Read Ranglong ROM 13 Bible Online

ROM 13 - Ranglong bible

ROM 13

¹Nuk a nei tinin ulian aman ngai thuaia leng rase. Asik chu Pathian phun ani nokten ulian chang mak.Hanuk uliana a om ngai dora Pathian phun.

²Hasik han ulian adui tak chu ama ha Pathian phun adui amani aning chung u na ruirilna aman u.

³Asik chu ruirilpu ngai hi om asa tho ngai ranga anchi om mak tenchu om asa tholui ngai ranga anchi rua. Hatuka rui aril ngai kom anchi buia om rang na zot mo? Om asa tho ro, na tho ten ama kom anpakna man na ti.

⁴Asik chu om asa ranga ama ha na rathula Pathian hasondom.Tenchu om asiat na tho ten achi ro asik chu a koronga khendai sur mak, asik chu aman Pathian hasondom om asiat atho tak chu taksit mangna ranga phuba luakpu keng.

⁵Hantin han takasin chia ni mak tenchu sia le sa riatna lam anuaia alut anang.

⁶Hasik han reng phil man um nei pek u. Asik chu amani ha Pathian dorbo andom hava sina ei anbetok.

⁷Ei man rang ha hava ha pe ro, phil man apek ei nang pe ro; a choi anang ten choi ro, anchi nangpu achi ro alal rua lal ro.

⁸Tute ta antang u no ro, nangni le nangni andit rang antang u ro asik chu mi tei andit chu ama ha dan ankhipa azi keng.

⁹Asik chu, “Uire no ro; mi that no ro; anru no ro; ningol no ro” hanuk chongpek atei ngai dora hi, “Nang nei andit anga na in kol mi adit ro” ti hin chongpek dora ei kipna ke.

¹⁰Andit, a in kol mi ansiat na tho mak hasik han adit hike dan ankhipa amang.

¹¹Hatuka hintin tho ro, asik chu nangnin hiva hun hi na riat u, atun hin a in ata ameng hun ani zei. Asik chu na iam laia neka atun sandam koinin nei dep.

¹²Zan ahek rang ani zei, khua ahonga var rang ani zei; hasik han hong u ro azing sin ngai amaka avara anduina raliang le anvo u rei.

¹³Hong u ro suna om anga asadima om u rei. Zu nek anbuai le zu anrina om luia, ahur le angala om luia, ansual le khamaret thona om luia adika leng u rei.

¹⁴Tenchu nangnin Puma Isua Krista ha rasil u ro nei zot ansukna ranga na taksa ranga mandon u no ro.