Read Ranglong KUITIR 28 Bible Online

KUITIR 28 - Ranglong bible

KUITIR 28

¹Na zok suale nei riat thei ha mualanlan ha a raming Melita.

²Hatuka havana om a ram mi ngaiin koini chunga anhui om alei manlang u na hava han rua le adai sika moi alei tho u na koini na loma ana ngak u.

³Tenchu Paul han thing lo khat ava laka ha moi chunga atuale chu moi ei luma marul sokinching a suaka akut ama chuka an ok tita a om.

⁴Hava han ha ozea ngai han akuta ha nukanei anthoi amu u na alei anril u na, “Hiva mi hi suam amang nget ke ni inti, tipuilian ata a zokam dik nan mandam lai mak.”

⁵Tenchu akut a thinga ha nukanei ha moi a atua hatuka a kut ite ang mak.

⁶Hava han hangai han a maruang u na anthing inti hano phila kiak raka thi nget inti tenchu asotpa a maruang sua u le chu Paul achunga ite antak ei tong nok amu u na amanin atei aman don u na ei ti u, “Ama hi raluai ke!”

⁷Hava mun kola han ha mualanlana Publia tina mi alian khit anei ram adon aman ana manlian sabak ana lei poma nin thum tenpei khuala ana lei don.

⁸Havalai tak han Publia apa ha ei na le von ana rikhuana ana na a zal hanke Paul ha a sunga ama kom asena borzong chunga aluna kut a dapa a mandam.

⁹Hava ha ani suale atei ana ha mualanlana om dora a honga adam u.

¹⁰Hatuka amanin achalaka ana manlian u hanuk nan phet tiang anang nei ti ngai rakuanga ahong koi u na ana pek u.

¹¹Tha anthum atheng suale Aleksandria rakuang khata na chuanga nan phet, ha rakuang han anlap theina andangna “Parual Anphir Pathian ramil” adona. Ha mualanlana nudin ei man kana ei om u chachak ani na.

¹²Hatuka khuana na hong anbena hava han ni anthum na om.

¹³Hatuka havan ata nan leng nan lenga Rhegiona na va suaka ni khat suale sim thinthi anthoka. Hatuka ni annina na Puteolina na va suak.

¹⁴Hava muna unai senkhat le na van mu hatuka amanin ana mathem, ana lop rei u na ni sari abil u na na om hantin han Rom nei va suak.

¹⁵Havan ata unai ngai um koini thang a man u na Appia bazar le khualbuk anthum tenpei ana lei hong zong u amani ha Paulin a mu na Pathian a manpaka anngamna anei zei.

¹⁶Roma na va suak suale Paul a rung sipai ngai lehan aningbarchana ompui rang phalna aman zei.

¹⁷Hatuka ni anthum suale Paul Juda ngai ulian ngai, ha akuia abuma hanuk anchun u le aman hangai ha ei ti pe, “Unai ngai koi hi ka nam upa riti om ite ka dui nokam hanum Jerusalem ata kuitir ansur anga Rom ngai kuta anbetok kei ni.

¹⁸Hatuka amanin ka rui ei ril u na athatna rang khop kei masial ei man u nok sika anan zok rang ei val u.

¹⁹Tenchu Juda ngaiin bai ei mankham u na Kaisara kom devan andom kei nang. Ka nam ngai chunga ite ansiat rua chong adon ni makung.

²⁰Hava sika han koi nangni le antonga le a chong ranga keina kui u asik chu Isarel ngai sabei sika hiva zingzir kei anthung.”

²¹Amanin ei ti pe u, “Koinin nang na ruia Juda ata lekha ngal man mak me hanuk unai ngai bilam tute hivan honga na thang asia na pe u mak hanuk chong asiam anril mak.

²²Tenchu imo na mandon hava ha na mur ata a riat rang na zot asik chu hiva ngai ruia hi koinin na riat mi doran hiva pol ruia chong asia ei ril u.”

²³Hava suale amanin nikhat antin u na ha nikhua chu a tampa mi akom ama ina a hong u. Hanke amani kom aman zing ata ani bui tenpei a mantheia Pathian ram rui ei manriat, hanuk Mosi Dan le deari ngai lekhabu laka Isua rui hangai ha aril ranga ei val.

²⁴Hava han senkhat chu a man nuama, senkhatin chu iam maka.

²⁵Hantin han amani bila ei mandon anrual maka achina ase u man han Paulin hiva chong khat hi aril pe u na: “Ratha Anthiangin deari Isaiin nangni khuk ngai kom han asadima ei ril!

²⁶Hintin hin ei ti, ‘Hiva mi ngai kom sena va ril ro. Nangnin anngai chu rangai un na ti, tenchu tuak thak uno ta ni. Hanuk mit le en en un na ti tenchu re thak uno ta ni.

²⁷Asik chu mi ngai malung akuruak ke ani zei anngaina rang akuar u aping ke ni zei, hanuk amit u ei manthim ke ni zei, Nino sela amanin mit le mu untia hanuk kuar le rangai untia, lama a malung lehan tuak untia hong kir unti, Hatuka koiin hangai ha mandam lam ning.’ ”

²⁸Hantin han, “Re u tan Jentail ngai kom Pathian hi ei mazokna ei antira hatuka amanin rangai unti,” ati.

²⁹Hatuka Paulin hiva chong ngai aril suale Juda ngai achalaka ankhal chunga aloma achin zit u.

³⁰Hatuka Paulin ha kum anni tenpei a in luana ina a om. Hanuk mi akoma a hong aloma alei phama.

³¹Pathian ram rui arila, Puma Isua rui a manchuna angampanga arila tuten khar thei mak.