Read Ranglong KUITIR 5 Bible Online

KUITIR 5 - Ranglong bible

KUITIR 5

¹Tenchu Anania tina mi khat a bila a nungak Saphira phai khat azuar u.

²A nungak le anril u na hava a man ha a khai laka a khapa atei ha kuitir ngai ke kunga a hong siak u.

³Hava han Pitorin ei ti, “Soitanin ichangmo na malunga Ratha Anthiang ahuang ranga ei man bita phai man ata nei khai a nei siak?

⁴Ha phai ha na ta ni mak mo? Na zuar lehan hava ha na ningneina nimak mo, hanle hantin han na malunga ichangmo ei anpiang? Nangin miring kom milak nei tho ni mak Pathian kom ke nei tho!”

⁵Hava chong ei riat le Anania a kiaka athi len hatuka a riat ngai doran alom u na achi u.

⁶Hatuka ruathar ngaiin puan le atuam u na apanga a choi u na ava phum u.

⁷Hatuka dar anthum suale a nungak ahonga tung tenchu imo ei ni ha hava ha remak.

⁸Hava han Pitorin a rakoka, “Na ril ta nangnin ha phai ha sum hador le mo nei zuar u?” Aman, “Ani,” ati na, “hador le ke nei zuar” ati.

⁹Hava han Pitor ama ha ei ti, “Nangnin Puma Ratha ha nei mansin u na ranga ichangmo chongmunkhat nei chang u? En ta, na ruathar, aphuma ase ngai makota ahonga tung u zei nang um na razon unti,” ati.

¹⁰Ama ha havan len akiaka athi len hatuka ha ruathar ngaiin ama ha athia a hong mu u. Hanke a panga atuang u na a ruathar kola a phum u.

¹¹Hava han kuibing doran hanuk hi chong ariat dora aloma achan achi u.

¹²Hatuka kuitir ngai kut lehan mi bila andangna sin a tam le changdong amu rua ei antho hanke amani ha a lom u na Solomon atuala malung khata ei hong suak u chachak.

¹³Tenchu mi tei ata chu abil u na anchel rang tuten ngam mak. Hanum mi ngaiin amani ha lalchi ei tho u.

¹⁴Hatuka pasal le nupang atampan a iam u na Pumana a hong anchel tir u na.

¹⁵Hatuka mi ngaiin ana ngai apanga lampui ngai a amanzal u na vaienga ei siak u na Pitor a ralimin lua chu a del mo atia.

¹⁶Hatuka Jerusalema a sir apanga kho ngai ata mi atam ana ngai ratha annim kachai ei o mi ngai ahong tuang u na a hong anchun u hava ngai ha alei mandam.

¹⁷Hanuk Chaizung Lian le alom ngai doran Saduki ngai anthoka a tak ei man si u na ei mumak u.

¹⁸Hanuk kuitir ngai ha asur u na lungina a khum u.

¹⁹Tenchu zana Puma vanpalai khatin lungin makot ngai a malong pe na amani ha a panga a hong tuanga ei ril:

²⁰“Se u tan Biakina andinga mi ngai ha damna chong dora va ril u ro” a tia.

²¹Hiva hi ariata zinga Biakina ava lut u na a manchu u, hava han Chaizung Lian le a lom ngai ahong u na ruiril ngai le Israel nai ngai, atar ngai apaia a manchun u hatuka hangai ha ava lak rang lungina a tir u.

²²Tenchu raimol a sur ngai ha ase u na lungina hangai ha va mu u mak.

²³Hanke a honga kir u na a hong ril u, “Na ena lungin ankhar sadim makota angak ngai anding u, tenchu makot na malonga asunga tute mu mak me!”

²⁴Hiva chong ariat u na Biakina ulian le chaizung ulian ngai andona imo ti mani hontin nei tho rang, imo ei ni? ati u.

²⁵Hava han mi khat ahonga hangai ha hintin hin a hong ril, “En u ta! lungina nei khum u ngai ha hangai ha Biakina andinga a om u na mi amanchu u!”

²⁶Hanke sipai a ruai han raimol anlek ngai a tuanga hava han ase u na ahong ruai u tenchu anruma ni mak a asik chu mi ngai ei achi u lung lam na deng u ni ei ti u.

²⁷Hanuk amanin hangai ha ahong tuang u na ruirilna na amanding u na Chaizung Lianin hangai ha a rakela ei ti:

²⁸“Koinin nangni rang hi hiva raminga ril u lai ta ni atina a detmata nei na khar hanum enta, na chong ril u na Jerusalem nei manbit thak u hatuka ha mi a thisen koini na chunga ansul rang nei en u!”

²⁹Tenchu Pitor le kuitir atei ngaiin a masang u na, “Miring ngai chong nekten Pathian chong ke nei pom rang.

³⁰Koini chipui ngai Pathianin ha Isua ha ei mathui ani zei ha nangnin thinga nei tara nei mathoi u na nei that u.

³¹Hatuka ama ha Puma le Sandampu na ei sina achang kut le ei mansang. Isarel ngai malung a thul le asia saina apek rang.

³²Hava ngai dora ha koini a riat hanuk ha Ratha Pathianin a dan azi ngai ei pek Ratha Anthiangin um ariat.”

³³Hava chong ariat u na amani ha a malung anthok u na a that rang aval u.

³⁴Tenchu ruirilna na Gamaliel ati na mi khat Pharisi ama hi mi dora koma lalchi man dan ariatpu andinga ha mi ngai ha a panga masuak tot u ro ati na chong apek.

³⁵Hava suale aman amani ha ei ti, “Isarel mi ngai ha mi rui a nangnin imo a tho rang nei val u, hava rui a anreng u ro.

³⁶Asik chu hava man han Thuda anthuia aninga koi hi ka ni atina hanuk abila raza manli ni inti anchel u. ama ha athi hanuk ama azi ngai dora ha aloma a chet zit u, tute antian mak.

³⁷Hava mi a nuka raming anziak lai Galilia Juda anthuia mi hozetmo chu a abila a tuang amam a siata hatuka azi dora chu aloma ankhai zit u.

³⁸Atun keina ti ni u zei hiva mi ngai ata mong u ro, om u rase asik chu hiva mansukna hava rui ha miring ata aniten anpei inti.

³⁹Tenchu Pathian ata aniten hangai ha ansiat ranga na rahui om u mak, thei en direi Pathian len dui imo na ni u!”

⁴⁰Hava han amanin ama chonga a zot u na hatuka kuitir ngai ha a kom a kui u na a zem u hanuk Isua raminga chong aril akhar u na ama zok u.

⁴¹Hanke amani ha ruirilna mun ata raisan chunga ase u asik chu amani ha hava raminga maimok ansakrua na ei antel u.

⁴²Hatuka amani ha a nikhuana Biakina le ina ei manchu u hanuk Isua ha Krista hava Thang Ahui ei ril mong u mak.