Read Ranglong ROM 4 Bible Online

ROM 4 - Ranglong bible

ROM 4

¹Hanle imo ti ma ni? Taksana na pa mansa Abraham ha imo ei man?

²Asik chu Abraham ha asin thona dikna na antel ten dorsai rua adon, tenchu Pathian kom chu a bui.

³Asik chu Pathian lekhabun ei ti: “Abraham Pathiana ei iam hanke hava ha ama ranga adik ati na ei antel.”

⁴Sin atho takin alo man ha, ama ranga lungkham sika ni mak, ei man ranga antel ngal keng.

⁵Tenchu sin tho luia ama chunga a iam tak ha anmokna bui ngai dika atelpu han ama iama han dik atia ei antel.

⁶Hantin han David ham ha mi ha chanasa na ei ril Pathian sin noka dikna na ei tel ha:

⁷Hintin hin: “Amani ei dik u noka ata andual sua ngai ei siat u na ankhua om ngai chu achanasa u keng,

⁸Ha mi chanasa ke Puman a chunga asia tel pe mak.”

⁹Asa, hia chanasa chong hi vun at mi chunga rong mo ole vun at lui chungam mo ei ni? Asik chu koinin nei ti, “Abraham aranga ei iamna le dikna atia ei antel.”

¹⁰Hova oma mo ei antel? Vun at a mo vun at luia mo? Vun at a nimak, tenchu vun at luia ke.

¹¹Hatuka vun at andangna ei man ha, hiva hi ha iamna na dikna a morzem ei ni, ei iam ha vun at luia om han ei ni; a derdin hiva hi, vun at luia oma a iam ngai han ama ha amani alom u na a pa ei ni rang amani ranga ha dikna na ei antelna rang.

¹²Hanuk vun at ngai um a pa u ei ni rang hanuk vun at ngai ronga nimak tenchu vun at luia om ngai koini na pa Abraham ei iam ha ama ke nuk azi ngai amanim ama ha a pa u.

¹³Asik chu Dan le nimak tenchu iamna ei dikna le Abraham a khuka ramual alua ranga khomak ei ansam.

¹⁴Asik chu Dan azi ngai ha amani ha aluapu aniten iam ha omze buia nei sin hanuk ha khomak ha akoronga nei sin ani zei.

¹⁵Dan hin taksit asina tenchu Dan ei buina taka hava han Dan a khel um om mak.

¹⁶Havasik han hava ha iamna le ei ni lungkhamna anga ei ni, ei val hi hiva hi, ha chongtin ha akhuk dora ranga, Dan azi ngai rang rong nimak tenchu Abrahama anga iama achi ngai kom adet ranga ama ha koini na loma na pa.

¹⁷Hintin hin anziak a om, “Nang hi nam atampa pa na ka na sin.” Ha Pathian makunga han pa, ama iam tak ha aman athi ngai hanuk ei pek hanuk abui ha a om ei ti.

¹⁸Abraham ei sabei rua abuiam ei sabeia ei iam, hantin han na khuk ni inti hava chong anga, “Nam atampa pa ei ni.”

¹⁹Hatuka iamna na ei chuai noka akum raza dam ani nam, athi ranga taksa le Sari nai kok athi ti ariatam.

²⁰Hanum Pathian chongtin ha ei thira iam luia ei om noka iam adeta ei oma Pathian ei manpak.

²¹Hatuka ei riat sadim, Pathian a chongtin ha hava ha tak ei manchang nget rang.

²²Hatuka hia hi asik, “ama ranga hava ha dikna atia ei antel.”

²³Ama ranga antel hava ha ama rang ronga anziak ni mak Tenchu koini na rangam keng.

²⁴Koini na rangam hava ha antel inti asik chu koini na Puma Isua ha athi ngai bil ata anthui ha koinin ama chunga nei iam.

²⁵Ha Isua ha koini nei siat sika ei ansur dika nei antelna ranga anthui ret.