Read Ranglong ROM 10 Bible Online

ROM 10 - Ranglong bible

ROM 10

¹Unai ngai, ka malung ei zot le amani ranga Pathian kom ka borzongna sik khit hi sandama ei om u na ranga.

²Pathian tianga taksatna anei u ti ka riatpui u tenchu ei riat zit u na chu ni mak.

³Pathian dikna riat lui ei dik u na andet ranga tak ei sat u na Pathian koma lut u mak.

⁴Krista chu a iam tak pei ranga dikna ei mantheina ranga Dan anbangpu ei ni.

⁵Mosin, “Dana dikna zom chu ha dikna sika han dam inti ti na a maziaka.”

⁶Iamna na dikna han hintin hin aril: “Na malunga tumo vana lon rang? Hava ha Krista ha chung ata ansum ranga tina ke.”

⁷“Tumo anthuka chum rang? Hava ha athi ngai bil ata Krista ha chunga a honga aruai ranga.”

⁸Imo nei ti hi? “Ha chong ha ana dep lak ke, na mur le na malunga a om.” Asik chu Iamna chong koinin nei rila nei sem ha.

⁹Asik chu nangin na mur le Isua ha Puma atia na poma na malunga athi bil ata ei mathui ti na iam anten, sandam manin na ti.

¹⁰Asik chu min malunga ei iam dikna ranga, mur le ei pom zokna ranga.

¹¹Asik chu Pathian lekha chonga, “Ama chunga iam tak chu mualphui ansak no ni,” ati.

¹²Asik chu Juda le Grik ite ei tei na om mak asik chu lokona na Puma angkhat dak. Ama a pai ngai ha amani ranga achalaka lungkhamna apek.

¹³Pathian lekha chongin ati, “Puma raming apai takin aman sandam man inti.”

¹⁴Hanle a iam nok ngaiin hontinmo ei pai rang? Hanuk a rui re lui ngaiin hontinmo iam ni? Hanuk aril abuiin hontinmo re ni?

¹⁵Hatuka kuitir nokten hontinmo ei ril rang? Pathian lekhabuna hintin hin anziak a om, “Satna rang thang ahui aril ngai chu a ke u itukmo ei sa so!”

¹⁶Tenchu thang ahui hi alo man ei pom ni mak asik chu Isai han ei ti, “Puma koinin nei ril hi hava ha tumo a iam?”

¹⁷Hantin han iamna hi riatna sika a om hatuka riatna hi Krista chong sika a om.

¹⁸Tenchu kei ti ni zei, amanin la re u mak mo? Ariat u, Pathian lekhabun ei ti: “A he u ram dorana anthanga; A chong u ramual tenpei anthang zei.”

¹⁹Tenchu kei ti Israelin la re mak mo? Mansana Mosin ei masang: “Nama kai lui ngai manga malung na makhang u ka ti na ma mo manga na tak na mansi u ka ti.”

²⁰Hanuk Isai han angam sabaka ei ril, “Na rok lui ngaiin ana man u zei; Ka kom na rakel lui ngai ha ka man mu”

²¹Tenchu Israel ngai ruia ei ti, “He tel lui le makhal antak mi ngai ranga sun sot ka ban kei phar ha,” ei ti.