Read Ranglong 1 KORINTH 16 Bible Online

1 KORINTH 16 - Ranglong bible

1 KORINTH 16

¹Atun Judiana a om Pathian mi anthiang ngai sanna ranga sum ansuanga pekna ruia nei hong maziak u ha, Galatia kuibing ngai koma kei ril u anga nangnim tho u ro.

²Sapta mansa nikhuana naning chipa sum khai lalak u tan na ranakin eia kol u anga sum manting u ro; ka hong tikle sum ansuang nadan nei suak u nokna ranga.

³Hatuka ka hong tikle nangnin arua atina nei lei phun u ngai koma koiin amani koma lekha maziaka amani han na kom u ata hava nei pek u dan ha Jerusalema mathuan ka ting.

⁴Hatuka chu koi len ngal ase thei ka niten amanim ka bila hong u bo ni.

⁵Makedonia ka va mantong suale nangni ngai koma hong ka tinga, asik chu Makedonia tiang ata ase ranga kan sina.

⁶Na bil u na ni ituk ten mo chu ahonga om nadan asuak um theia; ati samak nudin kar pei ka om ving um thei, havantin aniten kei se na rang takam nana san thei u zei.

⁷Nangni ngai le lampuia anmurak anga anan mupui rang chu azot ni makung; asik chu kei zot tak chu Puma azot anten nikhua sot uala na bil u na om rang ka zot.

⁸Tenchu hivan Ephesina Pentikos tenpeia om ka ting.

⁹Asik chu ka matona suakkhar khat alei anlonga hava ha alian le sin atho theina ranak um ani, anadui atam sabak ngalam nisela.

¹⁰Timothi na kom u na ahong ten nei lei pham u na ha lei manriat u ro; asik chu koi ka anga ama ham Puma sin atho keng.

¹¹Tuten lei dem u no rase; haneka ei sena tina phukdaia ei tho theina ranga lei san nget u ro; ka kom ei hong kir ret theina ranga. Asik chu aiam ngai le ei hong kir u rang ha kei lei ngak.

¹²Hatuka ka parual Apolo ruia chu; nangni ngai koma a iam ngai le ase ranga kei mathem bang ani zeia, tenchu atun ten hin ase ranga la man nuam thei makung hiva hun taka ase ranga. Hun aman nikhua tika se bo ni.

¹³Asing avara lei om u ro, iamnana anding tit u ro, ngam u ro, rat u ro.

¹⁴Na sin tho u ngai dora lungkham le nei tho u chang rase.

¹⁵Nangnin Stephan le a insungkua na riat kiar u hale; amani insung ha Akaia khuana Kristian achang mansa ani u na; hatuka Pathian ami ngai dorbondom ranga anphal u ani. Ka unai ngai, keina mathem ani u zei.

¹⁶Nangnim hiva ang ruaipu, hatuka amani asan rang azot le sin athona arat ngai dora anuk zi u ro.

¹⁷Stephan, Fortunata le Akaiaka ei hong u na hin achan ka rai asan. Nangni nei ansam u na han amani ha ei lei hong ansap u ani zei.

¹⁸Asik chu koi le nangni ngai ratham anan har pui u ani. Hava ang mi ngai chu mandang u tan ton u ro.

¹⁹Asiana kuibing a om ngai dora ranga chibai ei na bukna ana mantung u; hatuka Akuila le Priskilla hanuk amani insungkua kuibing ngai dora rangam Kristian anphamna chibai ana buk u.

²⁰Hivana aiam ngai dora ninum chibai ei na buk u na ana hong mantung kiar u. Nangni ngai angkhakhata phukdaina le biang antum ansiata chibai anbuk u ro.

²¹Chibai keina buk u na chu koi Paul ngetin ka kuta kei hong maziak ani.

²²Puma andit nok ngai chu achunga khomak tung rase! Maranatha--Na Puma ahong zei!

²³Puma Isua Krista a lungkhamna na kom u na om rase.

²⁴Krista Isuana ka lungkhamna chu na kom u na om rase.