Read Ranglong KUITIR 17 Bible Online

KUITIR 17 - Ranglong bible

KUITIR 17

¹Hava suale hangai ha Amphipoli le Apollonia tiang ase u na Thesalonika na ahong u.

²Hava muna Juda ngai anchunna in khat a om. Hatuka Paul a riti anga amani kom ase. Hanke pongansa nikhua amani le Pathian lekhabu chong le ei chong.

³A omzia ei man chu hanuk ei manmu. Krista ha ei thi le athi bil ata ei anthuiret rang ei nang. “Ha Isua ha na kom u na keina ril u ama hi ha Krista.”

⁴Hava han amani bila senkhatin a leia nuam u na Paul le Sila abila anlop u. Hanuk Pathian andon Grik ngai bila mi tampa le nupang ulian a tampa abil u na anlop u.

⁵Tenchu Juda ngaiin a lei dera u na bazara mi salui senkhat ava lak u na mi a mantam u na khua a manpon u hanuk Jakon a in rusum a tho u na mi bila ahonga tuang ranga hangai ha a rok u.

⁶Tenchu hangai ha ei man u nok sika amani han Jakon le unai ngai bila mi kho ulian ngai kom atuang u na ankhek sabaka ei ril u, “Hiva mi ngai hi ramual alet a khupa ke ei re ni u zei hiva munam ei hong suak u.

⁷Jakonin ei mantung hatuka hiva ngai hi Kaisar a riti adan aleta ei tho u hanuk ei ti u Isua atina hanuk reng khat a om.”

⁸Hiva chong ngai ariat u na amanin mi ngai le kho ulian ngai ha anpon u zei.

⁹Hanke amani ha Jakon le alom u na rang rathul amanding u na amazok u.

¹⁰Hava suale unai ngaiin Paul le Sila ha zan azinga Beroi na aman se u hava han asuak u le Juda ngai anchuna ina ase u.

¹¹Thesalonika na Juda ngai neka amani ke asa ual u asik chu amani ha apham sabaka chong ei pom u hatuka hiva ngai ei ni mo atina ariat ranga ani khuana Pathian Lekhabu ei anchu u.

¹²Hantin han amani bila a tamin Grik ngai bila atam nupang lalchin ruai le pasalin a iam u.

¹³Tenchu Thesalonika na Juda ngai han Beroia na Paulin Pathian chong aril atia ariat u na hanke amani hava han ahonga mi ngai ha ei manpon ei man buai u.

¹⁴Hava han unai ngaiin anrapa Paul ha tipuilian tenpei ase ranga ava thak u hatuka Sila le Timothi hava han a om u.

¹⁵Hatuka Paul ava thak ngai han ama ha Atheni tenpei atuang u nuka nangnin Sila le Timothi ha anrapa ka kom hong u rase atia va ril u ro ti chong aman se u.

¹⁶Paul hangai anruanga Atheni na a oma hava han hava khuana ramil anbuak abit a muna a malunga a ratha aluma anthoka.

¹⁷Hasika han ama ha anchunna ina Juda le Pathian andon mi ngai kom hanuk bazara mi khuana ei anmupui dora kom han chong ei ril.

¹⁸Hanuk Epikuria le Stoik a mi ahian hozetin mo ama le ankhal u na. Hatuka, “Mi hohonmo chu hi achiar hin imo ei ti zot?” Hohonmo chu, “Ram atei Pathian a chong ei ril ni inti,” ati u asik chu aman Isua le anthuiret rui thang ahui ei ril.

¹⁹Hava suale amanin akut asur u na Areopaga na a hong ruai u na, “Anchuna athar nei ril hi hava ha koinin na riat thei mo?

²⁰Asik chu nangin itukmo changdong chong nei ril ha na rangaia ariat rang na zot imo a omzia.” ati u.

²¹Athenia mi dora le havana a om khual ngai chong athar aril le anngai baka chu atei ite zot u mak.

²²Hanke Paul Areopaga a malai taka anding ei ril: “O Atheni mi ngai, ka na mu u zei nangni hi alompei tina achan Pathian andon na ni u.

²³Asik chu kachai nei biak u neinun dora ka en ka ena haia khat ka mu achunga anziak a om, ‘Riatlui Pathian ranga.’ Hasik han nangnin riatlui nei biak u ha, ama ha nangni kom kei hong ril.

²⁴Pathian, ha ramual le asunga neinun dora asin ama hi vanram le phil puma hasik han kut len sin ina leng mak.

²⁵Iten sam sika miring ngai kut lehan anbiak um mak aman ke aloma nuk, damna le phuk le aloma ei na pek.

²⁶Hatuka aman mi khat ata miring nam dora ei manpiang hangai ha phil dora chunga ei leng u na rang aman hun le ni omna rang rikung ei manding.

²⁷Amanin Pathian eia rokna rang. Alon titira ancham tira ei mantheina ranga Pathianin ei sin, ama hi koini tute ata ala ni mak.

²⁸Asik chu, ‘Ama han koini nei damna na chang rang len a ni na.’ Hontinmo la phua ngaiin ei tho: ‘Koini him ama chi.’

²⁹Koini hi Pathian achi na ni ten Pathian ang ha min ei sin le ei mandon ei buak rangkachak rupa, lung anga andon koini na sin ni mak.

³⁰Pathian na riat nok lai han riat lui anpema tenchu atun muntina mi dora ha anrimna malung thulna chong ei pek.

³¹Asik chu aman nikhat ei a ruat hatik han a mi ruat lehan anzika ramual a rui ril inti hiva ruia dora iamrua dik ei pek hava ha athi bil ata ama ha ei mathui!”

³²Hava han athi ngai anthuiret chong arangai u na asenin a madak u na ten hanuk asenin, “Na kom hiva rui voi khat rangai sa inti,” ati u.

³³Hantin han Paul amani lai ata a suaka ase.

³⁴Tenchu hoho mi mo chu anchel tita asura a iama amani ha, Areopaga mi Dionusia le nupang khat a raming Damari, hanuk amani bila hanuk mi hozetmo chu ani u.