha rui aril ngai ha, hava chong ei va manthei u. Hava han amani ha, Rom mi, hava chong ariata ruiril ngaiin achi u.

³⁹Hanke a honga hangai ha ei hong lop u, hatuka tual panga khua ata ase ranga ei mathem u.

⁴⁰Hava han hangai ha lungin ata a suak u na Ludi ina a lut u. Hatuka a unai ngai le anmu u le lungngam asak u na nuka ase u.