Read Ranglong 1 KORINTH 13 Bible Online

1 KORINTH 13 - Ranglong bible

1 KORINTH 13

¹Miring anga le vanpalai ngai anga chong aril thei ngal nin lang tenchu ditna ka don nokten thir rasa anan ziai ang le soirang rasa ang keng kei ni rang.

²Hanuk chu maton om ruia aril thei ngal nin lang hano chong anthuk ngai dora le ariat le athei khit ngal nin lang hanuk ret chu kei iamna dora le mual athot thei ngal nin lang ditna ka don nokten ka ranga ite ngal ni makung.

³Kei nei dora apek zit thei ngal ni rong hanuk akang ranga ka pumpui ngal phal ronga tenchu ditna ka don nokten ka ranga itena kei anlokna ngal om mak.

⁴Ditnan chu adiar theia, lungpongna aneia; khamaret tho ngai maka, ditnan aninga anpaka om maka, borai tho maka.

⁵Ditna chu bai ankham ngai maka, arang aril nimaka, atak si ngai mak; ditnan asia vong tit ngai maka.

⁶Ditna chu arothol chunga arai san maka, tenchu atak bila arai asan.

⁷Ditna mathan thak ngai mak, hanuk ditnan aloma a iama, aloma renga sabeina aneia, hatuka aloma adiar chunga adoroi zit thei.

⁸Ditna chu taituan tenpeia rang ani; maton ruia aril thei a omam lan pei inti, chongtina achong thei ngal om rase la hek inti; hianna adon ngal om sela la hek kiar inti.

⁹Asik chu, nei riatna ngai le maton ruia nei ril theina ngai dora hi alak te keng.

¹⁰Tenchu ei kipna ahong tik le chu ei ansamna ngai dora la hek zit inti.

¹¹Naipangte ka ni lai chu naipang chong ril anga kei ril, naipang riatna anga kei riat hatuka naipang mandon anga kei mandon chachak. Atun chu rati kei hong tunga han machina naipanga ka om tho ngai ahonga hek zeia.

¹²Atun hin koinin dapona ramil ang nei mu, tenchu havatika chu na mai le na mai lan tong inti. Atuna kei riatna hi chu akong tan te keng; ten hava tika chu Pathian hianna anga koinim anzui diai la ni inti.

¹³Hava sunga atun hin iamna, sabeina le ditna hiva anthum a oma; tenchu hiva bila aliankhit chu ditna ani.