Read Ranglong ROM 9 Bible Online

ROM 9 - Ranglong bible

ROM 9

¹Juda ngai Isua Krista tel u mak. Israel ei chul Pathian siat mak Kristana ataka kei ril milak tho making. Ratha Anthiang zara han sia le sa riatna le ana manriat pui.

²Ka malunga antak sabak lunghang ana chian.

³Asik chu ka unai ngai taksa lama ka chipui ngai rang hin Krista ata kei tei tenpei khomak tung ngal ila ka ti thei.

⁴Asik chu amani hi Israel ei ni u. Nai ni na anlianna dikna dan dora dan pek Pathian hasondom chongtin dora ata ani u na.

⁵Khuk ngai ha amani, hanuk taksa ruia amani ata ahonga Krista anpiang. Ama ha alompei chunga Pathian ei ni. Amen.

⁶Tenchu Pathian chong ha a korong ei chang ni mak. Asik chu Israel ata anpiang dora hi Israel kiar ni mak.

⁷Hanuk Abraham a chi tia amani ha aloma anai havam ni mak, tenchu “Isak ha na chi antin ti.”

⁸A omzia hintin hin taksa nai ngai ha amani ha Pathian nai hantin han ni u mak tenchu chongtina nai ngai hake achia ei antel.

⁹“Asik chu atuna hun taka hong ka ti hava han sarin naipasal nei inti,” Hiva hi chongtina chong.

¹⁰Hava rong ni mak, tenchu hanuk Rebika ham nisela mi khat koini na chipui Isak lehan nai anphir avonga.

¹¹An rai sua le nai ngai anzir man, asiat asa ite la tho u mak hava han ei a thang rang ansuk ei dikna rang, sintho sika ni mak tenchu a paipu ei zot sika keng.

¹²A kom han, “Ulian ha naipang asuak la ni inti.”

¹³Anziak a om, “Jakob ka dit tenchu Esau chu ka mumak.”

¹⁴Hanle imo ti ma ni Pathian hi dik lui mo? Hava chu khai ro!

¹⁵Asik chu aman Mosi kom han ei ti: “Ka lungkham mu tak hake lungkham kei mu rang, ka lung manpong tak hake lung kei manpong rang.”

¹⁶Hantin han azotpu sika ni mak, aputpu sikam nimak, lungkhampu Pathian sika keng.

¹⁷Asik chu Pathian lekhabuna Pharo rang ha ei ti, “Nang hi kei na mathok. Nanga ka sinthotheina kei man langa phil chung dorana hanke ka raming ei anpak rang.”

¹⁸Hasik han aman ei zot tak lungkham ei mu hanuk ei zot tak ha ei mankhir.

¹⁹Hiva hin na tin na ti, “Hanle aman ichangmo asiana ei na sur ret? Ama ei zot tumo adui rang?”

²⁰“O miring nang hi tumo na ni hi, Pathian nei ankhal pui? Ansin neinun han asinpu rang ha ichangmo hintin nei na buak ti thei ni mo?”

²¹Hanle bephil khata angkhat alu, angkhat a nem abuakpu han abuakna rang thei ngai mak mo?

²²Hava han imo! Pathianin a taksitna anlanga le a sinthotheina anriat a zota ei masiat rua a taksit bel ngai chunga phuksota adiarin imo ei siatna.

²³Ha lungkham bel ngai chunga ei lianna nei anriat rang ha, man ata anlian ranga ei sin ngai ha.

²⁴Hanuk ei pai ngai ha Juda ngai rong ata ni mak Jentail ngai bilam koini hi ei na man ni.

²⁵Hintin hin Hosea lekhabuna ei ti: “Ka mi ni lui ngai ha amani ha ‘Ka mi’ ti ka ti. Hanuk keia dit ni lui ngai ha ‘Keia dit’ ti ka ti.

²⁶Hatuka, ‘Nangni hi ka mi ni u mak che ei antina muna hava muna’ hangai ha Pathian a dam sapa anti inti.”

²⁷Hanuk Israel ngai ruia Isai han anring sabaka hiva chong ei ril: “Israel nai ngai tipui bali dor pei atam u nam, anniang hake sandam aman rang.

²⁸Puman phila chong hong makhip inti hava ha akipa le anlapa tho inti.”

²⁹Isaiin mana ei ril anga, “Sipai ngai Puma han achi rang ngal na ma no sela, koini hi Sodom le nei anruala Gomora ang nei ni rang.”

³⁰Hanle koinin imo ti mani; Jentail ngai dikna zi lui ngaiin dikna apha u zei, iamna sika dikna chu.

³¹Tenchu Israelin dikna dan azinam ha dan ten huam u mak.

³²Isikmo? Iamna sika ni mak tenchu sina ei zi u sika. Hatuka hava “anbana lung” chunga han ei anba u ani na.

³³Lekhabuna anziak a om: “Amanin Ziona han anbana lung le alua lungpui ka siak ama a iam tak chu mualphui ansak no ni.”