Read Ranglong ROM 11 Bible Online

ROM 11 - Ranglong bible

ROM 11

¹Hanle Pathianin ami ngai hi ei henga ei pei mo? Hava chu khai ro! Koi um Israel, Abraham achi Benjamin ate zia khat ka ni.

²Pathianin ami mana ei riat ngai ha hava ha tuara pei mak, re u mak che mo. Eliza rachina lekhabun imo ei ti aman Isarel mi ngai ruia Pathian kom hintin hin ei mathem.

³“Puma, amanin na deari ngai athat u zei, haia na dali ngai amalet zit u zei; ka thei dak ke anniang ka ni zei hatuka amanin ka nuk um alak rang aval u.”

⁴Tenchu “Pathian rolin ama ranga imo ei ti? Baal a makunga a mankhuk la bil ngai lui asang sari mi ka ranga anniang ka la hoi.”

⁵Hantin den atun him lungkhama anthang anga anniang senkhat ala om.

⁶Hava ha lungkhama aniten, hava han sina ni lai mak hanoten lungkham ha lungkhama ni lai mak.

⁷Hanle imo? Isarelin eia rok ha, hava ha man mak. Tenchu anthang ngai han hava ha aman u. Atei dora chu pop u lai mak.

⁸Hintin hin anziak a om, “Pathianin hangai ha anvuang ratha apeka muna salui mit le riatna salui kuar apeka avian tenpei.”

⁹Hanuk David han ei ti: “A dokang u amani ranga chang le khomak ang ni rase; anbana le athuanna chang rase!

¹⁰Amit cho u rase ei mu u nokna rang nangin a mating u ankula re chian ro.”

¹¹Hano ka ti, amani ha ei chul u na ranga anba u mo? Hava chu khai ro! Hanekten amani ei chul u na Jentail ngai kom sandamna ei hong tung. Hanke a malung u ei kang rang.

¹²Hanle ei chul u na ramual ei neina, ei hek u le Jentail ngai ei nei na aniten ei kip u na na vang chu itukmo ei la tam rang!

¹³Tenchu o Jentail ngai: kei na ti ni u zei, Jentail ngai ranga kuitir atia ka tha theia haso keia domna ha kei anpak.

¹⁴Hontin tak mo ka nam ngai malung ankhanga amani bila mi ituk lek mo sandam ka man chang thei mo.

¹⁵Amani ei khaia ramual anngaina aniten hangai ei poma a thi ngai bil ata damna man ni mo atei?

¹⁶Hatuka a rapa anthiang ten apumpui anthiang a razung anthiang ten a bak doram anthiang.

¹⁷Hatuka abak khiak loka na peia hava han nang oliv thing arathol na ni nam na va zom ten ha oliv thinga nei anchel.

¹⁸Tenchu ha abak ngai ranga borai tho no ro borai na tho nam abul a chom ha ni mak che, abul ke ana chom.

¹⁹Hava hantin na ti, “Koi ei na zomna ranga abak ei khiak lok.”

²⁰Adik ei iam u nok sika hangai ha ei khiak hatuka nei iam sika nang nei andinga nei om.

²¹Ansangpa ngai rui mandon no ro. Hanekten achi ro, asik chu Pathianin ha abak tatak ngai ngal lungkham a mu nokten hava han nang um lungkham na mu no ni.

²²Hantin han Pathian a phung ei thum le ei anchang mandon ro, achul ngai rang ha amani chunga anchang; hanuk nang na ranga Pathian phung thum, ha phung thum ha nangin surtit ro, hano nang um ankhaiin na ti.

²³Hanuk hangai ha ei iam u nokna na han a om u nokten, hangai um a zom thei asik chu Pathianin hangai ha azom ret thei.

²⁴Asik chu anzom thei lui, nang oliv rathol kung lua mana ei na tuka oliv kung asa lehan kolom antho anga ana manzom theiten, Pathianin abak tatak ngai vang chu alaka oliv kung tataka ana manzom tik chu itukmo ei ni thei rang ani na.

²⁵Asik chu unai ngai naning u na ahian anlo u no ro hasik han nangnin hia chong maruk nei riat u nok rang zot makung. Itukmo chu Israel ngai senkhat antak u zei. Jentail ngai akipa alut maseng man kar pei.

²⁶Hantin han Isarel dora ei zok rang. Hintin hin anziak a om: “Zion ata Sandampu hong intia aman Jakob ata Pathian ti lui ngai khai inti.

²⁷Hatuka hiva hi amani ranga ka chongtin, Ei siatna u ngai dora ka lak tik le.”

²⁸Hangai ha thang ahui sika nangni ranga anan mumak tenchu anthang ngai sik akhuk u ngai ranga andit rua.

²⁹Asik chu Pathian lungkham pek dora ama kuina a malung makhir ngai mak.

³⁰Hantin han nangnin mana Pathian he nei tel u nok, tenchu atun amanin ei tel u nok sika lungkham nei chang u.

³¹Hantin han, amanin atun ei tel u nok; nangnin lungkham nei man u na na, amanin lungkham ei man u na rang.

³²Asik chu Pathianin lungkham ei mu zit theina ranga mi dora he tel luina na ei khum.

³³Pathian hianna le riatna ei don anthuk ba! Arui rilna ariat thei rua le a lampui azek thei rua ni mak ba!

³⁴Asik chu: “Puma malung tumo a riat? Ama a zekpuia tumo a chang?

³⁵Athuan ret rang ngal akom tumo a pek man sa.”

³⁶Ama ata ama le ama ranga alompeia ei om. Ama koma han umor taituana anlian na om rase. Amen.