Read Ranglong 1 KORINTH 15 Bible Online

1 KORINTH 15 - Ranglong bible

1 KORINTH 15

¹Atun hin ka unai andit ngai, na kom u na thang ahui kei hong puang ha nangnin nei lei pom um u hatuka hava han nei iam u nam adet tita nei anding u na ha keina hong manriat ret zot u ani.

²Hava ha thangahui nangni na kom u na kei hong ril; hava ha asa zata na surtit u ten zokna chang un na ti, hanoten akorongta nei iam u.

³Mansana na kom u na anchuna alian khit keina hong bang u ha Pathian lekhabuna anziak anga; Krista koini ngai na pap sika ahonga thina

⁴Anphuma hatuka Pathian lekhabuna anziak anga han, ni anthum suale ahong anthui reta.

⁵Hatuka Pitor koma le a zolai somleianni ngai koma ei anlang.

⁶Hava sua ret le raza ranga neka atam anuk azi ngai koma ei hong anlang pe, amani kara atam riai chu ala dam u na, tenchu senkhat chu aleia thi zeia.

⁷Hava sua ret le chu Jakob akoma le kuitir ngai koma avan lang sira.

⁸Ei hek khitnana min zir nok sama anzir koia miring ka komam ala hong anlang.

⁹Kuitir kara chu asin khit ka ni zei, Pathian a kuibing ngai ansinsak kei ni sika han kuitir raming anput rang ngala arua ni makung.

¹⁰Tenchu atuna a om kei la chang ngal hi Pathian lungkhama ani, hatuka ka tak chunga a lungkhamna buanruang se maka, haneka kuitir atei ranga sin atho beta kan riata, tenchu koiin kei tho nimaka, ka bila a om Pathian lungkham ha keng atho.

¹¹Hasik han koiin mo ka tho hano amanin mo atho u hintin hin Pathian chong nei ril tuara nangnin aiam mi nei lei anlo thei u na ani.

¹²Koinin, Krista athi ata ahong anthuiret zei atina nei lei ril manlum lai taka na bil u na senkhatin hontinmo athi sua chu dam ret thei ngai lai mak nei ti u?

¹³Athi ata adam ret thei lai nok rang anten hano Krista ham anthui mak.

¹⁴Hatuka Krista ha athi ata ahong anthui lai nok ten hano koinin Pathian chong nei ril ham akorong hatuka nangni nei iam u na ham akorong.

¹⁵Hantin ani tenchu Pathian arui nei rilna han milak nei anlona duai keng ei anlangna ei chang ani zei, asik chu koinin nei lei ril chu Pathianin Krista ha athi ata ei mathui tenchu athi ata anthuiret ngai mak adik ten Pathianin Krista ham hano mathui mak.

¹⁶Hantin ani ten athi ngai hi anthui u lai nok rang anten Krista ham anthui mak.

¹⁷Hatuka Krista ha anthui lai nok ani ten nei iam u na ham hano arothol hanuk chu na pap u ngai chipa ala om na ni u.

¹⁸Hano tenchu Krista iama aleia in ngai rangam anchanna bang ala suak tina ala ni.

¹⁹Hivana nei damna rang duai ranga Krista nei sabei ani ten mi dora vanaduai khita anlo inti.

²⁰Tenchu ataktaka Krista athi ata anthui nget ani siak, havan tina han athia aleia in ngai doram ei lan thui kiar nget u rang ham adik siak.

²¹Miring ngai koma thina ha ei hong tung ani tak anten havantin ang reta athi ata anthuiretna ham miring koma ei hong tung ani ret zeia.

²²Asik chu Adam tak chung ata lokon thina ei chang ang tak han Kristana nget han lokona adam ret ranga lan thui kiar inti.

²³Tenchu nei ni ang chipa aruruala; Krista chu mi man khita ni inti, hatuka Krista ami ngai dora chu ama ahong ret tik le.

²⁴Hava tika chu ei hekna rang ani zei. Hava tika chu Krista han ratha mi ngai chunga rui aleia ril ngai, ningneina ka don ati ngai le ranak razung adon ngai ahong zui suale chu Pa Pathian kuta ram chu la hong betok inti.

²⁵Asik chu Pathian araldui ngai a mandoka ake thuaia asiak nok maseng ram chunga rui ei la ril nget rang.

²⁶Ei hek lenna na raldui chu thina ham ei la mandok rang.

²⁷Pathian lekhabuna ei ti anga, “Pathianin aloma ake thuaia la man leng kiar inti.” “Alompeia” ti taka hin Pathian aning lena chu anchel mak ti anthiang phata. Ama han keng alompeia Krista athuaia ei man leng zit rang ala ni.

²⁸Tenchu alompeia chunga Krista aman suale chu Pathian Sapa aning lenam Pathian ruaina sunga la lut inti hava alompeia ama thuaia asiak pe taka han; hatika Pathianin alom reng chunga rui la ril inti.

²⁹Athi ngai ranga baptisma achang ngaiin imo lot u ni? Hongtin ani ranga mo ei sabei u rang? Senkhatin athi ngai anthuiret u lai nok rang anten athi ngai ranga baptisma hong rang mo ei la chang?

³⁰Hano hong rang ngala mo koini ngai ahuntina antakna asuak rang?

³¹Ka unai ngai, koini na Puma Krista Isuana nangni ka borai thona u ngai duai atho chunga keina ti ani u zei, anikhuana athi keng ka ni.

³²Ephesi na “Ram sa ngai” le kei anduipui u na ha miring anga kei anduipui ni ngal sela hava han imo kei anlokna rang? Tenchu athi ngai adam ret ranga anthui ulai nok rangan tenchu, “Hong u ro nek anbual sak anbual tho u rei asik chu nangtuka athi rang keng na ni ati nadan asuak.”

³³Amo anlo u no ro, a omzia chu “Na lom nei anlop pui asa nok chu nungchang asa amasiat.”

³⁴Nei dikna lehan hong kir ret ro, hatuka pap atho ata bang ro; senkhat ranga chu Pathian riatna don u mak. Nei anzak u na ranga hiva chong hi keina ril u ani.

³⁵Tenchu tun mo chu ti inti, “Athi hi honmo adam ret ranga anthui ni? I ang taksa mo ei hong choi rang?”

³⁶Nang amo! Nang lenin aru nei tu ha phila athu zit maseng chu hong dam ret thei mak hale.

³⁷Hatuka nei tuna ahonga mong ngal ha nangin nei manlian ni mak; gom ru ni rase hano atei atei ru ngal ni rase aru rong duai hakeng nei tu.

³⁸Pathianin hava ang kei manni rang ei ti ang tak keng ei manni. Hatuka chimu ru tina ama ei ni rang ang ha ei pek len keng.

³⁹Taksa dora hi taksa munkhat zit ni mak. Havantin han miring taksa atei, sakemanli taksa atei ret, va taksa atei, hanuk nga atei chip anina.

⁴⁰Havantin ang han van taksa a oma, hatuka ramual taksam a oma; tenchu van taksa ei sana atei hanuk ramual taksa ngai ei sana atei ret ani.

⁴¹Ani aninga ei sana adona, tha ei sana atei ret, arasi ngai um ei sa u na atei ret hatuka arasi ngai le arasi ngai kara ngal ha ei sana atei chip u anina.

⁴²Athi ata adam ret rang anthui ngai rang um hantin han ei la ni rang. Taksa athi ha nei phum hava suale chu athi lai nok ranga han ei anthui ret.

⁴³Na tu lai tak chu asiat le ranak abui ania; ahonga mong tika chu ei hong sa hanuk ranak ei hong nei ani.

⁴⁴Nei phum chu taksa apumpui ani; anthuiret tika chu ratha apum ha ani. Taksa apum a om tak anten ratha ham apum a om ani.

⁴⁵Pathian lekhabuna chu hintin hin anziak a oma; “Miring mansa, Adam, phuk aneia ansin anina.” Tenchu ei hek khitna Adam chu damna apek thei Ratha ei hong ni.

⁴⁶Ratha hi mana hong mak tenchu taksa apum hakeng man ansa bak; ratha ha keng nuk anta.

⁴⁷Adam miring mansa ha phil le ansin ania; phil ata anthok. Avoi annina Adam chu van ata ahong anthok.

⁴⁸Phil le ansin miring chu phil ang dena la ni inti; van mi ngai chu van ata ahong ang la ninti.

⁴⁹Hatuka koinin phil le ansin mel nei raput anga han nangkan chu vana mi ngai mel angam la raput inti.

⁵⁰Ka unai ngai hiva hi keina ril u; thisen le taksan chu Pathian lengna ram lua thei ngai mak; hatuka asiat theiin asiat nok rang mun lua thei no ni.

⁵¹Rangai u ta, atak anthup na ril u rong; koini ngai thi kiar no mania tenchu na loma lan thul zit inti.

⁵²Chomokhat sunga, mitkhap kara ei hek khitna totorot antum tik le la hong ni inti; asik chu totorot antum le athi ngai athi lai nok ranga lanthui untia, hatika na mel lan thul kiar inti.

⁵³Asik chu hiva asiat thei hin asiat nok rang khopa ei lan thul nget rang. Hanuk chu ala thi theiin athi thei nok ranga lan thul inti.

⁵⁴Hatuka athi thei han athi lai nok rang mun alua ranga ahong anthul tik le chu, Pathian lekhabuna chong ha hong kip inti; “Thina ha zuina han ei mandok ani zei.”

⁵⁵“Thina hovanmo nei zuina? Thina honmo na tur ei om?”

⁵⁶Thina tur chu pap ania, hanuk pap sinthotheina ranak chu Dan ei ni:

⁵⁷Tenchu Pathian chu anpaka om rase; Ama han koini na Puma Isua Krista zara koini ranga zui theina ei na pek.

⁵⁸Hasik han ka unai andit ngai, adet tita le angir tita om u ro; Puma asin atho ranga annot babang u ro; asik chu nei lei hong riat sua u anga Puma adorbo nei adom u nana nei pong u akorong chang no ni.