Read Ranglong KUITIR 4 Bible Online

KUITIR 4 - Ranglong bible

KUITIR 4

¹Amani ha mi ngai kom chong aril u lai tak chaizung ngai le Pathian Biakina sipai ulian hanuk Saduki ngai anlaiseka amani kom a honga suak u.

²Achalaka a tak ei si u asik chu hangai han mi ngai ha ei manchu u Isua ha athi ngai bil ata anthuiretna ei ril u.

³Hatuka amanin hangai ha ei sur u na zing khuavar tenpei ei khum u na ei siak u asik chu hava han ani bui ke ni zei.

⁴Hanum chong anngai ngai dora ha, hangai bila atampan a iam, hava han pasal chian asang ranga ni zei ni.

⁵Zing khuavara kho ulian ngai, atar ngai, minchu ngai Jerusalema a hong anchun u.

⁶Hanuk Ana Chaizung Lian Kaiapha, Johon Aleksaendar hanuk Chaizung Lian a u anai ngai aloma a hong anchel u.

⁷Amanin hangai ha a lai taka a manding u na ei rakel u, “I theina le mo? I raming le mo hiva sin nei tho u?” atia.

⁸Hanke Pitor Ratha Anthiang abita hangai rang ha ei ti pe, “O, ulian ngai le atar ngai:

⁹mi asiat khat ei ansan rui sika avian nei na rakel u hontina ei dam mo atia?

¹⁰Hano nangni na lom u na Isarel mi hiva hi re u ro. Nazaret Isua Krista raminga ha nangnin Krosa nei pek u ha Pathianin athi ngai bil ata ei mathui ama theina le hiva mi hi nangni na maton u na adam vanga andinga ei om.

¹¹‘Ama hi ha lung ha nangni aphun ngaiin nei poisak u nok hava ha akila lung adet khit a chang zei.’

¹²Hatuka ateia tute kom zokna om mak, anvan thuaia miring bila aman raming reng om mak, ha raming le koinin zokna nei manna rang.”

¹³Hanke Pitor le Johon ei ngam amu u na hanuk lekha thei lui mi annuai ariat u na hangai han a chang ei mandong u.

¹⁴Hatuka ha damna man miring ha abil u na andinga ei om amu u na dem thei u lai mak.

¹⁵Hava suale hangai rang ha anchunna ata a panga ase ranga chong apek u na amani le amani hintin hin anti u, “Hi mi ngai rang hi imo tho ma ni?

¹⁶Asik chu hangai ata sin alian tak andangna sin ei antho ni zei, hava ha Jerusalema ngai dora kom ei anlang. Hava ha koinin tel lui a om thei mak me.

¹⁷Tenchu chong ha mi ngai bila ei ansem riam nokna ranga hiva sika maphut inti. Tute kom hiva raminga ite ei ril u nokna ranga.”

¹⁸Hava suale amanin hangai ha a pai u na hiva chong hi apek u, nangnin Isua raminga chong ite ril u lai ta ni manchum u lai ta ni.

¹⁹Tenchu Pitor le Johonin a masanga amani rang ei ti u, “Pathian chong neka nangni chong atel hi Pathian makunga adik mo dik mak mo nangni lenin zek u ro.

²⁰Asik chu koinin nei mu le nei riat hi hava ha ril luia om thei mak me.”

²¹Hava suale amanin hangai ha amaphut sa u na a mazok u min chia, hangai ha anchaina lampui man u lai mak asik chu ei ni ngaia han mi doran Pathian ei manpak u.

²²Asik chu ha damna peka andangna sin ei anthona mi ha a kum kum sommanli neka ani zei.

²³Amani ha azok sua u le alom u ngai kom ase u hatuka chaizung ulian ngai le atar ulian ngaiin ei ril u ngai ha aloma a manthei zit u.

²⁴Hava a riat u na alom u na malung khata Pathian ranga ankheka ei ril u. “O Puma, nang hi anvan, phil, tipuilian hanuk hava ngai a om dora a sinpu.

²⁵Nang na suak koini na Pa David a mura Ratha Anthiang lehan, hiva chong hi nei ril. ‘Jentail ngai ichangmo atak ei si u ha. Namtinin ichangmo ei mandon papei u?

²⁶Phila reng ngai anding u na, Ruaipu ngai anchun u na; Puma le Krista chunga han.’

²⁷Asik chu ataka na Suak anthiang Isua na Sariak nei manthi ha ama chunga Herod le Pontia Pilat Jentail ngai le Isarel mi ngai le hiva khuana munkhata ei anchun u ha.

²⁸Na kut le nei mansuk man ata ani ranga ani suana han.

²⁹Hatuka atun, o Puma sova ngai ei na maphut u enta. Hatuka hi na suak ngai hi angam sabakna chong ei ril u na rang ranak na pe ro.

³⁰Andam theina rang na kut hong son ro hatuka na suak anthiang Isua raminga andangna sin le tichangbui sin ei antho theina rang.”

³¹Amanin bor azong u le ei anchun u na han hava mun ha annika hanuk amanin Ratha Anthiang abit u na a ngam sabaka Pathian chong arila a om u.

³²Hatuka a tampan ahong iam u na amani ha mandon khata malung khata ei ni u. Ei nei u ngai ha ite a binga a ta ti u mak, alompeia lokona ei siak u.

³³Hatuka kuitir ngaiin sinthotheina le Puma Isua ei anthuiretna rui ei ril u hatuka achung u na lungkhamna ei om.

³⁴Hangai bila tute a ngoi om mak ansam u mak phai a don le in a don ngai han ei zuar u na a man kuitir ngai ke kunga ahong siak u.

³⁵Ei nang u anga han hantin han ei pek u.

³⁶Hatuka Joseph kuitir ngaiin Barnaba ei ti ha. Na malet ten a omzia chu “Lungngamna nai” Levi chi Kupra mualanlana mi ani.

³⁷Aman phai bong khat a dona hava ha a zuara aman ha kuitir ngai ke kunga ava siak.