Read Ranglong KUITIR 19 Bible Online

KUITIR 19 - Ranglong bible

KUITIR 19

¹Apolo Korinth khua na a om lai han, hava lai han Paul mar biala asena Ephesi na ahong.

²Havan han ruaisi senkhat le anmu. Hatuka hangai rang ha ei ti pe, “Aiam na ni u na Ratha Anthiang mo na man u zei?” Amanin Paul ha, “Ratha Anthiang ei om ngal re mak me,” ati pe u.

³Aman ei ti, “Hanle hongamo baptisma nei chang u?” Amanin, “Johon a baptisma,” ati u.

⁴Paulin Johon malung thulna baptisma ei peka mi ngai kom ei ti pe, “Ama anuka ahong rang Isua ha hava ha, hangai han ei iam u rang.”

⁵Hiva chong ariat u na amanin Puma Isua raminga baptisma a chang u.

⁶Hatuka Paul amani chunga kut adap le Ratha Anthiang a chung u na ahong hava han chong atatei a chong u na hanuk matona rang aril u.

⁷Amani ha aloma pasal somleianni ani u.

⁸Hava suale Paul anchuna ina aluta than thum arang le angam sabaka chong ei ril, Pathian Ram rui ei ril pui hanuk mi a mathem.

⁹Tenchu mi senkhat ankhir le hetel lui mi ngai makunga hava lampui ha ero azona hanke amani bil ata anhenga ase na ruaisi ngai ha a khaia anikhua na Turanna na anchuna ina mi anril pui.

¹⁰Hantin chian han kum anni asena hantin han Asia na Juda le Grik ngai doran Puma chong a rangai u.

¹¹Hatuka Pathianin Paul akut lehan tichangbui sin, ha ang papei a tam ei man tho ni mak.

¹²Hava baka ei anhuina puan le a kamsa ana ngai kom ahong koi u ten a rikhua ei dama hanuk ratha salui ngai ei suak u.

¹³Hatuka Juda mi senkhat chei anvak titir doi chong a zuar ratha sa luiin ei sur mi ngai kom, “Puma Isua raming le ei sema ei ti, Paulin ei ril ha, Isua le a sal u.”

¹⁴Hatuka Skeva atia Juda mi khat Chaizung Lian naipasal sari amanin hantin han ei tho u.

¹⁵Hanke ratha sia han ei masanga ei ti pe u, “Isua ka riat, Paul um ka riat tenchu nangni tumo na ni u?” ati.

¹⁶Hanke ha ratha sia han hangai chunga anzuana ranak a songa a pheneng sabak. Hangai ha apop aliam u na saikorong dingkoronga ha in ata asuaka arot u.

¹⁷Hatuka hava ha Ephesi na ngaiin Juda le Grik doran alei riat u na achi u hanke Puma Isua raming ei mansang u.

¹⁸Hatuka a iam ngai han amanin a om tho u ngai chip anpuang u na andar u.

¹⁹Hatuka mitpialdoi a tho ngai amani bila atampan alekha doi bu ahong koi u na, a manchun u na mi dora makunga a hal u na apai u. Hava ngai dora aman na sut ten asang somranga man ani.

²⁰Hantin han hadorpeia ei ni sika Puma achong ansona alian riama.

²¹Ha sin ngai dora ansuale Paul a rathana a mandona ama ha Makedonia le Akaia na ase suale Jerusalema ase ranga ei ti, “Havan ka se suale Rom khua ham amu nang,” ei ti.

²²Hatuka a hasondom ngai anni Timothi le Erasta ha Makedonia na aman se na ama ha atheia Asia na a om tot.

²³Hatuka hava huna han hiva Puma lampui ruia achan anbuai u.

²⁴Asik chu Demetria atia mi khat rangkachak a sut Diana biakin rupa le ei sin. Hanke abuak ngai ha achan sin ei zon.

²⁵Ha mi han hangai le ha sum anpunga sin a tho ngai ha ei paia ei ti, “Ka pu ngai nangnin na riat u hiva sin lehin koini a chan nei man nei sua.

²⁶Hatuka na mu u na riat u hi Ephesi ronga ni mak Asia pumpuia hiva Paul hin mi tampa a soloka ei makhir kut len sin ngai dora ha Pathian ni mak ei ti.

²⁷Hava han hintin andon a nang anchi om koini nei sua na raming rong ni mak asiat rang. Tenchu Diana biakin um antel luia om inti hanuk Asia dora baka ramual pumpuiin ei biak ham ei lian na anpei inti!”

²⁸Hava chong ei riata a takasi bit u na ankheka ei ti u, “Ephesi ngai Diana hi alian khit.”

²⁹Havan ke kho sung anpon sabaka loko ha munkhata andai na muna atan u na hatuka Makedonia Gaia le Aristarka atia Paul ei anlopui anni ha asura achoi u.

³⁰Hava han Paul mi bila ase rang khomak ansama ruaisi ngaiin man se u mak.

³¹Hatuka Asiana minchu ngai bila senkhat ha ama a mal ei om sika ama kom mi atir u na hintin hin a mathem u raisan ansakna mun son avan tak ranga ei se nokna rang.

³²Hava han ituk min mo ituk chong mo ei rila ei ankhek u. Asik chu anbuai sabak u. Hava ha hongsika mo ei anchun u hava ha atam siaiin re u mak.

³³Hava han Juda ngaiin Aleksandar ha a makung u na ei hong masuak u sika mi ngaiin mi bil ata a masuak u hanke Aleksandarin akut le ei biak ei satna rui aril ranga mi ei val.

³⁴Tenchu amanin ei riat u ama hi Juda mi hanke alom u na lokona ei ankhek u na dar anni pei ei ti u, “Ephesi ngai Diana hi alian khit,” ei ti chian u.

³⁵Nuka kho ulianin mi ngai ha aman banga ei ti pe, “O Ephesi mi ngai ril u ta Ephesi khuana Diana ei lian le anvan ata achul ramil hava ha mi tumo a riat nok?

³⁶Hantin han hiva chong hi a thot nok rua ania nei mong u na hanuk mandona buia ite sin nei tho u nok hi adik.

³⁷Asik chu hiva mi ngai hi hivan nei hong tuang u amani hi biakin ansiat Pathian a dem um ni u mak.

³⁸Hantin han Demetiri le alom asin thopui ngaiin mi chunga chong adon u ten ruirilna makot anlong. Rui a aril ngai um a om amanin a nining u na van ding u rase.

³⁹Tenchu atei nangni hongmo nei man u rang a om ten a lampui taka anchun zola anthiang inti.

⁴⁰Hano aviana rui sika koini chunga asia anlo nam anchi a om thei. Asik chu hiva mi ei anchunna ruia ansang rua reng koinin don mak me.”

⁴¹Hiva hi atina aman ruiril ha a mathan.