Read Ranglong KUITIR 9 Bible Online

KUITIR 9 - Ranglong bible

KUITIR 9

¹Saul hava hanum Puma ruaisi ngai chunga ei maphuta ei manchi, a that ranga phuk pui ei lak.

²Aman chaizung kom ei sena Damaska pol ngai dora rang lekha ei zong, hava lama ase ngai pasal le nupang le mi dora ei man tak hangai ha khita Jerusalema ei hong tuangna rang.

³Nuka ama ha ase tira Damaska kola ava suak hava han anlaiseka anvan ata ra-ang ama a sir a panga ahong el pe zuaka, hanke anlai zei.

⁴Hava han phila anboka han chong ei riat, “Saul, Saul! Ichangmo nei na rahok?”

⁵Aman, “Puma tumo na ni?” a ti na. Puman ei ti, “Koi hi Isua nangin nei rahok ha.

⁶Tenchu anthui ro khuana va lut ro, imo nei tho rang hava ha anril inti.”

⁷Hatuka ama ei se pui ngai ha aboi ei man donga andinga ei om u, amanin ha he ha ei riat u tenchu tute mu u mak.

⁸Nuka Saul ha phil ata anthui. Tenchu a menga ite muthei lai mak. Hatuka amanin a kut asur u na Damaska na a tuang u.

⁹Hatuka ama ha nin thum pei mit azinga ei om. Hanuk ite nek sak tho maka.

¹⁰Damaska na Anania tina ruasi mi khat a om.

¹¹Puman ama ha anralna na ei ti pe, “Anani.” Aman, “Puma en ta, hi hi koi,” ati. Hanke Puman ama ha, “Anthui ro, anzik ati na lampuia se tan la Juda a ina Tarsa khuana Saul raming khat mi va rok ro, asik chu enta, ama ha bor a zong.

¹²Hatuka aman ei lei mu Anania tina mi khat a honga a chunga kut ei dapa amit ei varna rang.”

¹³Ananian a masanga, “Puma mi tampa kom hiva mi rui kei rangai ama hi Jerusalema na mi anthiang ngai chunga itukmo asa nok ei tho.

¹⁴Hiva munam na raming a pai dora hava ngai ha a khit ranga aman Chaizung Lian ngai kom theina ei man.”

¹⁵Tenchu Puman ama ha ei ti, “Se ro asik chu Jentail ngai le reng ngai hanuk Isarel nai ngai kom ka raming a pel ranga ama hi kei phun sua ke.

¹⁶Asik chu manmu ka ti ka raming sika itukmo antak ei tong rang.”

¹⁷Hanke Anania asena hava ina ava luta hatuka a chunga kut adapa ei ti, “Parual andit Saul, Puma ha Isua ei honga lampuia ana mupu ha, aman koi hi ei na hong tir nang nei mu theina ranga hanuk Ratha Anthiang nei bit theina rang.”

¹⁸Hatuka han len a mita adang anlonga a muthei zei hanuk anthuia baptisma a chang.

¹⁹Hava suale nek sak athona ranak a nei Hatuka ni hozet mo chu Damaska na ruaisi ngai bila a om.

²⁰Hanke anchuna in kipa Isua rang ha Pathian Sapa ke tina ei ril len.

²¹Hatuka ama chong ril a riat ngai han anlai u na, “Ama hi hava mi ha ni mak mo? Hiva raming a pai tak ha hava ngai ha Jerusalema anchekelek ha hanuk hivan hava sik han ei hong hangai ha a khita Chaizung Lian ngai kom a tuang ranga?”

²²Tenchu Saul ha ranak anei riama hanuk Damaska na om Juda ngai han masang thei lui a ei re. Ei dikna ei ril hi, hiva hi ha Krista ani ati na.

²³Hatuka nikhua a tampa ase suale Juda ngaiin ama ha athat ranga anril u.

²⁴Tenchu Saulin amani aze tho u ariat pe hatuka amani han ama ha ei that thei u na ranga hava rang han khuana makot dora sun zan ei rung u.

²⁵Tenchu ama ruaisi ngaiin ama ha zana atuang u na kok khat le rapal tiang a masum u.

²⁶Hanuk Jerusalema ava suaka ruaisi ngai bila anchel ranga ei val tenchu mi doran ama ha ei achi u ama hi zolai a tina hava ha iam u mak.

²⁷Hava han Barnaban a kut asura kuitir ngai kola a tuang hanuk lampuia ama ha hontinmo Puma ha ei mu le Puman ama le chong ei ril hanuk hontinmo ama Damaska na Isua raminga arang sabaka chong ei ril, hava ngai dora amani kom ei ril.

²⁸Hatuka Saul Jerusalema amani bibila ei om asunga ei lut apanga ei suak.

²⁹Puma raminga angam sabaka chong ei ril. Hatuka aman Grika a chong, Juda mi ngai bila chong ankhala ei tho u. Tenchu amanin ama ha a that ranga ei val u.

³⁰Unai ngaiin ariat u na ama ha Kaisari na atuang u havan ata Tarsa khuana ama thuan u.

³¹Hava han Judai, Galili le Samari na kuibing dora phukdaia le adet tir u na. Hanuk Puma anchina le Ratha Anthiang sanna le kal achoi tir u na atampa ke ani u zei.

³²Hatuka Pitor mun atateia ase titira Ludana mi anthiang ngai kom ase.

³³Hava muna aman Ainia tina mi khat a mu ama ha kum ariat pei muna a zal, ama ha azeng rikhua tong ei ni.

³⁴Pitorin ei ti pe, “Ainia Isua Kristan ana man dam zei, anthuia na mun luak ro,” atia hava han len anthui.

³⁵Hava han Luda le Sarona mi doran ama ha ei mu hanke amani ha Puma tiang ei kir u.

³⁶Hatuka Joppana ruaisi khat a om. Ama a raming hi Tabitha a om a, Grik chonga chu Dorka ani na, a omzia “sakhi a razel.” Ama hi sin asa le pekna sina anmang ani na.

³⁷Hava huna ama ha anana athi len, hava han min ti a manbual u na a chunga athara aman zala asiak u.

³⁸Hatuka Ludda Joppa annaite ei ni sika Pitor Ludana ei om ariat u na ruaisi ngaiin ama kom mi anni atira amathem u, “Koini na kom hivan tena ahong rang sot no ro,” ati u.

³⁹Hava han Pitor anthuia amani bila ase ama ha havan ava suak le amanin ama ha, ha achung tadana a tuang u. Hatuka arong ngai alom u na ama asir apanga andinga a chap u na a om u. Dorka abil u na a om lai han Jani le apuan chi ngai ha, hava ngai dora ha ei manmu u.

⁴⁰Tenchu Pitor mi dora ama suaka ake mankhuk abila bor ei zong nukhona ha ruak tiang a ena: “Tabitha anthui ro!” ei ti. Hava han a mit a malong hanke Pitor amuna anthuia ansut.

⁴¹Hanke Pitorin a kut le ama ha a mathui hanuk anthiang ngai le a rong ngai ha a pai a ama ha adama ei manmu.

⁴²Hava chong ha Joppa kho puma anrila, hanke mi tampan Puma chunga ei iam u.

⁴³Hatuka Pitor asotpa Joppa na Simon atia mi khat mevun anchipu a ina ei om.