Read Ranglong KUITIR 7 Bible Online

KUITIR 7 - Ranglong bible

KUITIR 7

¹Hava suale Chaizung Lian han ei ti, “Hiva chong ngai hi atak mo?” Aman ei ti:

²“O unai ngai le pa ngai, rangai u ro. Koini na pa Abraham ha Harona a om man Mesopotamia na a om lai hava han Puma Pathianin ama ha ei antongpuia ei ti,

³‘Na ram ata le na tianga mi ngai ata suak ro hatuka ram keina man muna taka han se ro.’

⁴Hanke ama ha Kaldai ram ata a suaka asena Harona ei va om hatuka a pa athi suale Pathianin ama ha, havan ata hiva rama ei hong tuang. Atuna nei om u na ram hi.

⁵Tenchu hi a rama om rang pe maka kepha khat mun ngal phil pe mak ten, chong ei tin aman ama le ama suale ama achi a lua ranga hava ha pe inti, hava han nai ei la nei nokam.

⁶Hatuka Pathianin hintin hin ei ti, ‘Ama chi ngai ram ateia khuala om unti min suak man chang inti hangai ranga kum raza manli sep unti.

⁷Hatuka amani suak anchang ngai ha koi arui u ril ka ti Pathianin ei ril sa chu, hava suale amani ha hong suaka hong unti hatuka hiva muna koi na biak unti.’

⁸Hatuka aman ama ha vun at riti ei pek hatuka hantin han Abraham Isak ha ei mazir hanke ni riat nikhuana ama ha a vun ei at. Nukhona Isak han Jakob hanke Jakob han chipui somleianni amazir.

⁹“Hatuka ha chipui ngai han Joseph ei mumak u na ama ha ei zuar u le ama ha Aigupta na ava om.

¹⁰Tenchu Pathian ama bibila a om hanuk ei antakna, ata a khoka hatuka Aigupta reng Pharo koma lungkham le nina apeka hava han Pharon ama ha Aigupta le a in dora na uliana aphun.

¹¹Hava suale Aigupta dora le Kanana maitam achul a chan antak a tong u na hatuka koini na chi pui ngai nek sak anang u zei.

¹²Tenchu Aigupta na bu om ti ariat u na Jakob koini na chipui ngai ha voi khatna a mathuana.

¹³Nuka voi annina na Joseph a parual ngaiin a riat u han ke Joseph a nam Pharo kom ei lan lang.

¹⁴Nuka Joseph a pa Jakob le a unai somsari lei ranga akom ei pai a ei mathuan.

¹⁵Hava han Jakob Aigupta na ase nuka ama le koini na chipui ngai a thi u.

¹⁶Hatuka amani ha Sikima a om u. Hanuk than Abrahamin sumru le Sikima Hamor nai ngai koma ei rachok hava han anphum.

¹⁷“Nuka Pathianin Abaraham akom khomak ei ansam ha hava khomak ei chukna rang a nai le mi ngai Aiguptana a pung u na a tampa ani u.

¹⁸Nukhona Aigupta chunga hanuk reng khat anpianga Joseph re lui mi.

¹⁹Ama koini na nam ngai lehan zia manga koini chipui ngai rang aphenenga ei val chu anaite u ngai dora ei masul u na ei dam thei u nokna ranga.

²⁰Hava han Mosi ei anzir ama hi Pathian mitmuna a mel asa sika than thum tenpei a pa ina ei anvai.

²¹Nuka anpei suale Pharo sanun aruta a naipasala ei sin rang ei vala ei vai.

²²Hatuka Mosi Aigupta theina ngai dora anchuna athei a ama ha chong le sina a tho thei ei ni.

²³“Nuka a kum sommanli a ni le a unai ngai Isarel ngai bila anlang, arung ranga a malung anthok.

²⁴Hanuk amani bila angkhat pengsom ei tho lai amu na, a san a, pengsom athopu, Aigupta mi ha a that a.

²⁵Ama ei mandon chu a parual ngaiin re zei ni ama kut le Pathianin ei mazok ati na tenchu re u mak.

²⁶Hatuka hanuk nikhuana amani anzem u lehan aman amani kom anlanga ei anngoi u na rang a tho na, ‘Parual ke na ni u ang khat atei chunga anzik luia ichangmo nei antho u?’ atia.

²⁷Tenchu a inkolmi chunga anzik lui atho ha ama ha atuarraka ei ti, ‘Tumo nang hi koini ruiril pumana ana phun?

²⁸Mizan hontinmo Aigupta mi khat nei that hava anga kom ana that rang nei na en mo?’

²⁹Hava chonga Mosi a rota hatuka Midian rama ava oma hava han naipasal anni a mazir.

³⁰“Nuka kum sommanli akip le Sinai mual philchar rama vanpalai khat achul anbuk khata moi chuanga antong pui.

³¹Mosin aena ha ramil ha, achang ei mandonga asadima a en ranga ava depa hava han Puma he hiva hi ei riat:

³²‘Koi hi na chipui ngai Pathian Abraham, Isak le Jakob a Pathian.’ Hava han Mosi annoka en ngam sa dim lai mak.

³³Nuka Puman ama ha ei ti, ‘Na ke na kekok khek ro. Asik chu nei andingna mun hi phil anthiang keng.

³⁴Aiguptana na mi om ngai antakna ka mu zei amani ei ankhek u ka riat zei hatuka amani anzok ranga kei hong chum. Atun hong ro Aiguptana na ma thuan rong.’

³⁵“Ha Mosi ha amanin ei pom u noka ei ti u ha, ‘Nang hi ruirilpu le uliana tumo ana phun?’ Ama ha Pathianin vanpalai; ha anbuka ei antongpui, ha vanpalai akut len le ulian le anzokpua ei tir.

³⁶Aman Aiguptana tipui sen le philchar rama kum sommanli tichangbui le changdong sin tin anlanga hangai ha ei hong mazoka ei hong tuang.

³⁷Ama hi ha Mosi, ha Israel nai ngai rang hiva chong hi ei ril. ‘Pathianin nangni ranga na parual u ngai bil ata ka anga deari khat manpiang inti.’

³⁸Ama hi philchara kuibing bila ei om ha vanpalai ha Sinai muala ama kom chong ei ril aman ama le koini na chipui ngai bila ei om, aman koini ngai ranga ana pek ranga damna chong ei manhong.

³⁹“Koini na chipui ngaiin a he ei tel zot u nok hanekten ama ha ei henga ei pei u. Hatuka a malulung u na Aigupta tiang ei kir ret u.

⁴⁰Aron ha ei ti u, ‘Koini rang ramil na buak pe ro. Ama ha koini na maton tira se rase asik chu hi Mosi hin Aigupta ram ata koini hi ei na masuaka ei na hong tuang imo ei nin zei, re mak me.’

⁴¹Hatuka hava lai han serat te ei sin hanke ha ramil sika dali ei dar u hanuk akut sin neinun le a rai ei mansan u.

⁴²Tenchu Pathian amai azinga amani ha anvana arasi abiak ranga apek hontinmo deari lekhana anziak a om: ‘O Isarel chi, philchar rama kum sommanli han nangnin ka ranga sa thata le nuam pek dali na dar u mo?

⁴³Nangnin Molok tham in le Raphan ramil nei razon u hatuka arasi ha ramil ngai abiak ranga nei buak u. Hatuka nangni hi Babulon son tiang suaka na mathan u ka ti.’

⁴⁴“Hontinmo aman chong ei na pek anga riatna tham in koini na chipui ngai kom ei om aman Mosi ha aril nangin om lak rua nei mu anga hava anga hava ha sin ro.

⁴⁵Hatuka koini pi pu ngaiin amani huna ei man u na Josua bila ei hong koi u Jentail ngai omna na alut u le Pathianin koini na chi rui ngai makung ata ei not u ha puanin David hun tenpei ei om.

⁴⁶Ama hi Pathian mit muna lungkham ei tung hanuk Jakob a Pathian ranga omna khat asin ranga ei zong.

⁴⁷Tenchu Solomonin ama ranga in khat ei sin.

⁴⁸“Hanum ranak anei han kut sin ina leng ngai mak, Dearin ei ti anga.

⁴⁹‘Van ka reng chomphang Phil hi ka ke pha. Puman ei ti nangnin Koi ka rang hontinmo in nei sin u rang?’

⁵⁰Hanle ka pongansana rang mun hovanmo? Ka kut hin hiva ngai dora hi ei sin ni mak mo?’

⁵¹“O matingpui run khir ngai hanuk malung le kuara vun an at lui ngai! Nangnin Ratha Anthiang na lei dui babang u, na chipui u ngai hontinmo? Nangnim hantin den.

⁵²Nangni na chipui u ngaiin hova deari mo ei not u nok ha? Amanin amani ha ei that u mana adik ahong ngai anan thei ngai ha nangnin atuna an mumak ngai kuta nei peka nei that u ha.

⁵³Nangnin Vanpalai ngai ata riti omdan nei man u tenchu nei mang u nok!”

⁵⁴Hiva chong ariat u na amani ha a malung ei anthok u ama ranga a ha ei arial u.

⁵⁵Tenchu ama ha Ratha Anthiang abita anvan tiang anhoia a en chiana Pathian lianna le Pathian chang tiang Isua andinga amu na.

⁵⁶Hatuka aman ei ti, “Enta! Van anlonga a om hanuk Miring Sapa Pathian chang tiang anding ka mu!”

⁵⁷Tenchu amani ha anring sabak ankhek u na akuar a maruk u na lokona munkhata achunga avan zuan u na.

⁵⁸Hatuka ama ha khua ata a masuak u na lung adeng u hanuk ariatpu ngai ha a puan u ngai a kheka Saul atia ruathar khat ke kunga asiak u.

⁵⁹Hintiang amanin Stephan ha lung a deng u na. Hatuka ama ha ankheka bor ei zong, “O Puma Isua, ka ratha hi na la pe ro,” ati.

⁶⁰Nuka ama ha a mankhuk abila anringa ei ti, “Puma hiva ngai chunga hiva asia sur no ro,” ati na ama ha ei in ani zei. Hatuka Saulin ama ei anthatna a lei pom.