Read Ranglong KUITIR 2 Bible Online

KUITIR 2 - Ranglong bible

KUITIR 2

¹Pentikos ni asuakle hangai ha alom u na munkhata anchun u.

²Hatuka anlaiseka anvan ata phaivua anga thinthi rasa a honga hanuk ei ansut u na ina hava in a bit thak.

³Hatuka aher ahera achul moi malei a chung u chipa ansut.

⁴Hava han amani alom u na Ratha Anthiang a bit u na Rathan hangai ha chong ei pek u ang pei a chong a tatei a ei chong u.

⁵Havalai tak han Juda ngai anvan thuaia nam tin ata ahong Pathian abiak mi ngai Jerusalema ei om.

⁶Hatuka hava rasa anthangle, mi tampa ahong ngai ha ei hianna adong u na asik chu achong u chipa ei chong ariat u na.

⁷Hava han ei anlai a achang ei mandong u na ei ti u, “Enta hiva mi ngai ei chong u so, Galili mi kiar ni u mak sole!

⁸Hanle hontinamo aram chong chipa chong nei riat.

⁹Parthai, Medai, Elamatai mi hanuk Mesopotamia Judai le Kappadokia, Ponto.

¹⁰Asia, Phrugia le Pamphulia, Aigupta, Libia rama Kurini kola adep mi ngai hatuka Roma om ngai Juda mi,

¹¹Juda Pathian abiak, hanuk Krita le Arab mi koini na ninga na chong hava ngai han Pathian sin alian pangai chong nei riat!”

¹²Hantin han hangai ha alom u na anlai u hatuka amani le amani anril u na, “Hong ti na mo hi?” ati u.

¹³Mi tei ngaiin maniero atho u na, “Hiva ngai hi zun ri u keng,” ati u.

¹⁴Tenchu Pitor somleikhat ngai bila andinga anring sabaka hangai kom chong arila ei ti: “O Juda mi ngai, o Jerusalema om ngai dora nangnin re u ro, hanuk ka chong hi rangai u ro.

¹⁵Asik chu nangnin hiva ngai hi anri nei ti u tenchu ni u mak asik chu atun ani vaitak thuar ke ala ni.

¹⁶Tenchu hiva hi Joel deari chong ril ha.

¹⁷‘Hun hek tika hintin hin ni inti hiva hi Pathianin ati, Phil chunga ka Ratha athek ka ti; Hava han na naipasal u ngai na nainupang u ngai le chong ril unti. Hatuka na ruathar u ngaiin, Anralna la mu unti Hanuk na atar u ngaiin ramang phan unti.

¹⁸Hanuk ka suak ngai chunga le ka suak nu ngai chunga; Hatik han koi ka Ratha a the ka ti, Hatuka amanin Ka chong ril unti.

¹⁹Chunga anvana changdongna; Hanuk thuaia phila andangna tin, Thisen moikhu manlang ka ti.

²⁰Puma ha alian le anthang nikhua ahong man; Ani sa zing inti Tha thisen chang inti

²¹Hatuka hintin ni inti Puma raming apai tak chu zok inti.’

²²“O Israel ngai, hiva chong dora rangai u ro, Nazaret Isua han sinthotheina tichangbui andangna ngai lehan na kom u na Pathian thotheina ata andang miring hava lehan Pathianin na kom u na hava dora sin ei tho nangnin na riat u.

²³Ha miring Pathian masuk mandon man ata a riat anga han ansurle nangnin ama ha dik lui ngai kut lehan krosa anpeka nei that u.

²⁴Pathianin thina antak ata a mazoka ei mathui asik chu ama ha thinan sur tita makhap thei mak.

²⁵Asik chu David han hava rui ha ei ril: ‘Ka Puma ha nikhuan tina ka makunga kei mu asik chu ama hi ka sim tiang a om ka malung ei zing nokna ranga.

²⁶Hasik han ka malung rai a sana ka maleiin phamna chong arila hanuk ka pumin sabeia ngak inti.

²⁷Asik chu nangin ka nuk athi khuana na betok no ta nia hatuka na mi anthiang a hek man mu no ta ni.

²⁸Nangin adamna lampui ha na manthei zei na mel asa lehan ka rai nei mansanna makhipin na ti.’

²⁹“Unai ngai ha na chipui David a ruia a ngam chaka ka na ril thei u. Anuk ha achata anphuma hatuka athan atun ten koini na kola ala om.

³⁰Hanle ama ha deari ei ni hanuk ei ril Pathianin khomak ansam chunga akom hiva hi ei ansam ama azerem thaka angkhat ha ama reng chomphanga mansut inti.

³¹Hantin han man ata ei lei riata Krista ei anthuiretna ruia hiva chong hi ei ril, ‘Ama ha athina na anmak mak a taksa hek mak.’

³²Hiva Isua hi Pathianin ei mathui koini na loma hiva rui a riat.

³³Hasik han ama hi Pathian a chang tianga kut lehan ei ansanga hatuka Pa kom ata chong antinna Ratha Anthiang ei mana hi nei mu nei riat u hi aman ei athek.

³⁴Asik chu David vana lon mak tenchu hiva chong hi ei ti, ‘Puman ka Puma ha ati ka chang tiang ansut ro.

³⁵Anan mumak ngai na kepha thuaia ka siak nok maseng.’

³⁶“Hasik han Israel nam doran re rase ha nangnin Krosa nei pek u Isua ha Puma Pathian le Krista ei man ni rit!”

³⁷Hiva chong ariat u na a malung u a kho na. Hatuka amanin Pitor le kuitir atei ngai rong ha ei ti u, “Unai ngai imo tho ma ni?”

³⁸Hanke Pitorin hangai ha ei ti pe, “Malung makhir u ro hanuk nangnin asia saina ranga Isua Krista raminga Baptisma chang chip u ro, hantin aniten Ratha Anthiang pek man un na ti.

³⁹Asik chu hiva a khomak ansam nangni ranga le na nai u ngai rang hanuk alana ngai dora ranga koini Pathian Puman pai a hong ruai inti.”

⁴⁰Hanuk chong a tatei atampa a la ril hanuk hangai rang ha chong arila, “Atun taka hetel lui ngai ata na ninga anrung u ro!”

⁴¹Hava ha ama chong atel han amani ha baptisma a chang u. Hava han hava nikhua asang anthum ni inti amani bila ansap u.

⁴²Hatuka hangai ha kuitir ngai anchuna na ei ansem u na vaipol akhiaka le borzonga anchel u.

⁴³Hava han achi kiar u hatuka kuitir ngaiin tichangbui, le andangna sin atho u.

⁴⁴Hatuka aiam ngai han amanin alom u na munkhata aloma ei siak u.

⁴⁵Hanuk aphai alung anei anung a zuar u na a nang le ei nang u tak zotor alom u na ei anbak u na ei pek u.

⁴⁶Hatuka hangai ha nikhuan tina malung munkhata Biakina le ina ei oma vaipol a khiaka raisana malung anthianga ei sak u.

⁴⁷Pathian ei manpak u hatuka mi doran ei adit u hanuk sandam a man ngai ha Puman nikhuan tina hangai ei sap ei man son tir u.