Read Ranglong KUITIR 3 Bible Online

KUITIR 3 - Ranglong bible

KUITIR 3

¹Nikhat chu borzong lai tak khului tiang dar anthum dama bor azong ranga Pitor le Johon Biakina ei se u na.

²Havalai tak han mi khat ei hong razona ei hong koi u anzir ata akhor ama ha ani khuana Biakina Makot Asa anti hava han ei hong siak u, ankhom ahong ngai a lut ngai kom ei man na ranga.

³Aman Pitor le Johon ha Biakina alut ranga a muna aman ranga kut a lei do.

⁴Hava han Pitor, Johon le ama tiang anhoi sadim u na ei ti pe, “Koini tiang na enro.”

⁵Hanke aman amani tiang ei ena amani kom aman lak rang ei ngak.

⁶Tenchu Pitorin ei ti, “Rangkachak, rupa nei makung tenchu kei nei tak hi na pe ka ti Nazaret Isua Krista raminga kal choia chei ro,” ati pe.

⁷Hava suale aman achang kut a sura a mathui. Havan len han a ke le a keramit ru anchang len.

⁸Hatuka ama ha antoma anthuia anding hanuk kal a choi a a chei. A chei chunga, antom chunga Pathian ei manpak tir a bil u na Biakina ava lut.

⁹Mi doran kal ei choi le Pathian ei manpak a mu u.

¹⁰Hatuka amanin ama ha a riat u hiva hi ha Biakin Makot Asana ansuta kutado ha hatuka ama chunga imo ei ni ha hava ha achalaka ei anlaia a malung ei zing u.

¹¹Hatuka aman Pitor le Johon ha ei sur tita ei om ha mi dora anlai a amani kom Solomon Tuamai atia tuala a hong u.

¹²Hava ei muna Pitor mi ngai ha ei ti, “O, Isarel mi ngai, hiva mi sika imo na chang nei mandong u? Hanuk koini na ranak le nei theia ama hi kal nei manchoi atia nei mandon u na ichangmo koini tiang nei na en chian u?

¹³Abraham, Isak, Jakob a Pathian koini chipui Pathianin ha Isua ha ei mansang ha nangnin an mumak ngai kuta nei pek u ha hanuk Pilatin anzok rang ei ti han hava han ama kom nangnin nei zot u nok.

¹⁴Nangnin ha anthiang le minzik ha nei tel u nok hatuka nangni ranga mi that angkhat ha nei zong u.

¹⁵Tenchu nangnin damna Puma ha nei that u ama ha Pathianin a thi ngai bil ata ei mathui koini hi hava a riat.

¹⁶Hatuka ama raminga iamna sika hiva mi nei mu u nei riat u ama raminga ama hi ei manrat ama pek iama na maton u na ama hi ei mandam phat.

¹⁷“Atun, o unai ngai, ka riat nangnin riat lui kara ha sin ha nei tho u. Hava anga na ulian u ngaiin um ei tho u.

¹⁸Tenchu Pathianin Krista antak ei tiar rang rui dora deari mura mana ei lei manriat hava dora hintin hin ei chuk ani zei.

¹⁹Hantin han nangnin malung makhir u ta ro, kir sir u ro. Nei siat u ei na hui pe u na ranga hantin han Puma makung ata alum ha ei dai theina rang.

²⁰Hatuka nangni ranga tiana ei mansuk Krista, ha Isua ha, aman ei hong mathuan na rang.

²¹Pathianin man ata a deari anthiang ngai kom alompeia athara ansinretna hun ahonga tung nok maseng vana lei om inti.

²²Mosin ei ti, ‘Puma Pathianin nangni rang na u na nai u ngai kar ata koi ka anga deari khat manlang inti.

²³Deari chong a tel nok tak chu Pathian mi ngai kom ata anhenga la hek inti.’

²⁴Hatuka deari chong aril ngai kara, Samuel le ama anuka a hong deari ngaiin um hiva hun rang chong ei lei ril u.

²⁵Pathianin deari ngai amanga chong ei tin ha nangni na ranga keng. Hatuka Pathianin nangni ngai na pu rual ata riti ei na pek u ha nangnin nei ansem pui u ama han Abraham akom, ‘Na khuk ata ramuala mi dora chunga borsang pe ka ti ati.’

²⁶Pathianin asuak ha aman piang suale na kom u na ei hong tir mansa na nei dik u nokna ngai ata ang kha khata nei hong kir u na hava lehan borsang ei na pek thei u na rang.”