Read Ranglong KUITIR 22 Bible Online

KUITIR 22 - Ranglong bible

KUITIR 22

¹“Parual ngai, pa ngai atun na kom u na koi ka rui kei ril rangai u ro!”

²Hanke aman Hebrai chonga amani kom chong ei ril ariat u na a daireka a om sa u zei hanke ei ti:

³“Koi hi Juda mi Kilikia Tarsa khuana kei anzir tenchu hiva khuana Gamaliel ake kunga mi kei chang ka pa Dan om lam adik pika anchu mi kei ni, hatuka nangni avian tenpei hontinmo nei om u hantin den koi um Pathian ranga tak kei sat.

⁴Koi hi mi nuk apei tenpei hiva Lampui ranga kei pheneng, pasal le nupang le kei khita lungina kei khum.

⁵Hiva ruia Chaizung Lian le atar ngaiin ana riat u, amani kom ata unai ngai sika lekha kei laka Damaska kei se havana a om ngai ha amani ham sura Jerusalema ahonga tuang ranga kei se ei antak thei u na ranga.

⁶“Hatuka ka se tira Damaska kola ka va suak le ani sun chimripa anlaiseka anvan ata ra-ang ka sir ka pang a hong el raka.

⁷Hava han phila kan bok raka he khat ka riata ei na ti, ‘Saul, Saul ichangmo nei na razul?’

⁸Ka masanga, ‘Puma tumo na ni?’ Aman ei na ti, ‘Koi hi Nazaret Isua, nei razul ha,’ ati.

⁹Hatuka ka bila om ngai han ra-ang ha chu amu u tenchu ka bila chong ei ril ha chu re u mak.

¹⁰Hava suale, ‘Puma imo kei tho rang ka ti?’ Puman, ‘Anthuia Damaska se ro, hongmo nei tho rang ansin sua ke hava ngai dora sovan na ril inti,’ atina

¹¹Hanke ha ra-ang ei na ela kei mu thei lai noka ka lom ngaiin ka kut asura a na tuang u. Hatuka Damaska ka va suak.

¹²Nuka Anania atia mi khat Dan anga Pathian andon mi havana Juda mi dora koma raming anthang.

¹³Ama ha ka kom ahonga, ka sira andinga, ‘Parual Saul muthei ta ro ana ti!’ hava han len ama tiang ka en.

¹⁴Hava suale aman, ‘Chipui ngai Pathianin nang hi ei na phun nangin ama ei zot ariat ranga le hanuk ha adikpu ha amuna ama mura chong ariat ranga.

¹⁵Asik chu nangin nei mu ngai le nei riat ha, hava rui ngai ha mi ngai kom anriat nin na ti.

¹⁶Hatuka atun ichangmo nei sot? Anthui ro a raming pai tan baptisma chang ro nei siat rasu ro ati.’

¹⁷“Hava suale Jerusalema ka honga kir a nikhat Pathian Biakina bor ka zonga, anralna ka muna.

¹⁸Aman, ‘Anrap ro, annot tan la Jerusalem ata suak ro asik chu hia mi ngaiin ka rui nei ril na tel u no ni’ a na ti.

¹⁹‘Kei ti chu Puma ariat u do, nang ana iam ngai ha anchunna in kipa ha kei khum le kei zem ha,’ ka ti pe.

²⁰Hatuka ana riatpu Stephan thisen ei suak han hava kola ka lei andinga kei lei zot hanuk athat ngai ha apuan kei lei rung pe u.

²¹Aman anthok ro asik chu nang hi a la na, ‘Jentail ngai kom na mathuan ka ti ana ti!’ ”

²²Mi ngaiin ha ten ha a chong a rangai u na. Hanke anring sabaka ati u na, “Ama ha phil chung ata pei ro! Ei dam hi dik mak!” ati u.

²³Nuka ankhek u na apuan apei u na anvan tiang philvut aman zuang u.

²⁴Hava han asang a ruaipun Paul ha rakul sunga atuang ranga chong apeka hanuk ei ti nei zema ke nei riat thei rang min imo ei masiala ama chunga atak ei sia ei ankhek u.

²⁵Hanke mevun ri le akhit u na hava han raza ruaipu ha a kola anding Paulin, “Rom mi hi arui anril luia asia anlo noka ama ha azem nangni ranga a dik mo?” ati pe.

²⁶Hava ariata ha raza ruaipu asang a ruaipu kom asena, “Imo nei tho ranga nei ansin? Ama hi Rom mi!” ava ti.

²⁷Hanke asang a ruaipu ha Paul akom ase na, “Na ril ta Rom mi mo na ni?” ati na. “O, ka ni,” ati pe.

²⁸Asang a ruaipun a masanga, “Hava na mi nina rang sum a tampa le kei rachok ke,” atia. “Paul han anzira Rom mi kei ni,” ati.

²⁹1 Hantin han ama ansin ranga ngai ha Paul akom ata ankhai kiar u. Hatuka ama ha Rom mi ti a riat u na ei thung u ha asang a ruaipun achi zei.

³⁰Tenchu zing khuavara han Juda ngaiin ama chunga imo ei masiat u na ariat ranga asang a ruaipu han Paul ha a mazoka Chaizung Lian ngai rui aril ngai dora anchun ranga chong apeka hanuk Paul ha a masuma amani bila ahong ruai.