Read Ranglong KUITIR 8 Bible Online

KUITIR 8 - Ranglong bible

KUITIR 8

¹Hava nikhua chu Jerusalem a kuibing chunga anrahokna a suak sabak zei hava han kuitir ngai baka chu atei dora Judai rama le Samari lampuia anthek chit u zei.

²Hatuka ruaisi ituk lekin mo Stephan ha ava phum u, hanuk ama ranga achalaka achap u.

³Tenchu Saul kuibing notna ha ei tho a in kipa a luta pasal le nupang ngai ha ei kei ei tuanga lungina ei va thak.

⁴Hava han anthek rak ngai ha kiltina ase u na thangahui chong ei ril u.

⁵Hatuka Philip Samari khuana ase a mi ngai kom Krista rui ha ei va ril.

⁶Hatuka mi doran Philip a chong a rangai u na hanuk ei tho andangna sin ngai dora amu u na malung khata achong ha ei tel u.

⁷Asik chu ratha annimin ei o, a tampa ata ha ratha ngai dora anring sabaka ankheka ei suak hanuk azeng a tampa le akhor ei dam.

⁸Hava han hava khua achan a rai ei san u.

⁹Tenchu Simon atia mi khat a om, ama ha man ata hava khuana mitpialdoi sin ei tho hava han Samari nam ha ei anlai u aninga milian ka ni ei anti.

¹⁰Ama chong ulian naipangin ei tel. “Hiva mi hi, ‘Pathian ranak ha achan alian,’ ” anti ha ei ti u.

¹¹Amanin ama he ei pom u na asik chu hiva hi hun asot pa ata a doi thei le amani ha ei manlai babanga ei om.

¹²Tenchu Philipin Pathian ram le Isua Krista raming ruia thangahui aril le amanin ama chong a iam u le hava han pasal le nupang ngai um baptisma ei chang u.

¹³Hatuka Simon amam a iam zei hanke baptisma alaka Philip abibila ei om hatuka andangna sin le sinthotheina lian ei tho a muna ei anlai.

¹⁴Jerusalema kuitir ngaiin ariat u na Samari ngaiin Pathian chong apom u zei ati na hanke amanin Pitor le Johon ha amani kom ei tir u.

¹⁵Amani ahong u na arang u na bor ei zong pe u amanin Ratha Anthiang ei man u na rang.

¹⁶Asik chu atun tenpei amani tute chunga Ratha Anthiang la chul mak, amani ha Puma Isua raminga rong ke baptisma ei la chang u.

¹⁷Hanke amanin hangai chunga akut ei dap u na hatuka amani han Ratha Anthiang ei la man u.

¹⁸Hatuka Simonin a muna Kuitir ngai akut dap u na lehan Ratha Anthiang aman u, atia, hanke aman amani kom sum a hong koia ei ti:

¹⁹“Koi um hava thotheina na pe ro koiin achunga kut kei dap tak Ratha Anthiang ei man u na rang.”

²⁰Tenchu Pitorin ei ti pe, “Na rupa sum ha na bila siat rase asik chu Pathian pek ha sum le anchok rang malung nei vong.

²¹Hiva ruia na changai hi ite om mak asik chu na malung Pathian makunga anzik mak.

²²Hasik han nei sa nokna ata na malung makhir ro hanuk Puma kom zong ro, thei! Na malung mandon andual um thei kukui mo.

²³Asik chu ka na mu nang hi asia dik lui sabak le ankhita a om ke na ni zei.”

²⁴Hava han Simonin a masanga, “Nangni lenin ka ranga Puma kom na zong pe u ro, nangnin hongmo nei ti u ha ka chunga ei chuk nokna ranga,” ati.

²⁵Nuka amanin aril u na Puma chong ril chunga ase tir u na Samari ngai khua tampana thangahui ei sem u.

²⁶Nuka Puma vanpalai khat Philip rang ha ei ti, “Anthui ro sim tianga lampui Jerusalem ata Gaza tianga ava chum hava lama se ro, hava mun ha philchar.”

²⁷Hava han ama anthuia ase. Hatuka enta, Ethiopiana Kandaki rengnu thuaia sutmun ansang mi khat thaidor rengnu a neinung dora a rung ei ni ama ha Pathian a biak ranga Jerusalema ahong.

²⁸Nuka a kira ase hatuka a tolaia ansuta Isai deari lekha a pore.

²⁹Hava han Rathan Philip ha ei ti, “Se tan, so tolai so va dep ro,” ati na.

³⁰Hava han Philip atana ava depa ava rangai ama han Isai deari lekha ei pore. Philipin ei ti, “Nei pore ha na riat mo thei?” ati pe.

³¹Aman ei ti, “Min ana manthei nok ten hontinmo kei riat rang?” Hanke aman Philip ha akom ansut ranga ei mathem.

³²Lekha buna ei pore hava ha hiva hi: “Anthat rang bera anga an dona. hanuk mual anchep ngai makunga berate ei dairek anga han, hava anga a bai ma ang mak.

³³Abui kar a rui aril na dan a suaka ama hun laia mi ngai ruia tumo aril rang Phil chung ata anuk ei damna alak ei ni.”

³⁴Thaidor han Philip ha a masanga ei ti, “Keina mok ani zei dearin tu rui mo hiva chong ei ril atheia rui mo ole mi tei rui mo?”

³⁵Hanke Philip a bai anlonga Pathian Lekha chong ata a phuta a kom Isua rui thangahui ei ril.

³⁶Nuka lampuia ase tir u na amanin ti om na kola ava suak u hanke Thaidorin, “So so ti om baptisma kei chang rang imo a khar?” ati.

³⁷Hatuka Philipin a masanga: “Na malung dora le pei na iam ten, na lak thei,” ati na. Hatuka aman a masanga, “Isua Krista chu Pathian Naipasal ani ti ka iam zei,” ati na.

³⁸Hanke aman tolai anding ranga chong apeka hatuka Philip le Thaidor anin u ti na achum u. Hanke Philipin ama ha baptisma apek.

³⁹Hatuka hangai ha ti ata a kal u lehan, Puma Rathan Philip ha a maruk viaka a tuanga hatuka thaidorin ama ha mu lai maka ama ha raisan chunga a lampui dena ase.

⁴⁰Tenchu Philip chu Azota khuana avan lang reta. Hatuka ei se balam han Kaisari khua tenpei khotina thangahui aril titira.