Read Ranglong ROM 6 Bible Online

ROM 6 - Ranglong bible

ROM 6

¹Hanle imo ti mani? Lungkham ei tamna rang hava rang han asia mo nei om rang?

²Hava chu khai ro! Koini hi asia sika nei thi ni zei hontinmo asiana nei om ret rang mo?

³Hanle nangnin re u mak che mo? Koinin Krista Isua sika baptisma alak dora chu na loma ama thina sika baptisma nei chang ni mak mo?

⁴Hantin han ama thina sika baptisma lehan ama bila thanam nei anphum Krista han, Pa liana le athi ngai bil ata ei anthuiret hantin han koinin damna thara nei leng.

⁵Asik chu koinin ama thina bila munkhat nei ni ani taka niten ei anthuiretna bilam ni inti.

⁶Koinin hiva hi nei riat, na mi marua ama bila krosa antar zei asia taksa ranak abui ei ni na rang. Koinin asia suaka nei om lai nok na rang.

⁷Asik chu athi sua chu ama ha asia ata adika antel ani zei.

⁸Hatuka koinin Krista bila nei thi anitak anten hava han na iam ama bila dam nam man inti.

⁹Asik chu na riat athi ngai bil ata ei anthui atia Krista thi thak lai mak ama chunga thinan chong nei thei lai mak.

¹⁰Hava ama ei thi ha hava lehan asia sika voikhat ei thi hanuk ama ei dam ha hava lehan aman Pathian sika ei dama ei om.

¹¹Hava anga nangnim asia sika naninga asia sika nei thi u ni tenchu Krista Isua na Pathian sika a dama antel u ro.

¹²Hantin han asian nangni na phil taksa u na reng chang no rase, achang ten nangnin ama ei zot ngai tela om un na ti.

¹³Hatuka na taksa u ngai dik luina na asia kom pe u no ro, tenchu naning u na a thi ata adam anriata Pathian kom anpe u ro, hatuka naning u na na taksa u ngai dikna na Pathian kom pe u ro.

¹⁴Asik chu asian na chung u na ruiril u no ni; Dan thuaia a om nei ni u nok sika tenchu lungkham thuaia a ke nei ni u.

¹⁵Hanle imo anlang dan thuaia ni mak me, lungkham thuaia ke na ni hasik han asia mo nei tho rang? Hava chu khai ro!

¹⁶Re u mak che mo ha, chong atela akoma suak anga nei anpek u. A chong nei tel pe tak ha asuak nei ni u. Hano thina asia suak ani nok ten dikna ranga hetel suak ke.

¹⁷Tenchu Pathian ha anpak rase nangni hi asia suak ha chu nei ni u. Atun anchuna a lak rua anpek malung tak le, ha om lak rua nei lei tel u.

¹⁸Hanuk asia ata nei zok u na dikna suak nei ni u.

¹⁹Nangni na taksa u ranak ei bui sika miring anga kei ril ani zei, asik chu nangnin machin dik lui ranga na taksa u ngai annima le dik lui kom suak anga nei anpek u, hava anga atun anthiang ranga na pum u ngai dikna koma suak anga anpe u ro.

²⁰Asik chu asia suak na ni u lai han, hava han dikna sika han chu azok nei ni u.

²¹Hanle atun hava ngai dorana nan zak u ten hava lai han, hava ngai dora ha nangni imo nei ni u rang? Hava ngai dora mara chu thina ke do.

²²Tenchu atun asia ata azok nei ni u na hatuka Pathian suak nei ni u na anthiang ranga mara nei man u, hatuka hava amara chu ringanlona ke.

²³Asik chu asia ei lo chu thina, tenchu Pathian lungkham pek koini na Puma Isua Krista na ringanlonna.