Read Ranglong 1 KORINTH 1 Bible Online

1 KORINTH 1 - Ranglong bible

1 KORINTH 1

¹Paul, Pathian ei zotna le Krista Isuan ei tir ranga ankui hanuk koini na parual Sosthini kom ata

²Korinth a Pathian kuibing ngai ranga, Krista Isuan Pathian mi anthiang ngai rang le ankui mi anthiang ngai dora rang hanuk koini na Puma Isua Krista raming apai muntina a om ngai dora ranga; amani le koini na Pathian.

³Koini na Pa Pathian hanuk Puma Isua Krista ata lungkhamna le phukdaina na chung u na tung rase.

⁴Pathian a lungkhamna Krista Isuana peka nei om u sika ka Pathian koma huntina raisanna ka mantung.

⁵Asik chu Kristana han nangni munkhat nei ni u na alompeia, chong tianga hanuk hianna tianga aloma anei sua na ni u zei.

⁶Havantin han Krista ruia chu adet sabaka na chung u na anphun ani zei.

⁷Koini na Puma Isua Krista ei la hong anlang ret rang nei ngak u na borsang khat dak ngal machan luia nei om u ani zeia.

⁸Hatuka ama hanin um ahek tenpeia na mandet tit unti, koini na Puma Isua Krista Nikhua tikam dem na makhai u no ni.

⁹Pathian aiam rua ani, ama zara nangni ngai a Naipasal koini na Puma Isua Krista anloppui ranga ankui na ni u.

¹⁰Ka unai ngai, koini na Puma Isua Krista raminga keina mathem ani u zei, ansen anbaka nei om u nokna ranga chong khata luang u ro. Tenchu mandon khat le derdin khat dak anput chunga munkhat chang kiar u ro.

¹¹Ka unai ngai, asik chu Kloii insungkua mi ngai kom ata nei ansual u na rui anthiang vanga thang ka lei riata.

¹²Hintin hin lam chong na ril u ka ting, na chong u ngai dora atei chipa; angkhatin ati, “Koi chu Paul akuibinga mi ka ni,” atei ngaiin, “Koi chu Apolo kuibing ka ni,” hatuka senkhat in, “Koi Pitor akuibing mi ka ni,” hanuk ret senkhatin, “Koi chu Krista kuibing mi ka ni,” nei ti chip u.

¹³Krista hi kuibing tina anbak poka mo ahonga om? Paul hi nangni ranga Krosa mo avantar? Paul aruaisi ka ni anti ngaiin tu kom mo baptisma nei chang u?

¹⁴Kripas le Gaia rong nok chu tute baptisma kei manchang om mak atina keng Pathian koma ka raisanna kei mantung.

¹⁵Ka ruaisi achang ranga nangni ngai ka koma baptisma nei chang u keng angkhat ngalin ati thei om no ni.

¹⁶Stephan le a insung mi ngai ham baptisma ka la pek. Tenchu atei chu baptisma ka pek atina anriat lai makung.

¹⁷Krista han baptisma apek ranga ei na hong tir ni makung. Thang ahui aril ranga ahong antir ka ni. Hanuk chu miring hianna chong ngai manglui tana Krista Kros chunga ei thina ranak buanruang ei se nget nokna ranga aril ranga antir ka ni.

¹⁸Asik chu Krista Krosa ei thina ruia anpei ngai ranga chu amo om ani. Tenchu koini azok ngai ranga chu ranak ei ratna ani.

¹⁹Pathian lekhabuna ei ti anga, “Mi hian ngai ei hian u na masiat pe u ka tinga, hatuka mi athei ngai ei thei u na buanruang manse pe u ka ting.”

²⁰Hatuka havatena han mihian ngai hontiangmo a om u? Hano mi athei ngai hontiangmo ala om ret u? Hano hi ramual min sual athei ngai le honmo ala om thei? Pathianin hi ramual hianna ngai dora hi ei mo u na ei manlang.

²¹Asik chu Pathian ama ei hianna ha ramual hianna lehan chu lei riat thei lai mak tenchu, hava taka han “amo” thang rilna lehan aiam ngai anzokna ranga Pathian han ei lei zot chian ani.

²²Hava asik khit chu Juda ngaiin ei andangphat na ranga boidong sin amu ha ei zot babang u hatuka Grik ngaiin hianna ei thun u.

²³Ten koinin chu Krosa athi Krista rui keng nei ril, tenchu hava rui tak ha Juda ngai ranga ankalna, hatuka Jentail ngai ranga amo anlona.

²⁴Tenchu Juda mo ani Jentail mo ani Pathianin ei kui sua ngai ranga Krista chu Pathian ranga aranak neina khit le ei hianna ani.

²⁵Asik chu Pathian ei mo khitna tak ha miring ei hianna neka ahian sana anlanga, hanuk chu Pathian ei ruangna tak ngal ha miring ranak neina neka ranak ala nei sa ani.

²⁶Ka unai madit ngai, atun hin Pathianin ei na kui u na mandon u ta; na miring nina anga chu ahian le thotheina ranak adon le sutmun ansang anei alakte keng.

²⁷Tenchu Pathianin mi hian ngai mualphui asak ranga ramuala achuk nok ngai ha ei athang. Hanuk ret chu ranak anai ngai mualphui asak ranga Pathianin ramuala ranak abui ngai ei athang.

²⁸Ama han ramuala annuai ngai, min ei dem ngai le min itena ei tel nok ngai dora han hi ramuala min ei poisaka ei manlian ngai ansiata apei ranga ei athang.

²⁹A omzia chu angkhatte ngalin Pathian matona anphuna ei om nokna ranga.

³⁰Tenchu Pathianin nangni ngai ha havan ata Krista Isua le munkhat achang ranga ei na hong choi u, hatuka Krista chu koini nei hianna ananni pe ranga Pathianin ei na mansuk pe ani. Amana han koini ngai nei dikna, Pathian mi anthiang le nei zokna ei hong chang ani.

³¹Hasik han, Pathian lekhabuna anziak anga, “Borai atho zot lele ten Puma na borai tho rase,” ati.