Read Ranglong KUITIR 20 Bible Online

KUITIR 20 - Ranglong bible

KUITIR 20

¹Ha rahu ha abang sua le Paulin ruaisi ngai ha akuia hanke lungngam asaka raisana anthan u na Makedonia na ase ranga a vuna.

²Nuka hava muntiang ase tira chong atampa lehan ruaisi ngai ha lungngam asaka Grik rama ava suak.

³Hava muna than thum a oma ti lam tiang Suria rama ase rang ansin le hava han Juda ngai ama dui ranga zia ei tho u sika Makedonia tiang ase ret ranga ansin.

⁴Hatuka Beroia khuana Pur naipasal Sopatar, Thesalonika Aristarka le Sekunda, Derbe na Gaia, Timothi, hanuk Asia rama Tukhika le Trophima ngai hi ama bila ase u.

⁵Amani hin alei ase u na. Troas a ana lei ot u.

⁶Hava suale Chol anchel lui Vaipol Panta nikhua a theng le Philipin ata ti lama na sena ni ranga na Troas a amani kom na va tunga hava muna ni sari na om.

⁷Hatuka hapta nikhua mansana vaipola khiak ranga nan chun le Paul ha zingkhua vara ase ranga ansin atia ruaisi ngai kom chong arila zan anchim tenpei a chong.

⁸Nei anchunna in a chung tadan ha hava han achan lem ei tam.

⁹Hatuka Eutuka atia mi ruathar khat kharpelepa ei ansut, anvuang sabaka ei om Paulin chong ei ril sana asota ei lei in sabak sika kharpelep ata thar anthum thuaia achul hanke mi ngaiin ama ha athi ava rut u.

¹⁰Hanke Paul ava chuma a chunga avan boka a kuana. “Pusabak u no ro asik chu anuk la chat mak a phuk ala om!” ati.

¹¹Nuka ama ha chunga ase na vaipol akhiaka asak u na asotpa khuavar tenpei ei chong ei ang, hantin han ei se.

¹²Hatuka amanin ha ruathar ha adama ahong tuang a chalaka malung anngamna aman u.

¹³Hatuka mana na leia sena rakuanga na chuanga Asso na se havan ata Paul ha anchuang rang nei ti asik chu ama ha tang lam tiang ase ranga ei mandon.

¹⁴Nuka ama ha Asso na koini bila anlopa na tuanga Mitulini na na hong.

¹⁵Havan ata rakuang na kheka zing khuavar nikhuana Kio kola na va suak ni anni nikhua Samo mualanlana na man laka hanuk nikhuana Melita na na hong.

¹⁶Asik chu Paulin Ephesi maka ase rang ei zot Asia na ei sot u nokna ranga ei annot sabak athei ten Pentikosni na Jerusalema avan chel theina ranga.

¹⁷Melita ata aman Ephesi na mi a tira kuibing ulian ngai ava man kuia a ahong tuang u.

¹⁸Amanin ama kom a honga suak u le aman hangai ha ei ti pe, “Na riat u Asia rama ka honga aphut nikhua len ata na bil u na hontinmo kei om.

¹⁹Malung annuai sabaka mit rathi le hanuk, Juda ngai zia tho na, ei na val u na kei oma antak atiar chunga Puma suak sin kei tho.

²⁰Ite chong asa thup luia aloma keina ril kiar u hanuk tuallaia le in tina anan chu u rang anreng making.

²¹Pathian ranga malung anthul hanuk koini na Puma Isua na iamna ruia Juda le Grik ngai kom kei hong ril.

²²Hatuka atun en ta, Ratha Anthianga kei anthunga Jerusalem kei pan. Sova muna hongmo ka chunga ei ni rang hava ham remaking.

²³Atun len han kei riat Ratha Anthiangin kho tina ka kom hintin hin ei na manthei ankhit le antakin ei na maruang.

²⁴Tenchu ka ninga ka nuk um ite na tel making ka ranga man anei ngala remakung ka lampui zi rikung tenpei kei tan theina rang. Hanuk Pathian lungkham thang ahui aril dorbondom Puma Isua ata kei man hi kei zui theina rang.

²⁵“Hatuka atun en ta kei riat hi hava ram rui kei rila kei cheina ngai nangni na lom u na na mu u lai no ta ni.

²⁶Hava sik han avian hiva hi keina ril ani u zei mi dora thisen phuba ata chu kan thiang.

²⁷Asik chu Pathian mansuk anan thei u rang anreng makung.

²⁸Nangni na ning u na ruia anrenga hanuk Ratha Anthiangin uliana ei na phun u na han hava bera rual ngai chunga anreng u ro Pathian a kuibing ha manliang u ro aman aninga a thisen le ei rachok ha.

²⁹Ka riat ka se suale, ngelang anchar ngai na bil u na hong lut intia a pal ngai ha hoi no ni.

³⁰Hanuk nangni na bilam hohomo chu ruaisi ngai bila anuk tiang akir ranga chonglet ril pe unti.

³¹Hasik han, meng u ro, mandon u ro, kum anthum sun, zan mi tin ha mitrathi suak chunga chunngo atho mong makung.

³²“Hatuka atun Puma koma le a lungkham chong koma keina thak u aman aphuna le andeta anthiang ngai bila dong aluak ranga a na pek thei.

³³Tute a rupa, a rangkachak le a puan ite ningol making.

³⁴Nangnin na riat u ka rang le ka lom ngai ei ansam u nokna ranga hi kut anni hin sin ei tho.

³⁵Rui tina ankhina keina manmu u hintin hin a ponga ranak abui ngai nei san rang hanuk Puma Isua chong andon a nang asik chu aman aninga ei ti, ‘Alak nek ten apek hi chanasana ei ni.’ “

³⁶Hi a chong arila a mankhuk abila loko bila bor a zong.

³⁷Hanke alom u na a chalaka ei chap u. Hanuk Paul aring eia kol u na abiang ei tum u.

³⁸Ei ril bila a malung ei na u na khit chu ama ha mu u lai no ni. Nuka rakuang tenpei a thak ranga ase u.