Read Ranglong ROM 14 Bible Online

ROM 14 - Ranglong bible

ROM 14

¹Iama tom ha pom u ro tenchu ankhalna rui anrila ni mak.

²Mi khatin iamna adona alompeia a sak thei, tenchu iama tom han anna a sak thei.

³Sak nek ei sak tak ha, hava ngai ha dem u no ro. Hava ei sak nok tak ha, hava a sak ha hava mi ruiaril no rase ei sak ha Pathianin ei pom keng.

⁴Tumo na ni mi suak rui nei ril? A pumapa kom adik hano dik lui anding inti, asik chu Puman a manding thei.

⁵Mi khatin mi khat hi nikhua tei neka aman lu, mi tei khatin nikhua dora hi anrual zita a mandona mitin aninga a malung anre sadim rase.

⁶Nikhua ei mang ha Puma ranga ei mang; ei sak tak ham Puma sika ei sak asik chu Puma kom raisanna ei ril hanuk a sak nok han Puma sika ei sak nok asik chu Puma ei manpak.

⁷Tute aranga adam om mak mena, aranga a thim om mak me.

⁸Na dam ten Puma ranga nei dam, na thi nam Puma ranga nei thi hasik han na damam na thinam Puma ke.

⁹Asik chu hava ranga Krista ei thia ei dam ama ha athi le adam aninina a Puma ei ni na rang.

¹⁰Na parual arui ichangmo nei ril hanuk ichangmo na parual nei mumak koinin naloma Pathian ruiril makunga nei lan ding rang keng do.

¹¹Asik chu lekhabu anthianga anziak a om: “Asik chu Puman ei ti kei damna le ka khomak ansam. Ka kom mankhuk tin anbil inti hanuk malei tin Pathian anpaka anpuang inti,” ati na.

¹²Hasik han na loma Pathian kom na theia na rui nei lan ril chip rang a la ni.

¹³Hasik han, hong u ro koini le koini siat anril u lai no rei hanekten na unai ngai ei lua le ei anba nokna rang tho u rei.

¹⁴Ka riat hanuk Puma Isuana ka riat sadim, anthiang nok ngal om mak, ama ranga anthiang luia a riat ten anthiang nok ani zei.

¹⁵Na unai ha nek sak sika a malung na manna ten, lungkhamna tiang ase ni lai mak che. Hava sika Krista ei thi nang nei sak neinun le ama ha masiat no ro!

¹⁶Hantin han na rang asa han antir rua ni no rase.

¹⁷Asik chu Pathian Ram hi nek le sak ni mak. Tenchu dikna, anngoi le raisanna hava ha Ratha Anthiang pek ke.

¹⁸Asik chu hia ruia Krista suak achang tak chu Pathian madit le miring kom um lalchi thoruana atung ke.

¹⁹Hantin han hongamo anngoina le hong le mo mi le mi anthil theina, hava ngai dora zi u rei.

²⁰Sak sika Pathian sintho masiata pei u no ro. Neinun dora anthiang chu ei ni, tenchu ha mi ei sak tak han antak puia alua ten ama ranga hava ha asiat.

²¹Me sak mo, gerep zu buang mo angkhat peia, na parual a luana anba puia a ranak a chuaina aniten, hantin han a tho nok asa.

²²Nang nei iam ha, hava ha nang na kom Pathian makunga siak ro. Ama aninga adik atia anpoma asia anlo lui miring chu achan asa keng.

²³Tenchu songankhar a don tak han, asak ten ama ha a siat anlo zei. Asik chu ei sak ha ei iama ni lai mak, hatuka ei iam nok taka ha chu hava ha asia.