Read Ranglong KUITIR 26 Bible Online

KUITIR 26 - Ranglong bible

KUITIR 26

¹Hava suale Agrippan Paul ha, “Aril rang nei don tak aril rang nana pek,” ati. Hanke Paul ha akut a leka ama satna aril:

²“O Reng Agrippa! Juda ngaiin ka chunga ei na masiat u ngai dora ha, hava ruia avian na makunga aril rang kei man sika chanasa kan ti,

³asik khit hiva hi Juda ngai riti kanun le ankhalna ruia nangin na riat hasik han ka chong hi rangai zam ro.

⁴“Naipang te ata kei leng kei anmang hi ha aphut ata ka nam ngai bila hanuk Jerusalema ei hong ni hava ha Juda ngaiin a riat kiar u.

⁵Amanin aphut ata koi hi ei na riat u sika a zot u ten aril thei u koini na Pathiana atho sadim khit ngai anga koi hi Pharisi ang taka kei leng.

⁶Hatuka koini na chipui ngai koma Pathian ata chongtin ha hava nei sabei sika koi atun ka rui anril ranga kei anding.

⁷Koini chi somleianni sun zan malung munkhata nei biak, nei biaka ha chongtin amara aman rang nei sabei hatuka, O reng, ha sabeina ruia Juda ngai ata ka chunga ei na man sia u!

⁸Pathianin athi ngai a mathui aniten hanle hava ha nangni na mandon u na ichangmo aiam ei sa nok rang?

⁹“Koi um kei mandon hi Nazaret Isua raminga taksi sika sin atam atho kei nang.

¹⁰Hatuka Jerusalema hava ha kei tho chaizung ulian ngai kom tho theina kei mana anthiang ngai bila mi a tampa lungina kei khum. Hanuk amani anthat lai um kei zotna kei lei manlang.

¹¹Hatuka anchunna in tina antakna kei pek re reta hangai ha ranakruma ei iam u ha an mumakna ranga kei val hanuk amani chunga tak asi sabaka ram atei khua tenpei hangai ha kei rahok.

¹²“Hava ranga chaizung ulian ngai kom thotheina le chongpek lekha choia Damaska na kei se.

¹³Hava lai han, O reng, sun chim ripa lampuia kei mu anvan ata ani ra-ang neka ei el avara koi le kei se pui ngai a sir apanga ei var ziak.

¹⁴Hava han koini na loma phila nan bok le he khat kei riat hava ha Hebrai chonga ei ti, ‘Saul, Saul ichangmo nei na razul? Raling bila ke va thakna rang antak.’

¹⁵Hanke, ‘Puma, tumo na ni?’ kei ti. Puman, ‘Koi hi Isua nei razul ha, ati.

¹⁶Tenchu anthui ro na ke mang tan anding ro hongamo neina mu hanuk keina manmu anga hava ngai ruia nang hi sin a tho le ariata keina phun hava mandona keina manmu.

¹⁷Akom u na keina tirna ha mi ngai le Jentail mi ngai ata na mazok ka ti ati.

¹⁸Amani mit nangin nei malonga azing kar ata avara hanuk Soitan ei mang ata Pathian tiang ei hong kira koi ei na iam lehan ei siat ei huia mi anthiang ngai bila nina ei mantheina rang,’ ati.

¹⁹“Hasik han, O reng, Agrippa hava anralna nial thei lai makung.

²⁰Tenchu mansana Damaska mi ngai kom, nuka Jerusalem le Juda mi lampuia hanuk Jentail ngai kom kei ril amanin a malung ei kira Pathian tiang ei anhoina rang hanuk malung athul dik taka sin ei thona rang.

²¹Hava sika Juda ngaiin Biakina ei na sur u na athat rang ei na val u.

²²Tenchu Pathian kom ata sanna ka mana avian ten kei landinga asin le alian ngai dora koma kei ril. Deari ngai le hanuk Mosin ei ni ranga ngai ei ril ei se hiva baka chu ite ril lai makung:

²³Hatuka hava ha hiva Krista hi antak tiar intia hatuka ama hin mansana athi ngai anthuina lehan a mi ngai le Jentail mi aninin koma avarna ruiril inti.

²⁴Hantin han aman ei satna chong ei ril hava lai tak han Phestan anring sabaka, “Paul achang ke na ni, nei theina atam han ei na man chang ke ani zei,” ati.

²⁵Paulin, “O pu sa khit Phesta! Achang ni making tenchu atak le hianna chong ke kei ril.

²⁶Adika chu Rengin hiva rui dora ariat hatuka ama makunga angam sabaka chong kei ril asik chu kei mandon, hiva hi ite rengin ei riat noka ni maka a kila antho ei ni nok sika.

²⁷O reng Agrippa! Deari ngai hi na iam mo? Ka na riat na iam,” ati.

²⁸Hanke Agrippan Paul arang ha, “Anrapa Kristian anan changna nei na val ke anga!” ati pe.

²⁹Paulin, “Pathian koma kei zong hi anrapa mo, asota mo nang rong ni mak tenchu atei um mi dora aviana ka chong anngai dora hiva anga ankhit luia koi ka anga hantin han om rase!” ati.

³⁰Hanke rengin ram a oppu le Berniki hanuk amani bila om mi ngai anthui u na.

³¹Hatuka mun atei a ase a ava chong u na, “Hiva mi hin thina khop le ankhumna khop ite tho mak,” ati u.

³²Hatuka Agrippan Phesta arang ha, “Hiva mi hin Kaisara kom devan man thar no sela chu zok thei inti ba,” ati pe.