Read Ranglong KUITIR 21 Bible Online

KUITIR 21 - Ranglong bible

KUITIR 21

¹Amani kom ata antak sabaka anthan u na rakuang a kheka andin phita Kos mualanlana na hong, zing khuavara Rodi mualanlana hanuk havan ata Patara na va tung.

²Hatuka rakuang khat na man vinga ankan vinga Phoiniki na ase rang hava han na chuanga na se.

³Nuka Kupra mualanlan anlang le hava ha na voi tiang na maka Suria rama na sena Tura na na chum asik chu hava han rakuanga neinun ansum anang.

⁴Hatuka havana ruaisi ngai anroka ni sari hava han na om hangai ha Ratha lehan Paul ha Jerusalema ei se nokna ranga ei ril u.

⁵Hava han ni hozetmo na om suale na suaka na se hava han amanin a nungak a sanai u ngai le alom u na kho tualpang tenpei ana va thak u ranga a hong u hava han tipuilian tang kola khuksabila borzong chunga nan than.

⁶Hava suale rakuanga na chuanga hanuk amani ha amun u na ase u.

⁷Hanuk Turi na maka ti tianga nei se hava suana Ptolemai a na va suaka hanke unai ngai na phama ni khat amani bila na om.

⁸Zing khuavara nan pheta Kaisari na na hong hanke thang ahui aril Philip ha sari bila angkhat ha ama ina na luta abila na om.

⁹Hava mi han nai nungak anthiang manli adon amani han maton lam chong ei ril u.

¹⁰Hava muna nikhua sotpa na om le Juda ata Agaba atia mi khat deari ahonga suak.

¹¹Hatuka ama ha koini na kom ahonga Paul akongkhit ri lehan aninga akut ake akhita ei ti: “Ratha Anthiangin hiva chong hi arila ha mi akongkhit ri len lehin Juda ngaiin Jerusalema hintin hin khit untia Jentail ngai kuta manlon unti.”

¹²Hava ha ariat u na hava na unai ngai le koini le Paul ha nei mathem, Jerusalema ama ha se no ro ati na.

¹³Hava han Paulin amasang, “Imo nei tho u nei chap u na ka malung nei makhui u? Asik chu Puma Isua raming sika Jerusalema ankhit rong nimak athim kan sin,” ati.

¹⁴Hantin han koini na chong atel ranga nuam maka na mong; “Puma ei zot chuk rase,” na ti na.

¹⁵Hiva nikhua ngai anzui le na neinun ngai na maloma Jerusalem na pan.

¹⁶Hatuka Kaisari ata ruaisi senkhat koini bila anthoka amanin Kupra mualanlana Manason atia mi khat abila ei hong tuang u ama hi ruaisi mansa bila ama ina khual nei ni ranga chong.

¹⁷Jerusalema na va tung suale unai ngaiin raisana koi hi ana lei pom u.

¹⁸Zing khuavara Paul ha koini bila Jakob a ina alut hava han atar ngai alom u na a honga suak u.

¹⁹Hava suale aman hangai ha apham sabaka Pathianin ama a dorbondomna na Jentail ngai bila ei tho ngai dora ha hava rui ha angkhat angkhata ei rila ei manthei.

²⁰Hatuka hava ariat u na hangai han Pathian a manpak u hanuk ei ti pe u, “Parual Paul, na mu mo Juda ngai bila asang itukmo a iam ani zei. Hatuka amani hi alom u na Dan anga tak ei sat u.

²¹Hatuka nang na ruia amanin hintin hin ei lei riat u, hi nangin Jentail ngai bila a a om Juda mi dora ha Mosi lampui anmaka nei manchu na nei ril pe amani han naipang ngai vun an at nokna ranga le Dan anga ei tho u nokna rang.

²²Hasik han atun imo nei tho rang? Amanin, nei hong hi ei riat nget u rang keng.

²³Hasik han koinin nei na ti tak pei hava ha tho ro. Koini bila pasal manli a om chachak.

²⁴Hangai ha tuang tan la amani bila nang um van thiang ro hanuk amani luvuina rang tham ro. Hava ha na tho ten re untia, na ruia thang ei lei riat u ha ite ni mak, nang um Dan azi na riti anga a leng nei ni chang inti.

²⁵Tenchu ha Jentail ata a honga iam ngai ha amani ruia koinin rui nei rila nei maziak hi doi thona dali thisen mo-ol andena athi me hanuk uiare hiva ngai ata amani ha anrung u rase.”

²⁶Hanke Paul, ha mi ngai ha atuanga amani bila avan thianga Biakina alut hanuk amani ngai rang chipa dali andar tenpei anthiangna ranga sin ni itukmo ei nang rang hava ha a manthei.

²⁷Hatuka ha ni sari ahek vit le Asia rama Juda ngai Biakina ama amu u na mi ngai dora ha a manluma hanuk Paul ha asur u na ankhek u na ei ti u:

²⁸“O Israel mi dora ansan u ta ro, ama hi hava mi ha muntina koini nam dora le Dan hanuk hiva mun sika ei dema ei manchu hanuk aman Grik ngai um Biakina ei hong tuanga hi mun anthiang ei mannim!”

²⁹Asik chu mana han khua na Ephesi na Trophim ha Paul a bila ei mu u. Paulin ama ha Biakina hong tuang inti ei ti u.

³⁰Hava han khua dora ei luma ei anthok ani u zei mi ngai a honga tana hanuk Paul ha Biakin ata tual panga a keia ei tuang u hatuka han len ha makot dora ei khar u.

³¹Hantin han amanin Paul ha a that rang aval u lehan sipai bila asang khat a ruaipu kom hava rui ha athang a honga tunga Jerusalem dora anpon zei atia.

³²Hantin han aman sipai ngai le raza ruaipu ngai a tuanga amani kom atan chiana a hong u hava han mi ngaiin asang a ruaipu le sipai ngai amu u na Paul ha ei zem u rang a mong u.

³³Hanke asang aruaipun ahong pana ama ha asura zingzir anni le a khit ranga chong a pek hanuk ei rakel, “Ama hi tumo hatuka aman imo ei tho?” atia.

³⁴Hava han mi ngai han ankheka ei ril u ngai atei atei chipa anmun u mak hatuka ei anpon u sika mandang thei maka rapal sunga atuang ranga chong apek.

³⁵Hanke rakal a honga suak ule Paul ha mi ngaiin ei val tit sika sipai ngaiin Paul ha a dom u.

³⁶Asik chu mi aping anu nuka ei hong hatuka anring sabaka ama ha, “That ro!” ei ti u.

³⁷Amanin Paul ha rapal sunga atuang ranga ansin u le Paul han asang a ruaipu kom han, “Na kom chong ka ril lak thei mo?” ei ti. Aman, “Grik mo na thei?” ati.

³⁸“Hanle nang hi ha Aigupta mi ni mak che mo mana anpon ha hanuk anthupa mi phila asang manli tuanga philchar rama ase?”

³⁹Hava han Paulin ei ti, “Koi hi Juda mi Kilikia Tarsa mi khua papei a aleng ni making keina mathem ani zei mi ngai koma hin chong na manril ro ba,” ati.

⁴⁰Hatuka aril rang apek le Paul rakal luna andinga mi ngai koma akut azapa aril hanke aloma adai rek u na aman hangai rang ha Hebrai chonga ei ril.