Read Ranglong 1 KORINTH 14 Bible Online

1 KORINTH 14 - Ranglong bible

1 KORINTH 14

¹Hiva ditna hi thun nget u ro. Ratha borsang achang ranga antiam sabak u ro, Pathian thang aril theina hi val khit bak u ro.

²Chongtina Pathian chong aril thei hi miring koma ei ril ni mak ten Pathian koma ei ril ani, asik chu hava ha tuten riat thei u no ni. Aril ngaiin Ratha sinthotheina ranak le maruk chong ei ril ani.

³Tenchu Pathian thang mipui koma apuang ngaiin chu mipui ei mantiat theina ranga hanuk arai ei mansanna le aphuk ei mandaina keng ei chang.

⁴Chongtina achong thei Ratha borsang adon chu aninga ei andomna rang duai keng tenchu Pathian chong apuangna achang ngai chu kuibing tin ei ansonna keng ei ni.

⁵Chongtina chong aril theina achang kiar u ranga keina zot u na chungin Pathian thang apuangna borsang nei chang u rang ka la zot sa. Asik chu chongtina achong theina borsangin kuibing ngai maton ansonna ranga a omzia asut pe thei nok rang anten Pathian thang apuang ngai ha alan sang sa u.

⁶Hasik han ka unai andit ngai, nangni koma ka hong tik ngala chongtina ngal hong chongin lang, na kom u na alakte ngal Pathian chong suak mo ariat ansang beta mo Pathiana sing suakna chong mo ole anchuna achong aril ka ni nok anten na rang u na ite amang ruana antet no ning hale?

⁷Theilia ni rase tingtang ni rase nuk abui rasa nei thei ngal ni rase ei ansut acha nok ten theilia mo tingtang mo ansut, hontinmo min riat thei ni?

⁸Totorot ei antum rasa asuak het nok anten tumo anduina muna ase ranga ansin ni?

⁹Havantin anga han, na maleiin abei cheka ei ti thei chong ngal na manthiang thei nokten nei ril ha hontinmo min riat thei ni? Hantin aniten na chong ril ha thinthin choi inti.

¹⁰Hi ramuala atei chip chong a tampa a oma hava han angkhatte ngal a omzia nei lui om mak.

¹¹Tenchu chong anril tak ha ka riat thei nok ten ka ranga chong a rilpu ha kho varal danga mi keng ei chang hanuk chu amani rang koi ha kho varal danga mi keng kei chang.

¹²Hasik han nangni ngai Ratha borsang achang ranga ake do na ni u tak anten kuibing ei anbuak theina ranga chunglam borsang ngai dora nei mang sabak thei u na rang put u ro.

¹³Hava sika han chongtin ril theina borsang achang tak han, a omzia ei suta ei ril theina ranga borzong rase.

¹⁴Asik chu ka ratha han bor azong tenchu ka malung han lei ansan ansiat pui lui taka bor ka zongin.

¹⁵Hanle imo ei ni rang an zei? Ka ratha le bor ka zong ten ka malung lem zong pui ka tinga, ka ratha le la ka tho ten ka malung lem tho pui ka ting.

¹⁶Ratha duai le Pathian koma raisanna nei man tung anin le hava mipui ngaiin hontinmo raisanna borzonga nei mantung nana “Amen” lei ti u ni? Nei ti ngai dora ha ariatna reng om pe u mak hale.

¹⁷Pathian koma raisanna nei mantung nana na borzong adik ngal zapam mi tei ngai ranga chu ahenhonna ngal om mak.

¹⁸Nangni ngai neka chongtin aril theina borsang achang ranga Pathian kom raisanna ka mantung.

¹⁹Tenchu, chong asang asang aril rang nek ten kuibingin Pathian biak huna ei riatsa le mi dora ei anchu theina ranga chongkam ranga bak aril ka zot.

²⁰Ka unai ngai, nei mandon u ha naipang mandon ang choi u no ro, hanek ten asanok lama naipang anga ni u ro, tenchu mandon lama chu ratitung anga anbetok u ro.

²¹Pathian dan lekhabuna anziak anga, “Puman chongtin le hiva nam ngai koma chong ka tinga atina. Khovaral dang mi ngai baikua manga chong ka tinga tenchu ka mi ngaiin ka he akuar sung u no ni.”

²²Hasik han chongtin aril theina borsang hi aiam ngai rang ni maka hanek ten aiam nok ngai ranga ngal ani ti andangna khat ani, tenchu Pathian thang apuangna borsang hi chu aiam nok ngai ranga ni mak haneka aiam ngai rang ngala ani.

²³Hasik han kuibing ngai munkhata nan khom u tik le na lom u na chongtin aril na thei kiar un le hava taka han mi atei ngai mo ole aiam nok ngai ahonga lut ngaiin achang na hong ti uno ni mo?

²⁴Hanuk Pathian thang apuangna borsang achang zit na ni kiar ret unle hava tak han aiam nok ngai mo ole mi senkhat ahonga lut le amani han ei siat lei manlo u na arui lei ril unti.

²⁵Hatuka ama a malung rila amandon anthup ngai hong anlang inti hatuka anboka Pathian amok inti, “Pathian hi atak taka na bil u na keng ei om,” hong ti inti.

²⁶Hanle hava taka han imo ei ni unai ngai? Nangni ngai Pathian anmok rang nei anchun u nana angkhat la tho rang zot inti, atei khat Pathian chong aril zot om inti, hanuk angkhatin Pathian ata achong riat aril zot om inti, atei khat retin chongtin riatna borsang achang om inti, hanuk atei khat retin mi chong omzia sut theina achang om inti. Hava ngai dora ha kuibing satna ranga mang u ro.

²⁷Chongtina achong thei borsang achang a om atam ten anni mo anthumin mo chong rase; hava ngal ha angkhat suale angkhat. Hanuk angkhatin chu a omzia sut pe rase.

²⁸Havantin han a omzia asut thei rang ang khat a om nok rang ten chongtin ril theina borsang achangpu ha daireka om rase tenchu ama le Pathian rang duaia ril rase.

²⁹Pathian thang apuangna achang ngai kara anni mo ole anthumin mo puang rase atei ngai chu hava ruia azeka lei om rase.

³⁰Ankhom na muna ansut chiana aleia om mi ngai kara tu khatin mo Pathian ata apuang rua thang aleia man a om anten mana chong aleia ril ha lei bang tot rase.

³¹Asik chu angkha khata nangni ngai Pathian ata thang apuangna achang kiar keng na ni u; na lom u na rang anchuna sa ei manna rang le ngamna rang ni kiar thei rase.

³²Pathian thang apuangna achang ngai chu aruaipa chong taka om rase.

³³Asik chu Pathian chu nei anbuaina ranga ni mak tenchu anngoina le phukdaina ani rang ani; Pathian mi anthiang kuibing ngai ei ni u anga han.

³⁴Nupang ngai chu anchunna muna ei dairek rang asa. Achong ranga anphal no rase. Juda ngai Danin ei ti anga chu, nupang chu ulian changna anpek no rase.

³⁵Nupang ngaiin anchu rang azot ten ina a ruathar koma rakel rase. Asik chu kuibing anchunna muna nupangin chong ei ril hi anzakna ani.

³⁶Ti u ta, Pathian chong hi nangni ata asuak mo? Ole nangni na kom rong mo ei hong tung thei?

³⁷Nangni kara tun mo Pathian tir khata mo ole ratha mi khata ansabei a om ten na kom u na kei hong maziak ngai dora Pathian chong khang atina rangai rase.

³⁸Tenchu ariat zot ranga a malung apek nok ten ariat noka om rase.

³⁹Hasik han ka unai andit ngai, Pathian thang apuang ranga val u ro; hatuka chongtin aril thei ngai ranga khar u no ro.

⁴⁰Tenchu aloma nei tho u dora ei anhuina rang le dan ang taka ni kiar rase.