Read Ranglong ROM 8 Bible Online

ROM 8 - Ranglong bible

ROM 8

¹Hantin han atun chu Krista Isuana a om tak chu amani chunga asia anlona ite reng om lai no ni.

²Asik chu Krista Isuana damna Ratha dana koi hi asia le thina dan ata ei na mazok.

³Asik chu Dan hi taksa sika rat noka ei thothei nok ha Pathinin hava ha ei tho, a Naipasal nget ha asia taksa anput anga hatuka asian anbolna ranga ei hong tira taksana asia man ei hong choi.

⁴Koinin taksana nok ngai ha Rathana kal nei choi Dan adik riti ha koinia ei len.

⁵Asik chu taksana a om ngai ha; amani ha taksa rui a mandon u tenchu Rathana om ngai ha, amani ha Ratha rui a mandon u.

⁶Asik chu taksa rui chu thina tenchu Ratha rui chu damna le phukdaina.

⁷Asik chu taksa rui chu Pathian mumak, asik chu hava ha Pathian dan thuaia om mak, nim ngai mak.

⁸Hatuka taksa thuaia a om ngai ha amani ha Pathian rai mansan thei mak.

⁹Tenchu nangni chu taksa thuaia ni u mak che, Ratha thuaia om ke na ni u. Ataka Pathian Ratha nangnia ei leng, tenchu Krista Ratha don lui tak chu ama ha Krista ta ni mak.

¹⁰Hatuka Krista nangni na kom a om ten. Ruak hi asia sika athi ke, tenchu Ratha dikna sika damna ei ni.

¹¹Hatuka athi ngai bil ata Isua anthui ha ama Ratha nangni na aleng ten; hanle athi ngai ata Krista Isua anthui han aman na sung u na aleng a Ratha lehan na phil taksa um man dam inti.

¹²Hano unai ngai, koini hi nan tang. Tenchu taksa kom ni mak taksana nei damna ranga.

¹³Asik chu taksana nei damna aniten thi nget un na ti. Tenchu Rathana taksa sintho ngai dora that u ro, dam un na ti.

¹⁴Asik chu Pathian Rathana leng ngai dora chu amani ha Pathian nai ani u na.

¹⁵Hantin han suak Ratha man u mak che, nei achi ret u na ranga. Tenchu nai nina Ratha ke nei man u. Ha Rathana koinin, “Abba! ka Pa!” atia nei pai.

¹⁶Rathan aninga koini ratha le ei na manthei. Koini hi Pathian nai nei ni.

¹⁷Hatuka nai na ni tak anten dongaluak, Pathian dongaluak rang le Krista dongluakpui ataka koini hi ama bila antak na tiar ten ama bila ansang um inti.

¹⁸Asik chu kei masat chu hiva hi, koini ranga anlianna a hong anlang rang le chu atuna antak nei tiar hi ite ni mak.

¹⁹Asik chu Pathian nai ngai ei anlang rang ha ansin ngai doran ei sabeia ei ngak.

²⁰Ansin ngai dora ha zot lui chu chung anoma om ei zota ni mak, anompu ranga keng.

²¹Ha sabeina ha ansin ngaiin um siatna suak ata zoka Pathian nai ngai anliana zokna man inti.

²²Asik chu koinin nei riat ansin ngai dora atun ten ana ariat u na lokona ei ankhek chian u.

²³Harong ha ni mak koini Ratha maruaia om ngai hi koinim naninga nei nina na na taksa chipa, zokna ngak chipa na malunga nei ankhek.

²⁴Asik chu sabeina na ke koinin sandamna nei man. Tenchu nei mu na nei sabei hi chu sabei ni mak asik chu ei mu tak ha chu ichangmo ei sabei rang.

²⁵Tenchu koinin nei mu nok ha na sabei tak anten hano adiar chunga hava ha ngak inti.

²⁶Hantin han Ratha nin um koini nei rat noka ana san. Hantin han adik pika mo bor nei zong rang hava ha remak me tenchu Rathan atheia chongkului he le koini rathula ei mathem.

²⁷Hatuka malung dora anvan han aman ariat Ratha hi imo? Asik chu aman anthiang ngai rathula Pathian zot anga a mathem.

²⁸Hanuk koinin na riat Pathian andit ngai ha ama ei mansuk anga ankui ngai, hangai rathula aloma ei satna rang munkhata sin ei tho u.

²⁹Asik chu aman mana ei riat ngai amani ha a Naipasal ang taka ani ranga mana ei lei phun. A Naipasal ha a sung suak u na ulian khit ani rang.

³⁰Hatuka aman ei lei phun ngai ha amani ha ei kui, ha ei kui ngai ha adik ei manchang ha adik ei manchang ngai ha, hangai ha ansang um ei mansang.

³¹Hava ngai dora han imo ti ma ni? Pathian na tiang a om ten tumo ana dui thei rang?

³²A Naipasal ngal manar luia loko ranga ana pek han aman hava bila aloma lungkhamna na pe no ni mo?

³³Pathian ei phun ngai aleta tumo adui rang? Adik anchang rang ha Pathian ke tumo ansiat rang?

³⁴Krista, Isua, ha athina anthuireta, ama ha Pathian changtiang a om, athara koini rathula a zong ret.

³⁵Krista ditna ata tumo ana sen thei rang? Antakin mo, lunghangin mo, anrahoka nan mo, anchamin mo, saikorongin mo, anchi nan mo, khendaiin mo?

³⁶Hintin hin anziak a om, “Nang na rang koinin sun sot nei thi; Koini anthat rang bera anga nei antel.”

³⁷Tenchu koini anan dit han ama lehan hiva rui dora na han anlian sabaka a ngam nei ni.

³⁸Asik chu ka riat sadim thinan mo, damnan mo, vanpalai ngaiin mo, anlalnan mo, a omsan mo, ala om rangin mo, sinthotheinan mo.

³⁹Mun ansangin mo, mun anthukin mo atei neinun ansin ngaiin mo, iten koini Puma Krista Isuana om Pathian anditna ata na sen thei no ni.