Read Ranglong 1 KORINTH 12 Bible Online

1 KORINTH 12 - Ranglong bible

1 KORINTH 12

¹Atun hin ka unai ngai, Ratha Anthiang ata ahong borsang ruia nei hong maziak u ruia atak taka ariat ranga keina zot u ani.

²Na riat kiar u hale, machin han a iam nok mi na ni ulai han damna nei lui ramil ngai anmokna lama nei anruai huhuta nei om u.

³Hasik han keina manriat zot u chu, Pathian Ratha han ei maruai ngai chu tuten “Isua khomak tung rase” ati om no ni hatuka Ratha Anthiangin ei ruai ani ret nok anten tuten “Isua chu Puma” ti no ni.

⁴Ratha Anthiangin borsang ei pek hi atei chip keng tenchu ratha chu angkhat bang keng.

⁵Dorbondomna alampui chu atampa keng tenchu Puma dorbo bang hakeng andom.

⁶Hatuka dorbondomna lama thotheina adon atei chip ret keng tenchu Pathian khat ata bang keng mi dora ranga dorbondomna abing chipa ei pek ret.

⁷Tenchu mi dora satna ranga Ratha ei hong anlangna dan ei suakna chu ani.

⁸Asik chu, Ratha den han keng mi khat tak chunga hianna manga chong ril theina ei pek hanuk ret chu hava Ratha den han mi khat ret tak chunga ariat anthianga chong theina ei pek.

⁹Hanuk ret chu, hava Ratha angkhatpu den han keng mi khat chunga Rathana iamna ei pek, hatuka mi khat ret chunga hava Ratha den han andam theina ranak ei pek.

¹⁰Ratha han mi khat chunga chu boidong khapa sinthotheina ranak; atei ret khat koma chu achalaka Pathian chong aleia thia theina, hanuk angkhat ret kom chu Ratha Anthiang ata borsang ahong ani le ani nok alei sut theina; angkhat tak chunga chu chongtina achong theina, hanuk atei khat ret chunga chu chong anril ngai bila ang khakhata a omzia alei sut theina ei pek ani.

¹¹Tenchu hava Ratha ha angkhat Ratha bang ata kiar atho ani. Ratha han ama ei zot ang taka tu koma mo hova borsang mo ei pek zot anga ei pek.

¹²Krista hi apum angkhat ani na abak atampa anga han miring na pumpui hi angkhat ani nam aher atampa le ansin ani.

¹³Havantin anga han, Juda mo ani nam atei mo ani, suak mo ani, ole azok mo ani pumkhat achang ranga Ratha angkhat dak lehan baptisma achang na ni hatuka koini ngai na loma ha Ratha angkhat dak ata abuang kiar na ni zei.

¹⁴Atak taka chu na pumpui hi aher angkhat dak ni mak, atampa keng.

¹⁵Na ke han, “Koi chu kut ni makung hasik han na pumpui bila aher ni makung,” tisela hava tia na pumpui ata aher ni mak atina akhai sa no ni.

¹⁶Na kuarin, “Koi chu mit ni makung hasik han na pumpui bial ata aher ni makung,” tisela hava ham na pumpui ata aher ni mak atina aheng sa no ni.

¹⁷Na pumpui hi na mit ni kiar sela chu hanle na kuar honmo om ni? Na pumpui hi kuar ni zit sela na nar honmo om ni?

¹⁸Tenchu Pathianin atun hin aher dora hi ang khakhata na pumpuia ama ei zot ang taka ei ni rang anga ei siak.

¹⁹Hantin ani nokten aloma aher khat dak nisela chu taksa honmo om ni?

²⁰Tenchu atun hin aher a tampa ani ngalam apum chu angkhat keng.

²¹Hasik han mitin, kut rang, “Na nang makung!” ti thei mak. Lu hanin um ke rang, “Na nang makung,” ei ti thei ni mak.

²²Na ti tenchu na pumpui kara aher aduai khit nei ti tak ha keng ala nang khit ei la ni.

²³Hanuk ret chu, na pumpui bila aher ngai kara alamluana abui nei ti ngai ual ha keng nei mal nei chal ala ni sa, hanuk ret na pumpui bila aher a en bel kai lui ngai ha keng asadima nei la manliang sabak ala ni.

²⁴Tenchu na pum kara aher asa ual nei ti ngai chu havantin han nang pe u mak. Adik taka chu Pathianin hintin hin na pumpui hi ei manding; havantin han aher, rual om phalui ngai ha ei reng.

²⁵Hatuka, havantin han pumpui khata ansenna ngal om pe u mak haneka aher atei chip ani u ngalam angkhat rang, angkhatin ei mandon tei u mak.

²⁶Pumpui khat kara aher khatin ana na ariat le ama bila aher ngai doram ana alei riat kiar u ani hatuka aher khatin anpakna dan asuak ten aher ngai doram arai aleia san u na.

²⁷Nangni ngai na lom u na Krista apum na ni u, hatuka angkhat angkhata hava aher na ni u.

²⁸Hantin han Pathianin kuibing sunga aloma amun chipa ei siak ani. Mansana kuitir ngai, annina na deari ngai, hatuka anthumna na minchu ngai, hava suale boidong sin atho thei ngai, azom thapa andam theina ranak adon ngai, hano mi asan azot ngai, hano mi aruai ngai, hano chong tin amang athei ngai koma ei pek.

²⁹Aloma kuitir zit ni umak, hano deari, hano minchu ngai ni zit u mak. Alom u na boidong sin atho thei kiar ni u mak.

³⁰Hano rikhua andam zit mo ani zit ngai? Hano aloma chongtin amang thei zit mo ole a omzia aril thei kiar mo ani zit ngai?

³¹Hava ang Rathan ei na pek zot thotheina ngai achang ranga na malunga put chip u ro. Hava neka lampui asa khit khat na la man musa u ka ting.