Read Ranglong ROM 7 Bible Online

ROM 7 - Ranglong bible

ROM 7

¹Hanle o unai ngai, re u mak che mo asik chu dan ariat ngai ha, hangai ha kei ril ani zei miring adam kar tenpei danin achunga rui ei ril.

²Asik chu a ruathar adam kar pei a nungak ha danin a ruathar kom ankhit tenchu a ruathar athi le ha a ruathar dan ata ei zok.

³Hasik han a ruathar a dam kara pasal atei le anom u ten uiare tina anril inti, tenchu a ruathar athi suale ama ha, ha dan ata azok, a ruathar atei le aom u nam uiare ni no ni.

⁴Hantin han o unai ngai, Krista taksa lehan Dan ruia nei thi u, nangni hi atei ta nei ni u na ranga ha athi ata anthui ama ta ni u ro. Koinin Pathian rang nei anrana rang.

⁵Asik chu koinin taksana na om lai han hava han Dan sika asia zota thina dora rang anra ranga koini na taksana sin ei tho.

⁶Tenchu atun chu koini hi Dan ata na zok zei asik chu nei ankhit ha ama sika nei thi ni zei lekhana anziak marua ang ni luia tenchu Ratha thara suak sin nei tho.

⁷Hanle imo ti mani Dan hi asia mo? Hava chu khai ro! Hanekten asia hi imo hava ha kei riat nok Dan rong leke kei riat asik chu, “Ningol no ro.” Hiva chong hi Danin aril nokten ningol hi imo hava ha re no ning.

⁸Tenchu asian chang amana ha chongpek le ka malunga ningolna dora aman lut asik chu Dan nokten asia ha athi.

⁹Hatuka voi khat chu dan nokam kei dam tenchu chongpek a hong le asia ei dama ei anthui,

¹⁰hatuka ka thi, hanuk damna ranga chongpek ha, hava han kei thina rang atia ke anlang.

¹¹Hanke asian chang amana chongpek lehan ana huang hava lehan ana that.

¹²Dan chu anthiang chongpek um anthiang, anzik, asa.

¹³Hanle asa tak ha mo kei thina ei ni? Hava ha chu khai ro! Hanekten asian hantin han neinun asa le kei thina ei changa han hava ha asia ti ei anlang. Hanke chongpek le asia ha achalaka asiat ei ni na rang.

¹⁴Asik chu koinin na riat Dan hi ratha, tenchu koi hi taksa asia thuaia anzuar.

¹⁵Asik chu kei tho tak ha hava ha re making. Asik chu kei zot tak ha, hava ha kei tho ni mak hanekten kei matir hake kei tho.

¹⁶Tenchu kei zot nok tak ha, hava ha ka tho tik le; havan ke Dan ei sa ha, hava ha kei pom.

¹⁷Hantin han ei nia ha sin ha kei tho lai nok, ka koma a om asia han hava ha ei tho.

¹⁸Hantin han kei riat ka kom ka taksana asa ite leng mak, kei zot chu apuang tenchu sin asa tho ranga puang mak.

¹⁹Asik chu kei zot ha sin asa ha tho makung, tenchu ha a siat kei zot nok ha sin ha, hava ha kei tho.

²⁰Hanuk kei zot nok tak ha, hava ha ka tho ten koi kei tho ni lai mak, tenchu ka koma a ompu asia hava han ei tho.

²¹Hantin han ha dan kei mu ni zei sin asa ka tho zotam asiat ka kom ahonga suak.

²²Ka malung ril taka miring anga Pathian dan chunga ka rai a san.

²³Tenchu ka taksana dan atei angkhat anlang. Hava ha ka malung dan aleta ei anduipui, asia dana ka kom a om han aman asuak ankhit ei na manchang.

²⁴Koi vanbui miring hi! Thina taksa ata tumo anan zok rang?

²⁵Koini na Puma Isua Krista na Pathian kom raisanna ka ril! Koi ka ninga malung le Pathian dan suak ka ni. Tenchu taksana asia dan suak ka ni.