Read Ranglong ROM 12 Bible Online

ROM 12 - Ranglong bible

ROM 12

¹O unai ngai, Pathian lungkhamna ngai le keina mathem ani u zei anbolna dam le anthianga phamruana, naninga na pum dalina andar u ro hava ha nangni ranga biakna dik.

²Atun taka omdan anga om u no tan Pathian zot dan le phamrua le asa tin nei riat thei u na rang na malung u athara oma man tei u ro.

³Pathian pek lungkhamna sika hin na bil u na tuten imo nei ni zotor ha, ha neka aliana anmu u no ro. Tenchu Pathianin iamna ei pek zotor hava anga aman adik pika andon ranga kei na ti chip u.

⁴Asik chu koini na Puma angkhat ha abaksem atam, tenchu abaksem dora asin tho munkhat ni mak.

⁵Hantin han koini hi Kristana pumkhat koini le koini na pum na her.

⁶Hatuka koinin lungkham nei man hi hava anga koinin na bor man khikhit a om, hava bor ha de chong aniten hong u ro nei iam anga de chong ril u rei.

⁷Hasondom rang aniten, ha hasona han ngim u rei.

⁸Hanuk minchu niten, minchuna le chong arila om rase, apek aniten anzika pe rase; ankokpu nin um rakok rase, lungkham amun malung taka mu rase.

⁹Andit ha mairongtei noka ni rase. Asa nok ha matir tatak ro, asa tak ha pom tit ro.

¹⁰Nangni le nangni andita lungkham anmu u ro nangni le nangni lalchi antho u ro.

¹¹Taksat u tan, duai u no ro. Rathana lum u ro, Puma suak sintho u ro.

¹²Sabeina na na rai mansan u ro, antak diar u ro, borzonga ngim u ro.

¹³Mi anthiang ngai ei ansam ei bui u na ansem pui u ro, khual amal man zom u ro.

¹⁴Anan rahok ngai chu borsang pe u ro, bor pe u ro khomak sam u no ro.

¹⁵A rai asan ngai na rai mansan pui u ro, achap ngai chap pui u ro.

¹⁶Nangnin malung munkhat choi u ro. Ansangpa ngai man don u no ro; tenchu annuai ngai bila anrual pui u ro, ahian anlo u no ro.

¹⁷Asiat phuba na asiat tho u no ro. Mi dora mit muna asatak ha andona hava ha tho u ro.

¹⁸Na thei u ten nei mator dorpei chu mi le anngoina tho u ro.

¹⁹O keia dit ngai nangnin naninga phuba la u no ro. Hanekten Pathian taksitna ranga mun ha ma u ro. Asik chu anziak a om, “Phuba lak hi koi ka sin koi amara pe ka ti hiva hi Puman ati.”

²⁰Hanekten, “Anan mumak ngai ancham ten man ne u ro. Anral ten man buang u ro asik chu hava ha na tho ten a luna moi raek anling siak na ti.”

²¹Asian na matorni tenchu asa lehan asiat ha man dok ro.