Read Ranglong KUITIR 25 Bible Online

KUITIR 25 - Ranglong bible

KUITIR 25

¹Phesta hava ram biala ei hong tung nin thum suale Kaisari ata Jerusalema ase.

²Hava han chaizung ulian ngai le Juda mi ulian ngai ama kom Paul siatna rang a zong u.

³Hatuka anthem chunga Paula ruia hiva lungkhamna azong u. Paul ha Jerusalema ei hong mathuan na rang. Amanin lam laia aleia thatna ei en u.

⁴Tenchu Phesta han a masanga, “Paul Kaisari na ankhuma ei om, koi anrapa se ka ti.

⁵Hantin han nangni bila a thei ngai ha amani ha ka bila hava han sena hava mi ei siatna a om ten ama chunga ei siatna ril u ro,” ei ti.

⁶Hatuka amani kom ni riat, ni som neka sot a oma ama ha Kaisaria na a chuma ase. Hatuka zing khua vara ruirilna muna Paul ha ahonga tuang ranga chong apek.

⁷Ama ahonga suak le Jerusalem ata ahong Juda ngai ha ama asir apanga anding u na Paul ei siatna antak pangai chong asia ei puang u. Tenchu ei dikna manlang thei u mak.

⁸Hintiang Paulin alei rila: “Juda Dan sika, Biakin sika le Kaisar sika ite asia tho making,” ati.

⁹Tenchu Phesta Juda ngaiin eia dit rang ei zota Paul a rang ha, “Jerusalema ka bila asena ka makunga hiva ngai rui anril rang na zot mo?” ati pe.

¹⁰Paulin, “Koi hi Kaisar a ruirilna makunga anding ke ka ni hiva hinke ka rui ei anril dan, koiin Juda ngai chunga ite asia kei tho nok hava ha nangin um na riat ati.

¹¹Koi hi asia ka ni ten hanuk athi ruana sin kei tho aniten athim achi making. Tenchu hiva ngaiin ka chunga ei na masiat u ngai hi ite ani nokten hi ngai kuta ana pek rang tuten ningneina don mak Kaisara kom devan va dom ka ti,” ati.

¹²Hanke Phesta han rui aril ngai lehan a chong u na a masanga, “Kaisar kom devan na dom ten Kaisar a kom ke nei se rang,” ati.

¹³Ni hozetmo ase suale reng Agrippa le Berniki Kaisaria na ahonga suak u hanke Phesta ha phamna chong arila.

¹⁴Amanin ha nikhua sotpa hava han a om u lehan Phesta han reng kom Paul a rui ahong man langa Pheliksin, “Mi khat ei khuma ei se.

¹⁵Jerusalema ka va oma hava han Juda chaizung ngai le a tar ngaiin ha mi ruia ei hong zonga ama chunga choina rang ei hong zong u.

¹⁶Hangai ha kei ti pe a raming nei masiat u le ansiat ngai antanga ei masiat u na ruia aninga ei dikna a manlang thei kar chu ha mi anbetok Rom ti dan ni mak.

¹⁷Hava suale amanin munkhata hiva hin ahong u le anrapa zing khuavar lena ruirilna na kan suta hava mi ha kei va man kui.

¹⁸Hanke ansiat ngai ha anding u na ei siat ranga kei iam hava ang han ei masial rasua thei u mak.

¹⁹Tenchu ama chunga a Pathian u rui le Isua atia mi athi khat hava ha Paulin adam ei ti ama ruia angkhat anni ankhalna aman lang u.

²⁰Hava han hiva rui dora hontinmo kei zek rang atho chang remakinga Jerusalema sena sova son hiva ruia anril rang na zot mo ka ti.

²¹Hava han Paulin renglian kom devan andom ranga ei hong zong sika Kaisara kom ka mathuan thei man chu akhum ranga chong kei pek.”

²²Hanke Agrippan Phesta ha, “Koi um hava mi koma chong anngai rang kei val,” ei ti. Phestan, “Nangtuk rangai thei na ti,” ati pe.

²³Hantin han zing khua vara Agrippa le Berniki anlian sabaka ahong u na hanuk raza ruaipu ngai le khuana ulian ngai bila ruirilna muna a hong ansut u hatuka Phesta a chonga Paul avan laka.

²⁴Hanke Phestan, “O reng Agrippa le koini bila ruirilna na pu ngai: Nangnin ama hi na mu u zei ama ruia Juda mi ngai doran Jerusalema hanuk hiva muna ka kom ankheka ei zong u na hava mi ha ei dam rang ni lai mak ei ti u.

²⁵Ten kei mu chu ama hin thina khop sin reng tho mak hanum ama aninga renglian kom devan eia dom sika anthuan ranga kei masat.

²⁶Ka Puma koma ama ruia anziak thei rua ite andang phita nei makung hasik han nangni na kom le o reng Agrippa! Na kom hiva mi hi kei hong manlanga ankel suale anziak rua kukui mo na man.

²⁷Asik chu ankhit chunga nei mathuan ama chunga anon rua chong mandang luia ansuk rei no ni.”